Rëndohet situata, PD takon fasonët në Krujë: Qeveria refuzon të na takojë. S’kemi mbështetje, vetëm kurthe dhe gjoba!
Pas situatës së rënduar në Krujë, ku përhapja e virusit nga një fasoneri ka prekur 114 persona në më pak se dy javë ndërsa përfaqësuesit e qeverisë dhe deputët e zonës nuk kanë pranuar të takohen me Shoqatën e fasonëve të Krujës, Përfaqësuesit e Partisë Demokratike u takuan me shoqatën e këtij biznesi ku është vendosur numri më i madh i fasonerive në vend, ku u informuar me situatën e krijuar me shpërthimin e pandemisës, heshtjen e qeverisë për këtë situatë ndonëse ata i kishin dërguar 4 herë kërkesa qeverisë që prej 23 marsit, por askush nuk u ka kthyer përgjigje.
“Deri tani, qeveria ka menduar vetëm të na ngrejë kurthe për të na gjobitur, në mënyrë që ne t’i mbyllim vetë fasoneritë dhe t’i paguajmë vetë punonjësit pa asnjë ndihmë prej tyre. Na vendosin protokolle sigurie të pazbatueshme, pa marrë parasysh që punonjësit nuk punojnë dot me doreza, linja e prodhimit dëmtohet nga vendosja e makinerive larg njëra-tjetrës dhe pastaj na vendosin gjoba 5 milionë, 7 milionë për të na e bërë të pamundur punën, duke na çuar drejt mbylljes së detyruar pa marrë asgjë përsipër për punonjësit,” u shprehën të shqetësuar përfaqësuesit e fasonëve në Krujë ndërsa shprehën gatishmërinë për të mbyllur aktivitetin e tyre deri në një moment, por kërkojnë që qeveria të paguajë punonjësit.
Ndryshimi kaotik i kushteve që duhet të plotësojnë dhe gjobat janë i vetmi reagim i qeverisë për këto fasoneri, që punësojnë mbi 5 mijë gra dhe vajza nga Kruja dhe zonat përreth.
Përfaqësuesit e Partisë Demokratike siguruan fasonët se kanë mbështetjen e opozitës për çdo kërkesë që vë të parin shëndetin e punonjësve dhe pagesën e tyre, duke theksuar se ky është një detyrim ligjor i qeverisë.
Ndryshe përfaqësuesit e PD, Albana Vokshi, Orjola Pampuri, Çlirim Gjata dhe Gent Strazimiri biseduan me biznesin fason pas kërkesës së tyre për të diskutuar me përfaqësuesit e qeverisë, parlamentit dhe të opozitës çështjet kryesore që ndihmojnë këtë biznes të mos falimentojë nga mungesa totale e mbështetjes së qeverisë.
