Reforma Zgjedhore/ Grupi i Opozitës Bashkuar, Alibeaj: Do t’i referohemi Bundestagut, Edi Rama tallet!

Grupet e Punës për Reformën Zgjedhore pranë Opozitës së Bashkuar sot kanë filluar punën me mbledhjen e parë të Grupit të Oponencës, i cili kryesohet nga  Enkelejd Alibeaj, ku është diskutuar për Draftin e paraqitur nga qeveria mbi reformën zgjedhore, shit-blerjen e votës dhe politizimin e administratës zgjedhore.

Serioziteti dhe dëshira për të bërë një reformë reale me këtë Draft, tha Alibeaj, dëshmohet edhe nga fakti ku për shitblerjen e votave mjafton që kreu i qeverisë, Edi Rama, do të dalë solemnisht dhe do të premtojë që nuk do të vidhen më.

“Kjo është qesharake,” tha Alibeaj, duke e bërë të qartë se Opozita e Bashkuar do t’i referohet vetëm letrës së Bundestagut.

“Zgjidhjet që janë dhënë besoj që tregon qartësisht seriozitetin dhe dëshirën për të bërë një reformë reale, por të propozosh, për shembull për shitblerjet e votave, që na u mjaftokërka me një deklaratë që bën Rama, ‘O Sheshi Skëndërbej, që nuk do vjedh më vota’, kjo është tentativë për të hedhur hi syve shqiptarëve dhe ndërkombëtarëve.”

Me këtë rast Alibeaj foli edhe për financimin e fushatave për të cilën flet Drafti i Edi Ramës:

“Të adresojnë çështjen e parave të pista në fushatë, duke thënë se do gjobiten ata që marrin para, kjo është tallje më e rëndë, dhe jo seriozitet.

Reformë realë është të diagnostikojë realisht problemet e zgjedhjeve dhe të gjejë zgjidhjen efektive, ndryshe do të ishte tallje,” thekson kreu i njërit prej Grupeve për Reformën Zgjedhore të Opozitës së Bashkuar duke u shprehur qartë se thirrja që i bënë palës tjetër, është t’i rikthehet realitetin, nëse ka dëshirë.

“Axhenda jonë është totalisht e orientuar prej dokumentit të Bundestagut. Sa kohë që propozimet janë ato më sipër, kjo është qesharake,” tha Enkelejd Alibeaj.

Ndryshe, Reforma Zgjedhore sipas Kryeministrit Edi Rama do të ndahet në dy faza: Implementimi i Reformës Zgjedhore sipas standardeve të OSBE, dhe Dialogu me opozitën.