Reforma Zgjedhore/ Ta përmbyllim brenda Majit, Bylykbashi: Në mbledhjen e radhës, mazhoranca me qëndrime konkrete

Deklaratat e Damian Gjiknurit tregojnë mungesën e vullnetit politik të mazhorancës për të bërë një punë me konsensus. Kështu u shpreh Përfaqësuesi i Partisë Demokratike pas Këshillit Politik për Reformën Zgjedhore, Oerd Bylykbashi, duke shtuar se është mazhoranca ajo që vijon të refuzojë propozimet e opozitës ndërsa i bëri thirrje që në mbledhjen e radhës të paraqesë qëndrimet konkrete, pasi sipas tij, brenda muajit maj duhet të përmbyllet reforma.

“Ne kërkojmë shprehjen e qartë nga mazhoranca, cili është vullneti i saj politik lidhur me çështjet e mëdha që shtron OSBE, për të cilat opozita ka bërë propozime konkrete,” tha Oerd Bylykbashi ndërsa sqaroi “tendencë” për të cilën foli Përfaqësuesi i PS në Këshillin Politik:

“Ajo që ngulëm këmbë është se para se të ecim më tutje duhet të jetë e qartë se cili është vullneti i mazhorancës mbi propozimet e opozitës lidhur me një çështje madhore. Brenda 31 majit Reforma Zgjedhore duhet të përmbyllet.”

Për mbledhjen e radhës të Këshillit, Përfaqësuesi i Partisë Demokratike në Këshillin Politik për Reformën Zgjedhore, Oerd Bylykbashi, mendon se është mirë vijë me qëndrime konkrete:

“Është mazhoranca që deri më sot nuk ka dhënë asnjë përgjigje në lidhje me çështjet e shtruara, por vetëm refuzime. Është mirë që mazhoranca pa humbur kohë në mbledhjen e radhës të vijë me qëndrime konkrete. Ne çështjet e mëdha që kemi shtruar do të çojnë te zgjidhjet finale, sa i përket kodit. Nuk mund të shtrohen çështje, pa adresuar çështjet themelore të kodit. Ne jemi të gatshëm të ecim përpara.”

Deklaratë:

Sot rifilloi punën Këshilli Politik mbi bazën e kërkesës që opozita e bashkuar i drejtoi përfaqësuesve të parlamentit pak ditë më parë. Në këtë mbledhje të sotme ashtu siç ishte kërkuar edhe në kërkesën tonë, u përcaktua që kjo reformë Këshilli Politik duhet ta mbyllë brenda datës 31 maj. Është objektiv i opozitës që pa humbur kohë kjo reformë të shkojë drejt përmbylljes me konsensus të një drafti të një Kodi Zgjedhor që parlamenti ta aprovojë pa ndryshime.

Ajo që ne ngulëm këmbë është që para se të vazhdojmë të ecim më tutje duhet që të jetë e qartë: cili është vullneti politik i mazhorancës në lidhje me të gjitha propozimet e rëndësishme që ka bërë opozita e bashkuar në lidhje me një çështje madhore, për të cilat ka drafte dhe propozime konkrete mbi tryezë dhe jemi ndeshur vetëm me refuzim nga maxhoranca për propozimet tona.

Ajo që është e rëndësishme për sa na përket ne, është që ne do të qëndrojmë fort nevojës për të gjetur zgjidhje konsensuale me asistencën e OSBE/ODIHR-it dhe partnerëve të tjerë ndërkombëtarë që brenda 31 majit reforma zgjedhore të përmbyllet dhe më pas t’i drejtohemi menjëherë betejave të tjera politike për konfirmimin e legjitimitetit të pushtetit që është vetëm nëpërmjet zgjedhjeve.

Pyetje: Zoti Gjiknuri ju akuzoi se që po kërkoni ti riktheheni shumë çështjeve nga e para, ndërkohë që ai tha se për çështje të cilat janë mbyllur nuk presim ripropozime të reja nga ana e PD dhe nuk i pranojmë?

Oerd BylykBashi: Deklaratat e zotit Gjiknuri tregojnë edhe njëherë mungesën e vullnetit politik të maxhorancës për të bërë një punë të bazuar në konsensus në Komisionin e Reformës. E ritheksoj, opozita kërkon shprehjen e qartë nga ana e maxhorancës: cili është qëndrimi i saj, vullneti i saj politik në lidhje me çështjet e mëdha që shtron OSBE-ODIHR, për të cilat opozita ka bërë propozime konkrete. Ne nuk i rikthehemi asnjë çështje, ne çështjet i kemi mbi tryezë. Është maxhoranca që deri më sot nuk ka dhënë asnjë përgjigje në lidhje me çështjet e shtruara përveçse refuzimeve të menjëhershme sapo kemi bërë propozime. Kështu që është mirë që maxhoranca pa humbur kohë, në mbledhjen e radhës të vijë me qëndrime në lidhje me këto propozime.

Pyetje: Zoti Gjiknuri ka numëruar dy çështje thelbësore që është depolitizimi i administratës zgjedhore dhe çështja e Kolegjit Zgjedhor. Ka në listën e Partisë Demokratike çështje të tjera thelbësore që i ndajnë palët? Ajo është lista e tyre, kush është lista jua?

Oerd Bylykbashi: Ne çështjet e mëdha që i kemi shtruar sigurisht që këto do të kondicionojnë edhe zgjidhjet finale për sa i përket Kodit, sepse nuk mundet të shtrohen thjesht çështje pa zgjidhur ato që janë themeli i procesit zgjedhor, gjë që adresohet nga propozimet tona. Loja e maxhorancës për ta tërhequr zvarrë me çështje të tjera shtesë nuk ndihmon procesin. Por ne jemi të gatshëm që në këto tre javë që pothuajse mbeten të ecim përpara.

Pyetje: Zoti Bylykbashi nëse mund t’i kthehemi edhe një herë formulës së KQZ-së që pyeti kolegu pak më herët?

Oerd Bylykbashi: Çështja e KQZ-së është pjesë e çështjes së administratës. Zgjidhja që ne do të kemi mbi bazën e propozimeve tona do të hapë rrugën edhe për KQZ-në apo çështje të tjera. Kështu që nuk është “ka apo nuk ka propozime opozita”, ne i kemi të qarta pozicionet tona, tani duhet që maxhoranca t’i hapë rrugën propozimeve për të shkuar më tej, tek KQZ-ja apo çështjet e tjera.