Regjistrimi i popullsisë, Kurti: Do na ndihmojë në orientimin e politikave më të mira

Takimi i sotëm i kryetarëve të komunave me kryeministrin Albin Kurtin, ministrin e Administrimit të Pushtetit Lokal, Elbert Krasniqi dhe përfaqësuesit e institucioneve tjera ka pasur kryefjalë nisjen e procesit të regjistrimit të popullsisë në Kosovë.

“Regjistrimi i popullsisë, ekonomive familjare dhe i banesave në Republikën e Kosovës ka filluar sot. Të dhënat mbi madhësinë, shpërndarjen dhe përbërjen e popullsisë, kushtet e jetesës e nivelet e edukimit do të na ndihmojnë në orientimin e politikave dhe shërbimeve më të mira për qytetarët neve si qeveri, juve si komuna dhe çdo institucioni,” tha Albin Kurti duke sqaruar se nisma e pyetësorit të dëmeve nga lufta në ekonomitë familjare është në shërbim të ruajtjes dhe mbrojtjes të kujtesës kolektive.

“Qytetarët do të mund të deklarojnë dëmet ekonomike, shumat e pronave të shkatërruara si dhe dëmet e njerëzve, familjarët e vrarë, të plagosur apo të burgosur. Kjo periudhë përkufizohet prej 28 shkurtit 1998 deri më 12 qershor 1999.”

Ndërsa Ministri i Administrimit të Pushtetit Lokal, Elbert Krasniqi, tha se regjistrimi i popullsisë është pasqyrë për shumë aspekte të mbështetjes sociale e ekonomike ndaj qytetarëve.

“Ky proces nuk është procedurë burokratike, është gurthemel i qeverisjes moderne dhe zhvillimit shtetëror. Duke regjistruar me saktësi informacionin demografik, do t’i shërbejmë më mirë qytetarëve tanë, do të promovojmë sigurinë publike si dhe të nxisim zhvillimin gjithëpërfshirës dhe të qëndrueshëm.”

Me këtë rast, Drejtori i Institutit për krimet e kryera gjatë luftës në Kosovë, Atdhe Hetemi, ka bërë thirrje të ndarjes së dokumenteve dhe dëshmive nga lufta.

“Duke punuar së bashku jo veç që nderojmë  të kaluarën dhe viktimat e saj, por gjithashtu ndërtojmë një të ardhme të ndritur të bazuar në të vërtetën historike dhe në drejtësi.”

Ndërkohë Ushtruesi i detyrës së Drejtorit të Agjencisë së Statistikave të Kosovës, Avni Kastrati, ka dhënë detaje nga pjesa dokumentuese e këtij procesi. 

“Gjatë regjistrimit do të ketë edhe një modul, ku janë pesë pyetje për dëmet e luftës. Kjo është nevojë sepse shtetet që dalin pas luftës e aplikojnë gjatë regjistrimit të popullsisë. Kroacia e ka pasur luftën disa vjet para nesh, e ka aplikuar në vitin 2011, për befasi e ka aplikuar edhe në vitin 2021.”