Rendi dhe siguria janë në duart e krimit, Berisha: Do shembim me shpejtësi narkoshtetin!

Me konstatimin se rendi dhe siguria janë në duart e krimit, Kryetari i Partisë Demokratike, Sali Berisha, duke prezantuar Progamin e Rendit dhe Sigurisë së PD-së u zotua se do shembet me shpejtësi narkoshteti.

Që në fillim të fjalë së tij, Kryetari i Partisë Demokratike siguroj se për PD-në, qeverinë e saj, rendi dhe siguria do të jenë përparësia absolute më madhore.

“Së pari, dëshiroj t’u përshëndes ju përzemërsisht, të përshëndes të gjithë ish-anëtarët e forcave të Policisë së Shtetit, të cilët qëndruan në përputhje me detyrën, virtytin dhe ligjin kundër krimit të organizuar për sigurinë dhe rendin.
Përshëndes po ashtu ata anëtarë të policisë që sot bëjnë çdo përpjekje për të zbatuar ligjin në kushtet më të jashtëzakonshme.
Përshëndes të gjithë anëtarët e departamentit për të gjithë këtë program që kanë hartuar për rendin dhe sigurinë.
Dhe ju siguroj se për PD-në, qeverinë e saj, rendi dhe siguria do të jenë përparësia absolute më madhore.
Në një narkoshtet, siç është Shqipëria, i pari dhe i vetmi në Europë, Europa ka pasur lloje të ndryshme shtetesh demokratike, ka pasur diktatura naziste, staliniste, teokratike, junta ushtarake, por nuk ka pasur kurrë narkodiktaturë, nuk ka pasur kurrë narkoshtet.
Ndaj dhe një nga shtyllat kryesore të programit tonë, ne kemi përcaktuar pastrimin e shtëpisë sonë si kusht i domosdoshëm për një Shqipëri Madhështore.
Si kusht i domosdoshëm për një Shqipëri në të cilën jeta e individit, veprimtaria e tij të jenë të garantuara, të sigurta. Në të cilën investitorët e huaj të vijnë të sigurt në Shqipëri për të vendosur investimin e tyre, ëndrrën e jetës së tyre, çka sot jemi në një situatë krejt të kundërt.
Jemi në një situatë ku për fatin më të keq, rendi dhe siguria janë tërësisht në duart e krimit. Ku në qeveri ka ministra që janë marrë me porosi vrasjesh. Ka ministra që janë marrë me benefite nga trafiku i drogës.
Vetë kryeministri është një padrino që mban koordinator për veprimtarinë e bandave.
Vetë kryeministri është shndërruar në kryebashkëpunëtorin e organizatave kriminale më të fuqishme shqiptare, të cilave po u krijon mundësinë e artë të investimit të miliarda eurove të tyre në Shqipëri, në këto kulla që mbijnë dhe tani që do fillojnë të përhapen në qytete të tjera.
Në këto kulla, të cilat janë monumentet më të shëmtuara të drogës dhe krimit. E vërteta është se sot në krye të Policisë së Shtetit është një bashkëpunëtor i bandave, një i emëruar i tyre. Ky drejtor Matriksi, edhe dje arrestuan një bashkëpunëtor të tij trafikant dhe u bë reprezalje tek oficerët e policisë që e arrestuan atë për lirimin e tij.
Rendi dhe siguria në Shqipëri janë absolutisht në duart e krimit. Krimi urdhëron emërimin e drejtorëve, shkarkimin e tyre. Krimi emëron deputetët. Siç Çyrbja ka shumë e shumë Çyrbe të tjera. Krimi urdhëron emërimin e ministrave. Në të vërtetë, kurrë ndonjëherë në Europë nuk ka pasur një regjim sipërmarrje e përbashkët mes pushtetit dhe krimit siç është kjo në Shqipëri,” tha Sali Berisha duke premtuar se nga Policia e Shtetit dhe administrata shtetërore do të largohen të gjithë ata që janë të inkriminuar.

:Por është bindja ime e pandryshueshme se ka shumë punonjës të zbatimit të ligjit, të cilët mezi presin të bëjnë ligjin, të lejohen të bëjnë ligjin.
Të cilët kanë të gjithë aftësitë e tyre për t’i dhënë përgjigjen më dërrmuese bandave dhe kriminelëve, guximi i të cilave, pushteti i të cilave buron nga zyra e Edi Ramës, Taulant Ballës, Hoxhës, Prodës, etj.
Ata sot me hijen e krimit trembin qytete dhe qytetarë, por i garantoj që nesër, kudo që të jenë, edhe në shpellat më të largëta të këtij planeti, do gjenden dhe do marrin ndëshkimin që meritojnë.
Zero tolerancë ndaj krimit të organizuar.
Por kjo betejë do nisë me krimin qeveritar. Do nisë me ministrat, bashkëpuëntorë të kriminelëve, mburojë e kriminelëve. Sepse janë këta ministra, të cilët faktikisht u kanë vënë atyre në dispozicion pushtetin.
Janë këta ministra që u vënë atyre në dispozicion gjykatësit, prokurorët, drejtorët e policisë.
Ndaj dhe beteja jonë do jetë me një motiv: zero tolerancë. Kudo që të jenë, ta kenë të qarta, në Dubai apo Uganda, në Aruba apo Afrikë të Jugut, ata do gjenden, do arrestohen dhe do vihen para drejtësisë shqiptare. Investimi i tyre në Shqipëri është shkatërrimtar për ekonominë shqiptare.
Të dashur miq, këto kulla që shihni këtu, këto punësojnë, por këto kulla shkatërrojnë dhjetëra mijëra vende pune. Këto shkatërrojnë dhjetëra mijëra vende pune sepse këto ndërtohen me narkoeuro dhe këto narkoeuro zhvlerësohet si në asnjë vend tjetër të Europës, zhvlerësohet me 35 përqind.
Nuk ka ndërmarrje eksporti që mund të ketë fitimin më shumë se 25 përqind.
Faktikisht, vetëm me goditjen që marrin nga narkoeurot, ata u vënë çelësat dhe janë mijëra e mijëra punëtorë.
Dhe kreu i narkoshtetit, kreu i organizatës kriminale Edi Rama u thotë atyre se ju jeni industri e botës së tretë, në një kohë kur ato janë prodhim dhe krenari kombëtare.
Në një kohë kur në këto sipërmarrje ushqehen mijëra familje shqiptare, kurse kullat janë mollë e ndaluar për 99 përqind të shqiptarëve. Me çmimet e tyre stratosferike ato mund të blihen vetëm nga trafikantët.
Shqipëria është sot vendi në të cilin narkoshteti ka pasur efektet më shkatërrimtare se çdo pushtim dhe çdo diktaturë.
1 milion e 99 mijë shqiptarë janë larguar nga Shqipëria për shkak të varfërisë dhe papunësisë. Asnjë pushtim, asnjë luftë, asnjë faktor nuk ka arritur të largojë më shumë në 10 vite sa ka arritur narkoshteti me efektet e tij.
Ka një binom që rrënon çdo ditë jetën ekonomike të shqiptarëve, por edhe shpresën, edhe besimin e tyre dhe ky binom përbëhet nga korrupsioni dhe krimi, krimi dhe korrupsioni.
Ndaj dhe ne do ndërmarrim me vendosmërinë më të madhe luftën me zero tolerancë ndaj krimit dhe korrupsionit.
Këto dy faktorë bëjnë jetën e shqiptarëve të pasigurt dhe mbjellin pasiguri tek çdo qytetar. Këto dy faktorë varfërojnë progresivisht shqiptarët.
Këto dy faktorë detyrojnë shqiptarët të largohen nga Shqipëria dhe ata që mbeten, mbeten në pasiguri të plotë. Këto dy faktorë janë të lidhur organikisht me njëri-tjetrin. Nuk ndodh kurrë kjo që ndodh me paratë publike në Shqipëri.
Nuk ndodh që një ministër të shpenzojë për larjen e makinës së saj 10 mijë euro në muaj. Ajo nuk ka një qelizë njerëzie se po të kishte, nuk do i lejonte vetes që të bënte një shpenzim të tillë kur pensionistët numërojnë kafshatën. Ajo nuk mund ta bënte kurrë një akt të tillë në një kohë kur në spitale, të sëmurët nuk vdesin nga sëmundja, por nga mungesa e ilaçeve.
Gjer këtu ka arritur zhveshja nga çdo sentiment që qeverisin sepse ata vjedhin çdo ditë.
Por e thashë dhe e them prapë, nuk mund të ketë asnjë mëdyshje se ne do i japim përgjigjen më të merituar kësaj situate. Nga organet e Policisë së Shtetit do të largohen që të gjithë ata që janë të inkriminuar. Dosjen me 1 milion faqe të ardhura, të bisedave telefonike që dëshmojnë lidhjet e tmerrshme të krimit me politikën do zbardhen dhe do bëhen publike në mënyrë që shqiptarët të ndahen nga bota e krimit. Të ndahen nga droga dhe t’i rikthehen ligjit, t’i rikthehen të drejtave të tyre, t’i rikthehen vendit të tyre dhe shpresës.
Nga administrata shtetërore do dalin para ligjit të gjithë ata të cilët kanë mbajtur lidhje me krimin si dhe të korruptuarit. Kjo është një luftë për ekzistencën e Shqipërisë, nuk është një luftë për karrigen e askujt.
Kjo është luftë për ekzistencën e këtij kombi,” tha lideri i opozitës duke rikujtuar se oficerët e policisë u ndëshkuan se u përballën me krimin dhe ata do të marrin përsëri vendin që meritojnë.

“Edi Rama kërkon një mandat të katërt pasi në 12 vite të qeverisjes së tij janë larguar më shumë shqiptarë nga trojet e tyre se nga të gjitha pushtimet, përfshi pushtimin serb.
Nuk ka arritur pushtimi serb të largojë nga Kosova në 12 vite sa largoi ky nga Shqipëria.
Një reformë tërësore, e cila është parashikuar në program, të cilën do e plotësoni me mendimet tuaja, me idetë tuaja, do të ndërmerret. Të gjithë ju, subjekt i padrejtësive të mëdha ligjore që janë bërë, do merrni vendin që meritoni. Ju u ndëshkuat se u përballët me krimin. Ju u ndëshkuat për t’i hapur rrugën krimit.
Do mbetet ditë e zezë në historinë e këtij institucioni, kur një vagabond, një delinkuent si Saimir Tahiri, shpallte shkrirjen e policisë kriminale se kishte kapur prindërit e tij teksa bënin kontrabandë. Dhe i hapte rrugën krimit, skafeve dhe trafiqeve të tij personale, familjare. Ky ishte fillimi i Edi Ramës, i qeverisjes së Edi Ramës. Në aktin më të parë hapi portat në të katër anët për krimin dhe trafiqet.
Por e drejta për ju do vendoset me vendosmëri dhe duhet të jeni krenarë për detyrat që keni kryer.
Gjykatësit dhe prokurorët që u përballën dhëmb për dhëmb me krimin dhe u larguan nga detyra me vetingun gjueti shtrigash, ata që dhanë dënime përjetë për bandat e qeverisë socialiste, ata janë sot jashtë institucioneve si hakmarrje për ta.
Të gjitha këto, marrin fund! Unë besoj plotësisht tek ju. Besoj plotësisht tek burrat dhe gratë, tek institucionet, në Policinë e Shtetit, në prokurori, në gjykata, që kanë vullnet të zbatojnë ligjin. Në këtë mënyrë të zbatojmë narkoshtetin me shtetin ligjor.
Të rikthejmë respektin e plotë të lirive dhe të drejtave të qytetarëve shqiptarë dhe garantimin e tyre. Garantimin e sigurisë së tyre.
Sot burgjet e tyre janë në shumë aspekte tejkalojnë burgjet e kohës staliniste, e kohërave më të egra.
Unë po vij nga Këshilli i Europës, bëra një denoncim shumë të fuqishëm në Komitetin e Antitorturës.
Çfarë ndodh? Njëri pas tjetrit lajmet, vdiq filani, 28 vjeç, vdiq tjetri 32 vjeç nga vdekje natyrale. Nuk ka vdekje natyrale për një 28 vjeçar apo për një 32-vjeçar. Këto janë të gjitha fshehje të krimeve që ndodhin në këto institucione, ku vetë ministri, vetë Uluziu merret direkt me akte të ulëta, provokime pa asnjë lloj koncepti për dinjitetin njerëzor. Kudo që të jetë, cilido që të jetë, ai ka dinjitetin e tij. Duhet të ketë sigurinë e tij,” tha Berisha dhe përveç premtimit për rritjen e rrogave në mënyrë progresive, bëri dhe betimin solen për shembjen me shpejtësi të narkoshtetit

“Kështu që ju siguroj se një transformim rrënjësor do të ndodhë në fushën e rendit dhe sigurisë me besim të plotë se kjo do të jetë një nga reformat më të suksesshme.
Sot në mëngjes më merrte një mik i imi në telefon, kishte një problem me një konsulent ndërkombëtar.
Nuk më erdhi, tha. I kishte thënë familja se nuk mund të shkosh se është vend i pasigurt.
Imagjinoni pra investitorët. Asnjë investitor i huaj serioz nuk vjen. Nuk vjen ai se nuk konkurron dot me asgjë për arsye se kontejnerët me euro shkatërrojnë çdo konkurrencë këtu.
Rrogat, trajtimi do jenë përparësi e madhe për Policinë e Shtetit dhe organet e tjera të zbatimit të ligjit.
Edhe për Shërbimin Informativ, vetëkuptohet.
Nuk mund të ketë Shërbimi Informativ një drejtuese që është shkarkuar për dyshime shumë të forta në vendin e vet. Dhe pikërisht për ato dyshime, emërohet në krye të SHISH, për shkak të vëllazërisë Vuçiç-Rama.
Me këtë rast u bëj thirrje të gjithë punonjësve të Shërbimit Informativ që të distancohen nga çdo veprim dhe inkriminim, nga çdo politizim në interesin më të mirë të tyre dhe të vendit të tyre. Se ajo me datën 13 ia mbath, nuk është më. Nuk mund të jetë se ajo nuk mund të emërohej kurrë në atë detyrë. E shkarkuar nga qeveria e vet për dyshime shumë serioze, bashkëpunime dhe të tjera. Vjen dhe merr me porosi të Vuçiçit, drejtimin e SHISH.
Rrogat do rriten progresivisht të të gjithë punonjësve të policisë, veçanërisht të niveleve inspektorit, të komisarit, në mënyrë që të ngushtojmë hendekun që është krijuar edhe në polici mes rrogave të larta dhe rrogave të ulëta.
Nuk është ky koncept në botën e qytetëruar, në botën e lirë. Jo, është tjetër. Midis presidentit të SHBA dhe rrogëmesmit ekzistojnë gjithsej 4 herë diferenca, maksimumi 5, asnjëherë më shumë. Kurse këtu është 10-11 herë. Kjo situatë merr fund.
Ju do pajiseni me teknologjinë më moderne, me mjetet më të mira, më të domosdoshme për të bërë ligjin dhe vendosur rendin dhe sigurinë. Do keni çdo mbështetje për t’u përballur me krimet e reja, krimet kibernetike dhe krimet e tjera, të cilat zhvillohen gjithnjë në kushtet e reja,” tha Kryetari i Partisë Demokratike, Sali Berisha, ndërsa prezantoi Programin për Rendin dhe Sigurinë në PD, duke përfunduar:
“Bindja ime është se me shpejtësi do të shembim narkoshtetin, do të rivendosim shtetin ligjor dhe brenda një kohe rekord do vendosim para ligjit të gjithë ata të cilët ndërtuan këtë shtet, këtë antishtet apo këtë shtet droge dhe krimi, i pari dhe i vetëm në ligjor.
Shteti ligjor është kushti i të gjitha kushteve për integrimin në BE.
Ju do jeni në partnerë të denjë të organeve ligjzbatuese të vendeve partnere. Dhe do shndërroheni, njëlloj siç ishit, në institucion të fuqishëm me kontribute të mëdha në procesin e integrimit evropian të Shqipërisë. Ishte para së gjithash puna juaj e shkëlqyer që bëri të mundur liberalizimin e vizave.
Ishte puna juaj e shkëlqyer arrestimi dhe asgjësimi i mbi 200 bandave në një hark kohor 18 mujor që hapi dyert e NATO-s për Shqipëri.
Jam i bindur se do jetë puna juaj e shkëlqyer, puna e organeve ligjzbatuese, e policisë, e drejtësisë, e SHISH, ato të cilat do të rikthejnë besimin e plotë të shqiptarëve tek Shqipëria, tek rendi, tek siguria dhe të partnerëve tanë tek Shqipëria, do përshpejtojnë procesin e integrimit në Europë.”