Replika pa nivel, Rama: Është kapur pas Covidit si i mbyturi pas fijes së barit, Basha: E ke mendjen te sulmet politike!
Pas shqetësimit të shprehur të Kryetarit të Partisë Demokratike, Lulzim Basha, mbi numrin e të infektuarëve me COVID-19 që po rritet dhe fataliteteve që po shtohen dhe thirrjes drejtuar Kryeministrit që të ndëmarrë veprime të shpejta për të përballuar pasojat e pandemisë, Edi Rama nuk iu përgjigjë këtijë shqetësimi për të mohuar ose dëshmuar mobilizimin qeveritar, por bëri atë që bënë më së miri:
“Lulëzim Basha është kapur pas Covidit si i mbyturi pas fijes së barit dhe pretendon se ai do ta kishte ndaluar valën e dytë, ndërkohë që nuk ndalon dot as aleaten e tij në fushatën e saj për përhapjen e Covidit,” thekson Edi Rama në reagimin e tij përmes rrjetit social Twitter duke përfunduar:
“Mirë u çmendën po pse të gjithë njëherësh, thoshte Shvjeku i shkretë!”
Nuk vonoi shumë dhe Lulzim Basha vazhdoi replikat me Kryeministrin e Twitterit duke theksuar se Edi Rama e ka mendjen tek sulmet politike në vend që të japë para për testimet, ilaçet dhe ata që s’kanë mundësi ekonomike.
“Gjendja po përkeqësohet. Për shkak të Ramës, njerëzit presin me ditë për tu testuar, nuk kanë lekë për ilaçet e dergjen të sëmurë në shtëpi. Shëndeti dhe pamundësitë ekonomike janë shqetësimi i çdo shqiptari sot. Por në vend që të japë para për testimet, ilaçet dhe të pamundurit,” tha Basha në përgjigjen drejtuar Kryeministrit Edi Rama duke përfunduar:
“Rama e ka mendjen tek sulmet politike, ndërkohë që vazhdon të paguajë miliona për inceneratorët dhe tenderat korruptivë. Edhe sa njerëz duhet të vdesin për fajin e Ramës???”
E meqë Kryetari i Partisë Demokratike, Lulzim Basha, pranoi lojën e Edi Ramës përmes Twitter, ky njeri që pjesën më të madhe të orarit të punës e kalon në rrjetet sociale, i ktheu edhe përgjigje menjëherë liderit të opozitës:
“Sipas Lulëzimit plehrat duhet të bëhen kapicë në çdo rrugë të Tiranës që njerëzit të mos preken nga Covidi dhe mund të kurohen! Jo Lulëzim, plehrat nuk kthehen më në Tiranë, as opozita nuk kthehet më në qeveri me lojën jepi votën PD e merr Monikën&IlIrin në tallavanë e bashkimit!”
Reagim i radhës të cilit nuk i mungoi përgjigja e liderit të opozitës:
“Shto testimet, rimburso ilaçet për pacientët në shtëpi,shto kapacitetet mjekësore.Ndal së vjedhuri dhe jepi lekët shqiptarëve që sot ju duhet ndihmë dhe jo llafe. Sulmet politike dhe aleanca e plehrave nuk e mbulojnë dot dështimin tënd. Asgjë nuk vlen më shumë se jeta e njerëzve!”
Ndryshe, replikat e këtij niveli të turpshëm që do ti kishte zili edhe niveli mesatar, filluan pasi Kryetari i Partisë Demokratike, Lulzim Basha, e ngriti shqetësimin mbi situatën e krijuar me COVID-19, ku numri i të infektuarëve po rritet, fatalitetet po shtohen dhe sistemi shëndetësor po shkon drejt kolapsit ndërsa i bënë thirrje kryeministrit Edi Rama që të ndëmarrë veprime të shpejta për të përballuar pasojat e pandemisë.
