RENEA në Vlorë, SPAK zbardh vrasjen e Gentian Qarrit, lëshon 7 urdhër arreste
Prokuroria e Posacme godet grupin kriminal të drejtuar nga Ines Hajrulla që vepron në zonën e Ujit të Ftohtë në Vlorë. Në finale të hetimeve disa mujore, prokurori i posaçëm Vladimir Mara ka firmosur shtatë urdhër arreste ndaj të dyshuarve për ngjarje të rënda kriminale si atentate mafioze apo trafik droge.
Burimet thonë se është firmosur urdhër arrest për Hajrullën dhe krahun e tij të djathtë Ervis Matodashaj, të akuzuar për vrasjen e Gentian Qarrit mbrëmjen e 6 shkurtit 2021 në Vlorë.
Aksioni I RENEA-s për arrestimin e tyre nuk dha rezultat, por për disa orë me radhë u ushtrua kontroll në zonën e quajtur “7 Pallatet Oslo” ku në një ambient janë gjetur dhe sekuestruar një numër I madh celularësh dhe sende të tjera. Ines Hajrulla konsideroeht një prej njerëzve më të rëndësishëm të botës së krimit në Vlorë që prej kohës kur mori drejtimin e grupit kriminal të Edison Harizaj i njohur si Edison Faqedjeguri, i cili u ekzekutua në një atentat mafioz në 2018 në Durrës.
Në të njëjtën dosje, prokurorët e posaçëm kanë firmosur dhe 5 urdhra të tjerë arrestesh mes tyre dhe për Flodian Plakun I njohur si Pole Qorri. Të gjithë janë të arrestuar në Shqipëri dhe Itali për krime të ndryshme, ndërsa Plaku akuzohet për vrasjen e Gentian Bejtjas në oborrin e shtëpisë së tij në Larushk të Fushë Krujës.
Burimet konfirmojnë se ndaj Pole Qorrit është ngritur akuza e re e trafikut të drogës.
Goditja e grupit kriminal është bërë pas analizimit të të dhënave në aplikacionin e koduar në Sky ECC. Hetimet janë duke vijuar edhe për ngjarje të tjera kriminale që dyshohet të kenë kryer nga i njëjti grupim kriminal.
Ndryshe, Gentian Qarri, një ish i dënuar në Itali me 11 vite burgim për trafik droge u ekzekutua në lagjen 29 Nëntori në Vlorë, 6 shkurtin e vitit 2021. Motivi dyshohet përplasja e grupeve kriminale në trafikun e kokainës.
Pamjet filmike të sekuestruara nga Prokuroria e Vlorës, tregojnë se autorët kanë pritur për rreth 10 minuta në rrugë, derisa ai të dalë nga ambjentet e një gomisterie aty pranë, dhe të shkojë në lokal.
Automjeti “Toyota Yaris”, ku qëndronin autorët ka lëvizuar pak para se të qëllonin me armë. Pranë ka kaluar një makinë policie, ndaj ata janë detyruar të largohen për tu rikthyer brenda pak çastesh, duke pritur që të dilte objektivi i tyre, Gentian Qarri ose siç thirej ndryshe në Vlorë me nofkën “Gëçe”. Ndaj tij është qëlluar me 20 plumba 6 prej të cilëve në trup.
Nga pamjet filmike të administruara nga policia duket se ndaj tij është qëlluar me automatik nga brenda automjetit tip Toyota Yaris që ishte në lëvizje.
