Refuzohet “Tahiri”/ Reagimi, Spaho: Edi Rama po përgatitë lirimin e Saimir Tahirit!

Edi Ramës i duhet kohë për të vendosur nëse Saimir Tahiri duhet të hetohet. Këtë sejmenët e tij të Rilindjes e thanë me forcën e kartonit në Konferencën e Kryetarëve, ku kundërshtuan kërkesën e opozitës për Komision Hetimor ndërsa i dhanë përgjigje të gjitha atyre pikëpyetjeve: Pse Saimir Tahirit nuk ju vunë prangat, Pse u degdisën prokurorët e çështjes “Tahiri”, dhe, Pse institucione shtetërore bllokuan për rreth një vit hetimin parlamentar të Saimir Tahirit dhe Edi Ramës për trafikun e drogës.

Pas këtij vendimi në Konferencën e Kryetarëve, kryetari i Grupit Parlamentar të Partisë Demokratike, Edmond Spaho, duke reaguar ndaj këtij veprimi kriminal të mazhorancës sqaron:

“Pasi e bllokuan për gati një vit hetimin nga parlamenti të veprimeve të Saimir Sahirit dhe Edi Ramës për trafikun e drogës, duke mos na vënë në dispozicion asnjë dokument, kërkuan që të njihen me ndryshimet që ne kemi paraqitur në kërkesën për komision hetimor, megjithëse kërkesa është depozituar që në datën 1 Shkurt 2019. Ndryshimet tona nuk janë thelbësore. Ato kanë të bëjnë: Me kohën e hetimit, që nga 6 muaj, bëhet 3 muaj; Me numrin e deputetëve që nga 9, bëhet 11; Me ngushtimin e kohës për të cilën do të hetohet, nga e papërcaktuar, në 2014-2018. “

Skema për të zvarritur hetimin parlamentar për Saimir Tahirin dhe lidhjet e tij me trafikun e drogës është e njëjta që po ndiqet edhe në prokurori, thekson Edmond Spaho, duke shtuar se përtej show-t që ndiqni në ekrane për afate të reja hetimi apo ankesa fallso kundër prokurorisë, gjithçka është skemë. 
“Partia Demokratike ka paralajmëruar se Donika Prela, që duhet të ishte nën hetim për pastrim parash dhe favorizim të bandave, po bëhet gati të lirojë Tahirin nga akuza e drogës dhe, në rastin më të keq, do t’i ngarkojnë një akuzë banale, si shpërdorimi i detyrës,” paralajmëron kryetari i Grupit Parlamentar të PD ashtu si edhe vendimin e Edi Ramës që për të mbrojtur veten nga drejtësia ka vendosur çdo institucion në shërbim të Saimir Tahirit: 
“Ka vendosur parlamentin, ku zvarrit dhe i mohon opozitës të drejtën për komision hetimor. Ka vendosur prokurorinë, ku bëhet shoë me të vërtetën që shqiptarët e kanë mësuar prej kohësh: se Edi Rama, Saimir Tahiri, Vangjush Dako, Damian Gjiknuri dhe pjesa tjetër e bandës, kanë blerë zgjedhjet me paratë drogës.”  16  shkurt është dita që t’i japim fund kësaj maskarade dhe të bashkohemi, tha kryetari i Grupit Parlamentar të Partisë Demokratike, Edmond Spaho, për të mos lejuar asnjë nga këta bashkëpunëtorë të krimit të marrin peng të ardhmen tonë dhe të fëmijëve tanë, përfundon reagimin e tij.