Reforma Zgjedhore/ Bylykbashi: Këshilli Politik vijon punën, Gjiknuri: Të hënën Drafti final!
Përfaqësuesi i Opozitës së Bashkuara në Këshillin Politik për Reformën Zgjedhore, Oerd Bylykbashi, tha pas mbledhjes së Këshillit se do të vijojnë punën deri në dakordësimin e plotë të amendimeve, ndërsa Përfaqësuesi i mazhorancës, Damian Gjiknuri, tha se kanë ra dakord për pjesën më të madhe të Kodit Zgjedhor dhe Drafti final do të jetë gati të hënën.
” E rëndësishme është që derisa të shihen plotësisht të hartuara në legjislacion, garancitë që është rënë dakord më 5 qershor për administrimin e zgjedhjeve, identifikimin biometrik, sigurisht që deri në atë moment Këshilli Politik do të vijojë punën deri në dakordësi. Të hënën versioni i plotë për të përmbyllur edhe ato aspekte tek financimi,” sqaroi Oerd Bylykbashi duke përfunduar:
“Ditën e hënë Këshilli Politik do ketë dokumentin e plotë për t’i dhënë zgjidhje dakordësisë.”
Përfaqësuesi i mazhorancës në Këshillin Politik të Reformës Zgjedhore, Damian Gjiknuri, tha se sot kanë ra dakord për pjesën më të madhe të çështjeve të Kodit Zgjedhor dhe të hënën, ose maksimumi të martën, do të jetë gati drafti final i dakordësuar nga të gjitha palët.
“Patëm mbledhjen e radhës të Këshillit Politik, ku dakordësuam pjesën më të madhe, që lidhje me financimin e fushatës, rolin e medias. Kemi ende 2-3 pika, që duan diskutim. Besoj të hënën do të kemi gati draftin, që përmban të gjitha çështjet e adresuara gjatë kësaj kohe. Besoj të hënën, ose maksimumi të martën, të dërgoj draftin final. KQZ nuk ka ndonjë element surprizë. Po diskutojmë dhe disa pika të fundit, ku do të reflektohen dhe disa shqetësime që mund të ketë opozita jashtëparlamentare. Ekspertët lanë që drafti të jetë i plotë të hënën, tha Gjiknuri duke përfunduar:
“Do të lejohen reklamat politike, nuk jemi në kushtet për t’i ndaluar, ndaj dhe do të jenë pjesë e Kodit Zgjedhor. Buxheti i shtetit do të dyfishojë financimet për partitë dhe tavani do të jetë në raportin 1/3, pra 3 herë më shumë se çka do të marrin nga buxheti. Llogaritë bankare do duhet të jenë deklaruar me kohë.”
