Regjistrimi i popullsisë, ASK: Kosova tkurret 8%, rreth 1.6 milionë banorë

Kosova pritet t’i ketë 1.6 milionë banorë, ka bërë të ditur sot Agjencia e Statistikave të Kosovës, ASK, duke folur për një tkurrrje prej rreth 8 për qind në krahasim me regjistrimin e fundit të vitit 2011, kur ishin regjistruar 1.740.000 banorë.

Ushtruesi i Detyrës së Drejtorit ekzekutiv të ASK-së, Avni Kastrati, saktësoi se në këtë numër të popullsisë nuk është përfshirë diaspora pasi afati për regjistrimin e diasporës është shtyrë deri në gusht.

“Ne e dimë të gjithë që ka tkurrje të popullsisë, por ka edhe ndryshim edhe brenda Kosovës. Disa qytete janë rritur në mënyrë enorme, ndërsa disa janë zvogëluar,” tha Avni Kastrati duke sqaruar se tani fillon periudha e përpunimit, analizimit dhe shpërndarjes së të dhënave ndërsa të dhënat përfundimtare pritet të publikohen në pjesën e parë të muajit korrik.

“Të dhënat publikohen në pjesën e parë të muajit korrik, por në bazë të ditëve të fundit të mbarimit të procesit, edhe shtesa që ka qenë, pritet që Kosova t’i ketë rreth 1.6 milionë banorë.”

Ndryshe, procesi i regjistrimit të popullsisë në Kosovë nisi më 5 Prill dhe duhej të përfundonte më 17 maj, por u zgjat për shtatë ditë, pas kërkesave nga disa komuna për zgjatje të afatit.

Sipas Ligjit për regjistrimin e popullsisë, ekonomive familjare dhe banesave, çdo person mund të gjobitet nga 30 deri në 2 mijë euro, nëse refuzoi t’i japë informacionet e kërkuara nga regjistruesi. Këtu nuk përfshihen informacionet mbi përkatësinë etnike dhe fetare, të cilat nuk ishin të detyrueshme.