Reshje bore në Dibër dhe Korçë, ARRSH: Akset kombëtare janë të hapura por kujdes…

Reshjet e borës u rikthyen gjatë natës dhe vazhdojnë edhe sot në veri dhe në juglindje. Prej orëve të para të mëngjesit, në Qarkun Dibër dëbora ka arritur trashësinë deri në 15 centimetra në zonat e thella. Në Bulqizë e Peshkopi dëbora shkon deri në 5 centimetra ndërkohë situatë problematike paraqitet në aksin rrugor Bulqizë – Qafa e Buallit edhe për shkak të erës së fortë.

Borëpastrueset kanë punuar gjatë gjithë natës por Policia Rrugore e Qarkut Dibër këshillon drejtuesit e mjeteve të bëjnë kujdes gjatë lëvizjes pasi temperaturat pritet të zbresin nën zero. Ndërkohë kujdes i shtuar kërkohet edhe për akset nacionale Ura e Çerenecit – Librazhd dhe Peshkopi – Qaf Drajë – Kukës.

Ndërkohë, probleme ka edhe në Qarkun Korçë ku dëbora arrin deri në 5 cm por kalohet me vështirësi në disa akse rrugore. Ne rrugen e Dardhës bora shkon nga km 8 – km 14 por rekomandohet kalimi i mjeteve me zinxhire ose goma dimërore. Vështirësi ka edhe në aksin rrugor të Biglles në rrugën e Doganës Goricë ndërsa kërkohet kujdes nga drejtuesit e mjeteve në kushtet e lagështisë së madhe në rrugë.

Ndërkohë Autoriteti Rrugor Shqiptar raporton se gjatë natës dhe mëngjesin e sotëm reshje bore ka në veri dhe në juglindje. Akset kombëtare janë të hapura dhe qarkullimi bëhet pa zinxhir. Drejtuesit e mjeteve të tregohen të kujdesshëm, sidomos gjatë natës dhe në orët e para të mëngjesit, të reduktojnë shpejtësinë, të respektojnë sinjalistikën.

Reshje bore me intensitet të ulët po bie në Pukë-Fushë Arrëz-Kukës dhe në Dardhë-Voskopojë por ARRSH raporton se mjetet janë në terren dhe po bëjnë shpërndarjen e kripës dhe pastrimin e akseve. Nuk ka probleme me qarkullimin në të gjitha akset.

OSHEE raporton se nga rreshjet e bores dhe lagështira janë krijuar disa probleme me energjinë elektrike në fidrat qe mbulojne zonën e Vithkuqit, Petrushës dhe Zvezdës së bashku me fshatrat rreth tyre. Grupet e punes jane ne terren dhe po punojne per eliminimin e defekteve.