Reforma e pagave, Edi Rama: Rritja në dy faza, kategoritë që preken

Këshilli i Ministrave ka miratuar sot projektligjin e ri për reformën e pagave. Në një dalje për mediat, kryeministri Rama deklaroi se do të ketë një sërë kategorish që do të preken nga rritja e pagave, duke filluar me punonjësit e administratës, mësuesit, infermierët, mjekët, zjarrfikësit, punonjësit e sigurisë.

Rritja do të bëhet në dy faza. Në hapin e parë, rritje do të marrin mësuesit, punonjësit e sigurisë, mjekët dhe infermierët. Ndërsa rritja e radhës do të bëhet pasi projektligji të miratohet në Kuvend.

“Sapo kemi dakordësuar projektligjin për reformën e re të pagave. Kemi sanksionuar e zeza mbi të bardhë se, në harkun e një vit,i paga mesatare në Republikën e Shqipërisë do shkojë nga 563 euro në 900 euro.

Të mund të rishpërndajmë të ardhurat aty ku edhe me shumë të drejtë familjet e zakonshme shqiptare presin më shumë se çdo gjë tjetër në arkën e buxheteve të tyre. Është e rëndësishme për ne që të konstatojmë se sa e qëndrueshme është ekonomia jonë.

Ia kemi dalë të rezistojmë plagëve dhe problemeve të rënda. Sot mund t’ju themi të gjithëve se është dita për të marrë ato vetë, drejtpërdrejtë në arkën e tyre familjare, frute nga kjo përpjekje dhe nga reformat që na kanë sjellë deri këtu. Nuk dua të humbas vëmendjen në shumë shifra. Detyra jonë tu japim shqiptareve maksimumin e produktit të reformave.

Specialistët më të ulët që punojnë në administratën qendrore do të kenë një rritje nga 49 mijë lekë në 81 mijë lekë.

Paga e mësuesve në arsimin e mesëm do të shkojë mbi 100 mijë lekë. Në arsimin bazë do të shkojë nga 74 mijë deri në 95 mijë. Këto janë shifra bazë. Kohëzgjatja në detyrë dhe nivelet e kualifikimeve bëjnë që gjërat të jenë edhe më mirë. Është koha të bëjmë një rritje të konsiderueshme pedagogëve me 20%.

Infermierët do të kapin një bazë prej 87 mijë lekësh, kjo bazë shkon edhe mbi 90 mijë lekësh në bazë të pozicionit në punë.

Kemi rritur pagat për FA, kemi rritur pagat për gjithë sistemin e sigurisë, do i rrisim, kemi rritur pagat për zjarrfikësit. Do të rrisim pagat për zjarrfikësit, do e çojmë deri në 80 mijë lekë. Hapi i parë do të jetë tani me mësuesit, me sigurinë dhe mjekët e infermierët.

Ky hapi i parë për të gjithë të tjerët do jetë pasi parlamenti do kalojë projektligjin. Hapi i dytë do jetë për vitin e ardhshëm ku do bëjmë të gjithë plotësimin e kuadrit të kësaj reforme dhe do mbërrijmë në pagën mesatare 900 euro”, tha Rama.

Kryeministri tregoi edhe si do të nxitet sektori privat të rrisë pagat.

“Është një proces i ndërthurur sepse rritja e pagave në sektorin publik rrit patjetër dhe aftësinë e sektorit publik për të thithur burime njerëzore më të kualifikuar. Nga kjo sektori privat do të jetë i detyruar të rrisë pagat.

Sot pagat në sektorin privat  po rriten me shpejtësi. Sot jemi në një situatë ku kemi filluar një proces komunikimi me sipërmarrjen private për  të sensibilizuar sipërmarrësit lidhur me domosdoshmërinë, e mbrojtjes së kapitalit njerëzor.

Ne jemi optimistë dhe shikojmë shenja pozitive nga sektorët private. Natyrisht do të marrim dhe masa tjera. Për ne nuk është vetëm rritje pagash por dhe mbrojtje e punonjësve dhe punëtorëve në kompani të ndryshme nga shfrytëzimi”./Monitor/