Republika Maqedonia Veriore – firmoset marrëveshja historike
Maqedonia dhe Greqia kanë firmosur marrëveshjen mbi zgjidhjen e çështjes së emrit. Emri i ri i FYROM do të jetë Republika Maqedonia Veriore.
Marrëveshja është firmosur në pjesën greke të Prespës nga ministrat e jashtëm Nikolla Dimitrov dhe Nicos Kotsias në prani të dy kryeministrave, Zoran Zaev dhe Alexis Tsipras.
Me rastin e firmosje së kësaj marrëveshje, e me ftesë të kryeministrave të Greqisë dhe Maqedonisë, prezent ishin edhe Përfaqësuesja e lartë për Politikë të Jashtme dhe Siguri pranë BE, Federica Mogherini, Komisioneri për zgjerimin Johannes Hahn dhe ndërmjetësi ndërkombëtar i OKB në negociatat mes Athinës dhe Shkupit, Methju Nimitz.
Me këtë rast kryeministrimaqedon, Zoran Zaev tha se shteti i tij është krenar që ka zgjedhur, zgjidhjen e cila na bashkon.
“Jemi krenar me këtë marrëveshje. Jemi krenar sepse po bashkohemi rreth zgjidhjes së kontestit i cili na ka ndarë dhe që kemi përzgjedhur zgjidhjen e cila na bashkon. Me firmosjen e kësaj marrëveshje përfundimtare mbi zgjidhjen e çështjes së emrit dhe partneritetit strategjik të vendeve tona, kemi lëvizur malet,” tha Zaev duke shtuar se ky akt solemn është shprehje e përkushtimit në gjetjen e zgjidhjes e cila është në interes të së ardhmes së qytetarëve të dy vendeve.
“Morëm leksion se duhet të mësojmë nga historia, dhe jo ta përsërisim. Në themelet e së kaluarës, po ndërtojmë të ardhmen,” përfundoi kryeministr maqedon.
Ndërsa Kryeministri i Greqisë, Alexis Tsipras nga ana e tij duke garantuar se kemi të bëjmë me një marrëveshje në të cilën shihet fryma patriotike e dy palëve, kërkoi nga qytetarët që të lexojnë marrëveshjen pa paragjykime, dhe, shtoi:
“Duam të bëjmë një hap për të harruar plagët e të kaluarës, jo vetëm për vendet tona por edhe për Evropën, për të shkuar përpara drejtë një të ardhme më të mirë. Kjo do të vëjë themelet e një epoke të re. Unë me Zaevin vendosëm të tejkalojmë vështirësitë. Dua të falënderoj OKB dhe Nimitz që 25 vite po bënë përpjekje që të zgjidh çështjen. Nuk mund të ndodhte në një moment më të mirë, sepse sot është ditëlindja e Nimitzit,” tha kryeministri grek Tsipras.
Pas ceremonisë, delegacionet janë nisur drejtë pjesës maqedone të Prespës, ku sipas agjendës, pak para mesditës ata në Oteshevë do të kenë edhe një drekë të përbashkët.
