Reforma në Drejtësi, Soreca: Ka disa dosje të rëndësishme që duhen…

Reforma në Drejtësi duhet të përfundojë, tha Ambasadori i BE në Tiranë, Luigi Soreca, në konferencën me temë “Roli i Institucioneve Vetëqeverisëse të Drejtësisë në forcimin e profesonalizmit dhe performancës së Gjyqësorit”, ku kërkoj lidership nga institucionet e reja si dhe mbështetje nga Qeveria për, siç tha, disa dosje të rëndësishme që duhen trajtuar.

“Reforma ishte thelbësore për Shqipërinë dhe po jep rezultatet e para. SPAK ka çuar në gjykatë Ish-Kryetarin e Gjykatës Kushtetuese dhe po heton 23 të tjerë. Reforma në Drejtësi duhet të përfundojë dhe institucionet e reja duhet të tregojnë lidership. Ka disa dosje të rëndësishme që duhen trajtuar. Qeveria ka detyrën t’ju mbështesë. Është urgjent që procesi i Vettingut të përfundojë sa më shpejt, por duke ruajtur integritetin e procesit. Kjo do të dojë zgjatje të mandatit të anëtarëve të KPK dhe komisionerëve,” tha Luigi Soreca duke shtuar se vettingu të vazhdojë por duhet zgjatja e afatit të organeve të vettingut:

“Reforma duhet të jetë e pakthyeshme por Parlamenti duhet ta konsultojë me të gjithë aktorët. Konsolidimi i Reformës në Drejtësi duhet të jetë kryefjalë. Reforma në Drejtësi po sjell rezultate konkrete, të cilat ishin të paimagjinueshme, psh 23 procedime penale ndaj ish-gjyqtarëve të shkarkuar nga Vetingu, përfshirë ish gjyqtarë të Gjykatës së Larte dhe asaj Kushtetuese,” tha Ambasadori i BE në Tiranë, Luigi Soreca, duke përsëritur se Reforma në Drejtësi është dhe do të mbetet prioritet kyç për BE, .për të cilën reformë deri më tani janë investuar 55 milionë euro.