Reforma Zgjedhore, ndalimi i deputetëve të opozitës përsëritet edhe sot, Bardhi: Do depozitojmë kallëzim

Kryeministri Edi Rama edhe pas kaosit të krijuar dje ku kishte fortifikuar Parlamentin me gardë dhe ndalonte hyrjen në seancë plenare si deputetëve të dënuar ashtu dhe atyre që nuk u ka ardhur radha, vazhduar edhe sot me punimet në Komisionin Zgjedhor!

Fillimisht Garda nuk lejoi të futet asnjë deputet opozitar por pas këmbënguljes së madhe, deputetët që nuk ishin përjashtuar nga Komisioni i Etikës, arritën të futen në sallën ku do të mbahej mbledhja e Komisionit për Reformën Zgjedhore ku ata nuk kishin se çfarë të bllokonin pasi aty nuk ishin asnjëri nga anëtarët e PS-së, as të Edi Ramës as të Lulzim Bashës.

Pas dështimit të Komisionit të Reformës Zgjedhore, Oerd Bylykbashi tha se një Reformë pa konsensus nuk i intereson askujt veç Kryeministrit Edi Rama, i cili kërkon krizë politike për të mbuluar skandalet si ai i inceneratorëve dhe Porti i Durrësit.

“Të miratohen rregulla që kush ndikon mbi lirinë e votës, të përballet me drejtësinë. SPAK e prokurori të mos i shmangen detyrës. Rama nuk i do sepse do një reformë zgjedhore që ta mbyllë me atë që ka bërë pazare, me Bashën.

Komisioni në të shkuarën ka qenë kanal që ka shfryrë krizën politike. Rama kërkon krizë shtesë sepse ka hall për skandalet që po i plasin, nuk do që vëmendja të jetë në skandale si Porti i Durrësit dhe Inceneratori. Me kërkesë të atyre që i ka emëruar në krye të opozitës, nuk mundësohet mbajtja e mbledhjes sot.

Reformë pa konsesus nuk i duhet askujt veç Ramës. Kërkojmë me insistim që komisioni të funksionojë normalisht,” tha Oerd Bylykbashi.

Ndërkohë Kryetari i Grupit Parlamentar të Partisë Demokratike, Gazment Bardhi, për aktin e djeshëm ku deputetët e opozitës u ndaluan të hynin në Parlament duke akuzuar Kryetaren e Parlamentit për veprën e djeshme penale tha se do të depozitohet në gjykatë kallëzim për Lindita Nikollën.

“Vepër penale, shpërdorim detyre. Edhe deputetët e përjashtuar kanë të drejtën e protestës. Përveç 19 deputetëve të përjashtuar, dje u penguan të gjithë deputetët e opozitës që të merrnin pjesë në seancë. Kryetarja e Kuvendit sikur të mos kishte ndodhur asgjë, nisi seancën me gjysmën e sallës bosh. Duke marrë kështu autorësinë e asaj vepre penale. Do depozitojmë kallëzim ndaj kryetares së Kuvendit,” tha Gazment Bardhi ndërsa për kaosin që ka krijuar Edi Rama në jetën parlamentare shqiptare nuk ka përjashtuar dhe grevën e urisë së deputetëve të opozitës.

“I kemi lënë kohën mazhorancës të reflektojë. Nëse nuk do ketë reflektim dhe do vijohet me sjellje arrogante, do shkohet edhe në rrugët e tjera që përmendët ,në kohën dhe momentin e duhur.”

.