Reforma zgjedhore/ Shtyrja e datës 15 mars, Basha: Mungesë e vullnetit nga PS!
Fokusimi tek shtyrja e datës 15 mars, tregon mungesën e vullnetit nga ana e Partisë Socialiste, tha sot Kryetari i Partisë Demokratike, Lulzim Basha, duke sqaruar dhe Platformën të cilën e prezantoi dje ndërsa kërkoi reformë radikale dhe u pret me debate të ashpra nga partia në pushtet, PS.
“Objektivi kryesor i PD, i opozitës dhe qytetarëve shqiptarë është t’i japim fund kësaj krize politike. Zgjedhjet e lira dhe të ndershme dhe zgjedhjet legjitime vendore janë rruga për ta bërë këtë dhe ne duam që kjo të ndodhë një orë e më parë, por, sigurisht, me standarte, për t’u siguruar shqiptarëve votën e lirë. Propozimet e tjera që unë kam parashtruar janë propozime, të cilat kanë të bëjnë me forcimin e kontrollit dhe balancave dhe rikthimin tek qytetarët të pushtetit që sot u është vjedhur nga ky pushtet dhe nga bashkëpunimi i krimit të organizuar me politikën.”
Me këtë rast ai iu përgjigj edhe kritikëve mbi përqëndrimin tek çështjet teknike dhe lënjen mënjanë nga Partia Demokratike të objektivit politik, largimin e Edi Ramës dhe zgjedhjen pa Kryeministrin Rama.
“Ruajtja e vullnetit të qytetarëve, dhënia fund e shitblerjes së votave nuk është objektiv teknik është objektiv politik. Zbatimi i rregullave zgjedhore ekzistuese apo të reformuara, përmes një qeverie kujdestare pa Edi Ramën kryeministër, nuk është objektiv teknik, është objektiv politik. Nuk është objektiv thjesht i një partie. Është rruga për ta nxjerrë Shqipërinë nga kjo krizë dhe për t’u rikthyer shqiptarëve atë që u ka vjedhur ky pushtet i dalë nga bashkëpunimi i PS me krimin e organizuar,” tha lideri i Opozitës së Bashkuar, Lulzim Basha, duke komentuar dhe shtyrjen e datës së miratimit të Reformës Zgjedhore, 15 Mars, që tashmë ka filluar të diskutohet nga Partia Socialiste si datë kur Drafti mund të mos jetë dhe i plotë:
“Fokusimi tek shtyrja e datës 15 mars, tregon mungesën e vullnetit nga ana e Partisë Socialiste. Këtu nuk kam gjë tjetër për të shtuar veç t’ju them se çdo ditë që kalon është me kosto të madhe për qytetarët shqiptarë. Çdo makinacion është i papranueshëm për opozitën dhe për Partinë Demokratike.”
