Refuzohet kërkesa e KOSTT-it për ndarjen e 33 mln € për rrymën në veri

Komisioni për Buxhet, Punë dhe Transfere po shqyrton në lexim të dytë Projektligjin mbi ndarjet buxhetore për Buxhetin 2022 i planifikuar 2 miliardë e 748 milionë euro ku janë refuzuar kërkesat e institucioneve për mjete shtesë buxhetore si për pagat e specializantëve për pagat, kërkesën e Institucionit të Avokatit të Popullit për tetë vende të reja pune, rritjen e fondit për paga dhe dieta si dhe KOSTT-it për 33 milionë euro për rrymën në veri, që është refuzuar nga Grupi i punës dhe Komisioni për Buxhet, Punë dhe Transfere.

Po kështu Komisioni ka refuzuar edhe kërkesën e Këshillit Gjyqësor për rritjen e buxhetit për këtë institucion.

Ndaj këtyre refuzimeve të kërkesave për Këshillin Gjyqësor dhe Avokatin e Popullit, ka reaguar deputeti nga LDK Avdullah Hoti, i cili tha se këto refuzime janë në kundërshtim me parimin e institucioneve.

Hoti tha se në këtë mënyrë siç po refuzohen kërkesat, Kuvendi dhe Komisioni për Buxhet di të vije në situatën për leximin e tretë të këtij buxheti.

Ndërsa, kryesuesi i Grupit punues Eman Rrahmani tha se arsyet e refuzimit të këtyre kërkesave është për shkak të tavaneve buxhetore.

Po kështu Komisioni ka refuzuar dy kërkesa të ARKEP-it për rritjen e buxhetit për paga dhe mëditje.

Gjatë shqyrtimit të kërkesave, Deputeti nga VV Rrahmani tha se Grupi punues ka vendosur të mos përkrahet kërkesa e AKI-së për punonjës shtesë dhe për paga.

Po ashtu Komisioni pas shqyrtimit të Grupit punues ka vendosur që mos të aprovohen 31 kërkesat e komunave në vend.