Reporterët pa Kufij: Televizioni serb N1 nën sulme sistematike shpifëse

Organizata, Reporterët pa Kufij i ka kërkuar Qeverisë serbe që të “ndalë mbështetjen dhe të dënojë publikisht” ato që organizata i cilëson si “sulme sistematike shpifëse” kundër gazetarëve të televizonit TV N1.

Grupi me bazë në Paris thekson sot përmes një deklarate se N1, të cilin e ka përshkruar si “televizionin e vetëm të pavarur në Serbi” ka qenë subjekt i sulmeve të qeverisë dhe mediave pro-qeveritare në javët e fundit.

“Qëllimi i kësaj fushate, që është bazuar në deklarata dhe spekulime diskriminiese dhe ofenduese, është që të frikësojë këta gazetarë”, ka thënë udhëheqësja e Reporterëve pa Kufij për Bashkimin Evropian dhe Ballkanin, Pauline Ades-Mevel.

Gazetari i TV N1, Miodrag Sovilj, aktualisht është “shënjestër e shpërthimeve të pashembullta të zemërimit publik që është nxitur nga aleatët e presidentit dhe mediat pro-qeveritare”, thekson kjo organizatë.

Mediat pro-qeveritare kanë thënë se shëndeti i presidentit serb, Aleksandar Vuçiq është përkeqësuar javën e kaluar, për shkak të pyetjeve që i bërë Sovilj, raporton RFE.

Vuçiq është shtruar në spital më 15 nëntor për shkak të probleme me zemër dhe është liruar tri ditë më vonë.

Kjo organizatë theksonë se që nga 18 nëntori, gazetari është përballur me tentime për ta njollosur, pasi mediat në Serbi kanë shfrytëzuar disa fotografi duke e përshkruar atë si të varur nga alkooli dhe droga.

Reporterët pa Kufij shprehen se situata është shqetësuese në Serbi, e cila është renditur e 90-ta nga 180 shtete në Listën për Liri të Mediave në botë.

Vuçiq është president i Serbisë nga viti 2017. Ai është përballur me akuza për kufizim të lirisë së mediave dhe demokracisë.