Reforma territoriale, PD: PS do të fus rajonet dhe prek Kushtetutën, Ne propozojmë…

Deri sa Edi Rama me opozitën e përzgjedhur nga Partia Socialiste vazhdon punën në Komisionin për Reformën territoriale, për synimet e reformës së këtij Komisioni dhe propozimet konkrete të Partisë Demokratike, sot kanë folur Nënkryetari i PD Oerd Bylykbashi, Sekretari për Çështjet Ligjore dhe Zgjedhore Ivi Kaso, dhe Sekretari për Pushtetin Vendor, Ylli Asllani.

Pas preferencës së Partisë Socialiste për të krijuar rajonet duke prekur Kushtetutën, PD paralajmëron se pushteti pa votë nga zgjedhësit, do të ishte atentati i  fundit që do ti bëhej sistemit ndërsa sot foli dhe për numrin konkret të bashkive që sipas ekspertizës së Partisë Demokratike duhet të jetë mes 80 dhe 120 nga 61 që është aktualisht.

“Dua ta them që në fillim se Reforma Territoriale ka dështuar që në vitin 2018. Ajo që ne dimë sot është që është larguar pushteti zgjedhur nga qytetarët, pushteti tashmë është centralizuar. Partia Demokratike e ka denoncuar këtë aferë. Partia Demokratike ka mendim të qartë për të marrë pjesë dhe për të bërë më të mirën. Gjithashtu në kuadër të sekretariatit për pushtetin vendor është ngritur sekretariati në çdo rreth ku do të mbledh kontributin e të gjitha viteve që Partia Demokratike ka pasur në reformën territoriale.

Reforma territoriale është një instrument që nuk duhet humbur, sepse diçka e bërë keq për interesa të vogla politike sjell pasoja të rënda më pas. Kemi shpërndarë një pyetësor për të mbledhur mendime në çdo anë përsa i përket kësaj. Kemi kapacitetet për të çuar një Reformë Zgjedhore, pas rreth 9 muajsh do të jenë edhe zgjedhjet vendore. Theksoj se ky do të jetë një vendim politik, që do të ketë mbështetjen politike. Nuk do të jetë një reformë false si ajo e vitit 2014, por një reformë territoriale e pushtetit vendor afatgjatë,” tha Nënkryetari i PD, Oerd Bylykbashi, ndërsa Sekretari për Pushtetin Vendor, Ylli Asllani, vlerëson se nga kjo Reformë kanë dalë struktura që janë larguar nga interesat e qytetarëve.

“Nga kjo reformë janë përfituar apo kanë dalë struktura që janë larguar në mënyrën më të mundshme nga interesat e qytetarëve. Të bësh tendera e të ndryshosh jetën urbane pa dituri është më tepër se e dëmshme. Jemi të bindur se reformat administrative territoriale duan një kohë të plotë,” tha Ylli Asllani ndërkohë Ivi Kaso vlerëson se nuk mund të Reformë territoriale pa implikime territoriale.

“Nga njëra anë kemi Komisionin e Reformës territoriale dhe është e qartë se kur do ti paraqitet publikut dhe kemi edhe reformë zgjedhore që është në stanjacion. S’mund të ketë Reformë territoriale që t’i shërbejë qytetarëve, pa vlerësuar të gjitha aspektet dhe implikimet territorial.

Mendimin tonë e kemi shprehur dhe pastaj në fokus të punës vetëm të impaktit elektoral solli edhe dështimin e Reformës së fundit pasi nuk u mbajt në fokus shërbimi ndaj qytetarëve dhe qëllimi ishte vetëm përfitimi elektoral i momentit dhe për këtë themi që janë të lidhura dhe logjika e donte që të ecnin me të njëjtën shpejtësi dhe kjo nuk ka ndodhur kështu.  Mazhoranca e ka shprehur preferencën e saj për ta prekur Kushtetutën,” tha Sekretari për Çështjet Ligjore dhe Zgjedhore, Ivi Kaso duke hedhur poshtë propozimin për rajonet:

“Nuk duam që rajonet e famshme dhe që janë prioritet i tyre në reformën territorial të shndërrohen në kalin e trojës për të prekur kushtetutën dhe për të vendosur primin çka do të thotë pushtet pa votë. Dhënia në tavolinë e primit, pushtetit pa votë nga zgjedhësit, do të ishte atentati i  fundit që do ti bëhej sistemit. Pranë PD-së është ngritur grupi i punës për reformën zgjedhore dhe po zhvillon takime që opozita të ketë gati propozimet e saj për çfarëdolloj produkti të reformës territoriale.”

Diskutimi, tha Nënkryetari i PD çon mes 80 dhe 120 bashki, tha Nënkryetari i PD, Oert Bylykbashi, ndërsa bëri një paralajmërim se si mund të dështoj propozimi socialist:

“Edhe po nuk ndryshoi asgjë, vetëm dështimi i kësja reforme do ta shtyjë për shumë vite të tjera atë. Dy projekte të mëdha kanë çuar në një hark diskutimi mes 80 dhe 120 bashkish që në çdo rast është ¼ e 384 bashkive dhe komunave të dikurshme. Reduktimi është drastic por është funksional. Reformat nuk janë kurrë as për të mbyllur pazare dhe as për protagonizma. Të gjithë deputetët e PD që i bashkohen qëndrimit tonë do të bëjnë të mundur që PS të mos i arrijë 94 votat për ndryshimin e Kushtetutës.”