Rekordi i turizmit, Shqipëria kishte rritjen më të lartë të netëqëndrimeve në Europë

Shqipëria përjetoi në vitin 2023 ecurinë më të mirë të turizmit në histori.

Të dhënat paraprake tregojnë se mbi 10 milionë shtetas të huaj hynë në vend. Shqipëria u bë një destinacion i preferuar turistik për shumë të huaj, ndërsa mediat ndërkombëtare epërshkruan atë si një vend të bukur e çmime të lira.

Të dhënat e Eurostat për netëqëndrimet bëjnë të ditur se për treguesit e rritjes, Shqipëria ka lënë pas gjithë vendet e tjera të Europës. Psh, sipas tabelave të Eurostat, në tremujorin e tretë, net qëndrimet në njësitë akomoduese turistike u rritën me 60.6% në krahasim me të njëjtën periudhë të vitit 2022.

Edhe në raport me 2019-n, përpara fillimit të pandemisë, që ndërpreu përkohësisht vrullin e turizmit, net qëndrimet u rritën me gati 78%.

Kjo rritje është shumë më e lartë sesa mesatarja europiane, që në tremujorin e tretë pa një rritje me 0.7% të net qëndrimeve në krahasim me tremujorin e tretë 2022 dhe 0.8% në raport me të njëjtën periudhë të 2019-s. E dyta me rritjen më të lartë pas Shqipërisë në Europë është Serbia, me 25.4%. Të dhënat për Turqinë dhe Kosovën nuk janë të disponueshme.

Sipas statistikave të Eurostat, të përpunuara nga Monitor, tendenca e rritjes së net qëndrimeve në Shqipëri ka qenë e dukshme përgjatë gjithë vitit.

Për 10 mujorin, që janë të disponueshme të dhënat, rritja e net qëndrimeve në total në strukturat akomoduese në Shqipëri ishte 55.6% në krahasim me të njëjtën periudhë të 2022-t.

E dyta pas Shqipërisë renditet Malta, me një rritje prej 21% e ndjekur nga Qipro me 20.7% dhe Mali i Zi me 19.4% (shiko grafikun: Rritja e netëqëndrimeve totale, 10 mujori 2023/10 mujori 2022).

Gjithsej, Shqipëria shënoi 5.57 milionë net qëndrime të vendasve dhe të huajve në 10 muajt e 2023-t, nga 3.58 milionë në të njëjtën periudhë të 2022-t.

Vendi mban rekord edhe për rritjen e net qëndrimeve të turistëve ndërkombëtarë ( të huaj), me 3.65 milionë net qëndrime për janar-tetor, me turistët e huaj që përbënë 65% të totalit të net qëndrimeve në vend.

Edhe rritja e net qëndrimeve të të huajve, me gati 55% është më e larta në Europë. E dyta pas nesh renditet Sllovakia me 32.2%, Çekia 31.5%, Rumania 27.5%.

Europa
Sipas Eurostat, në vitin 2023, turizmi i Bashkimit Europian vazhdoi të tregojë shenja të rimëkëmbjes nga pandemia e COVID-19.

Numri i vlerësuar i netëve të kaluara në strukturat e akomodimit turistik në vitin 2023 arriti në 2.92 miliardë, duke tejkaluar nivelin e para-pandemisë për vitin 2019 (2.87 miliardë) me 1.6% dhe duke vendosur një vit rekord për sektorin e akomodimit të BE-së.

Në vitin 2023, u shpenzuan 171 milionë netë më shumë krahasuar me vitin 2022 (+6.3%), e nxitur kryesisht nga një rritje në netët e kaluara nga turistët ndërkombëtarë (+146 milionë) dhe në një masë më të vogël nga një rritje në netët e kaluara nga turistët vendas (+ 25 milionë). Nivelet e turizmit (përsa i përket netëve të kaluara) ishin 25% më të larta se dhjetë vjet më parë (2013: 2.33 miliardë netë të kaluara).

Krahasuar me vitin 2022, pothuajse të gjithë shtetet anëtare të BE-së shënuan rritje në vitin 2023, vetëm Luksemburgu regjistroi një rënie të vogël (-0,1%). Në Maltë dhe Qipro, rritja tejkaloi 20% dhe në 8 anëtarë të tjerë të BE-së, ajo kaloi 10% (Sllovakia, Letonia, Bullgaria, Austria, Çekia, Portugalia, Rumania dhe Greqia). Në shifra absolute, rritja më e madhe në netët e kaluara është vërejtur në Gjermani (+32.8 milionë netë) dhe Spanjë (+32.3 milionë netë).

Turizmi ndërkombëtar dhe vendas

Pas 3 viteve me një përqindje dukshëm më të ulët të turistëve ndërkombëtarë (përkatësisht 29%, 32% dhe 44% e të gjitha netëve të kaluara në 2020, 2021 dhe 2022), të huajt përbënin 46% të 2.87 miliardë netëve të kaluara në 2023. Kjo tregon një kthim të afërt në kontributin para pandemisë të turistëve ndërkombëtarë (47%). Megjithatë, për sa i përket vëllimit, turizmi ndërkombëtar ishte 0.4% më pak krahasuar me vitin 2019.

Përsa i përket akomodimit, hotelet dhe strukturat e ngjashme ishin segmenti dominues me 1.8 miliardë netë të shpenzuara (63% e totalit), të ndjekur nga akomodimet për pushime dhe akomodime të tjera afatshkurtra (24%). Kampingjet përbënin 13% të totalit./Monitor/