Reshje intensive shiu, përmbytje, evakuime, rënie gurësh në rrugë

By Pa frike Last updated Jan 6, 2026 1 660

Reshjet intensive që kanë përfshirë Durrësin dhe pjesën më të madhe të vendit prej disa orësh kanë sjellë përmbytje në një sërë rrugësh, duke vështirësuar qarkullimin e automjeteve dhe lëvizjen e qytetarëve.

Situata paraqitet problematike në rrugën “Taulantia”, në rrugën “Mars 91”, e njohur edhe si aksi paralel me portin, si dhe në zonën pranë stadiumit në lagjen 18.

Probleme të ngjashme raportohen edhe në rrugën pranë shkollës “Qemal Mici” në lagjen 16, në zonën e Shkozetit dhe në disa pika të tjera të qytetit.

Prefekti i qarkut Durrës, Emiljan Jani, tha se dhe pse hidrovoret janë në funksionim të plotë situata mbetet e rënduar në shumë zona të Durrësit, ndërsa rekomandohet që të shmangen lëvizjet deri në qetësimin e situatës. Nxënësit dhe mësuesit janë njoftuar për pezullimin e mësimit.

Ndërkohë një familje nga zona e Ish-Kënetës është evakuuar në Shtëpinë e Pushimit të Ministrisë së Brendshme në plazhin e Durrësit, pasi banesa e saj është përmbytur.

Mësohet se situatë e rënduar paraqitet edhe në autostradën Durrës-Tiranë ku disa automjete janë fikur e paraqesin probleme për shkak të pranisë së lartë të ujit në disa segmente të këtij aksi të rëndësishëm rrugor.

“Në rrugën interurbane që lidh Tiranën me Durrësin, në zonën pranë karburantit në hyrje të Durrësit, ka prezencë të lartë të ujit në të dyja anët e lëvizjes, gjë që e bën të pamundur qarkullimin normal të mjeteve.
Për të shmangur trafikun dhe aksidentet, Policia Rrugore njofton se do të devijohet lëvizja si më poshtë: Automjetet që vijnë nga jugu në drejtim të Tiranës, të qarkullojnë nga Rruga e Plepave për në Ndroq dhe nga rruga “Rrogozhinë–Elbasan–Tiranë”. Për në Durrës, kalimi do të bëhet nga rruga e universitetit, në drejtim të Spitallës dhe në rrugën Tiranë–Elbasan–Rrogozhinë” thekson Policia përmes një njoftimi.

Reshjet e dendura të shiut që kanë rënë gjatë natës kanë sjellë problematika edhe në disa zona të qytetit të Lezhës. Më problematike paraqitet situata në lagjen “Besëlidhja”, si edhe në disa hyrje shkollash, ku niveli i ujit ka arritur disa centimetra, duke vështirësuar qarkullimin e këmbësorëve dhe mjeteve.

Grumbullimi i ujit është pasojë e reshjeve intensive, ndërkohë që nuk raportohen dëme. Megjithatë, situata ka krijuar shqetësime për banorët dhe prindërit e nxënësve.

Autoritetet lokale bëjnë me dije se kjo problematikë pritet të marrë zgjidhje përfundimtare me përmbylljen e projektit të rehabilitimit të rrjetit të ujërave të bardha dhe të zeza, i cili po zbatohet prej disa muajsh në qytetin e Lezhës dhe synon përmirësimin e menaxhimit të përmbytjeve në raste reshjesh intensive.

Situata në Qarkun Kukës pas reshjeve të shumta ka qenë problematik sidomos me bllokimin e rrugëve

Si rezultat i kushteve të motit akset rrugore nacionale janë nën trysninë e rënies së gurëve dhe inerteve, njoftojnë autoritetet lokale.

Ka patur rënie të gurëve në rrugë në aksin Bajram Curri Valbonë, Sopot – Kam dhe në aksin Kukës – Shishtavec.

I gjithë territori i Qarkut Kukës vazhdon të jetë i përfshirë nga reshje shiu me intensitet të lartë.

Ndryshe, sot në qarqet Shkodër, Kukës, Vlorë dhe Gjirokastër priten reshje intensive deri lokalisht shume intensive. Në qarqet Lezhë, Berat dhe Korçë priten reshje mesatare deri lokalisht intensive.

Në zonat urbane, në këto qarqe mund të shfaqen probleme me përmbytje të lokalizuara, në varësi të gjëndjes së kanalizimeve.

Sipas llogaritjeve hidrologjike të Institutit të Gjeoshkencave, IGJEO, si rezultat i reshjeve me intensitet të lartë do të ketë rritje të rrezikshme të prurjeve dhe niveleve të larta në lumenjtë Drin-Buna, Liqeni Shkodrës, lumi Mat, Shkumbin dhe Vjosë. Lumi Drin-Buna dhe Liqeni i Shkodrës do të kenë sot rrezik të shtuar për përmbytje.

Kaskada e Drinit

Korporata Elektroenergjetike Shqiptare njoftoi se ka nisur shkarkimet e kontrolluara nga Kaskada e Drinit në kushtet e prurjeve të larta si efekt i reshjeve si dhe bëri një tablo të gjendjes aktuale të niveleve të liqeneve në këtë kaskadë.

Të dhënat e Kaskadës së Drinit:

– Prurjet në kaskadë: 3500 m³/s

– Nivelet e liqeneve:

Fierza: 281.2 m
Koman: 174.2 m
Vau i Dejës: 75 m

“Aktualisht prurjet natyrore në kaskadë janë 3500 m3/s, ndërkohë që shkarkimet nga porta e Hec Vau i Dejës janë 700 m3/s dhe në HEC Koman 700 m3/s. Korporata Elektroenergjetike Shqiptare vijon të monitorojë me kujdes dhe në mënyrë të vazhdueshme situatën hidrike në kaskadë, duke garantuar menaxhim të sigurt dhe efikas të burimeve ujore” nënvizon KESH.

Raportimi i gjendjes nga MIE

Ministria për Infrastrukturën dhe Energjinë bëri gjithashtu një raport të gjendjes ne vend sa i takon rrugëve, aeroporteve, porteve dhe situatës energjetike.

AKSET RRUGORE

Në zonën veriore reshjet e shiut kanë qenë me intensitet të lartë duke sjellë rënie gurësh e inertesh në trup të rrugës dhe prurje uji të mëdha.
Në aksin Bogë-Theth ka pasur reshje dëbore.

Akset ku ka pasur probleme:

Bajram Curri–Valbonë
Ura Bujan–Qafë Morinë
Bajram Curri–Fierzë
Dedaj-Bogë
Kukës–Krumë
Kukës–Shishtavec – Skuraj–Peshkopi
Dushaj–Lekbibaj në km 4, ka ndodhur një rreshqitje duke vështirësuaR qarkullimin, po punohet për largimin e materialit nga pjesa kaluese e rrugës.
Në aksin Vorë-Maminas në km 2 ka prezencë të ujit në rrugë.
Kontraktorët me mjete e punëtorë kanë qenë në terren pa ndërprerje për të bërë pastrimin e akseve.

FURNIZIMI ME ENERGJI ELEKTRIKE

Aktualisht në rang vendi janë 22 fidera jashtë pune, ku rajoni më i prekur është Durrësi, ndikuar nga moti i keq dhe prezenca e ujit në kabina.
Të gjitha linjat që furnizojnë hidrovorët janë në funksion, përveç segmentit në Synej të Kavajës, për të cilin është duke u punuar.
Linjat 35kV dhe nënstacionet furnizojnë normalisht me energji elektrike.

RRJETI I TRANSMETIMIT

Të gjitha linjat 400 kV, 220 kV dhe 110 kV janë në operim normal.
Të gjitha brigadat e linjave dhe nënstacioneve janë në gatishmëri.
Në Nënstacionin Rrashbull 220/110 kV ka prani të shtuar uji në sheshin e nënstacionit. Ekipet e OST-së, në bashkëpunim me Emergjencat Civile po marrin masat e nevojshme për evadimin e ujit.

SITUATA NË KASKADËN E DRINIT

Si pasojë e reshjeve të shiut me intensitet të lartë, prurjet në HEC Koman dhe HEC Vau i Dejës vijojnë të mbeten të larta, pa shfaqur tendencë rënieje.
Aktualisht, këto njësi prodhimi janë në punë me kapacitet të plotë, me gjithsej 9 agregate në funksion. Uji i ardhur përpunohet për vënien në punë të njësive prodhuese, rezervohet në liqene brenda kuotave të lejuara dhe pjesa tjetër shkarkohet në mënyrë të detyrueshme, me qëllim garantimin e sigurisë së veprave prodhuese.

FURNIZIMI ME UJË

Rajoni Durrës

Situata paraqitet problematike, si pasojë e reshjeve me intensitet të lartë që vijojnë pa ndërprerje.
Të gjitha stacionet e pompave janë në funksion të plotë.
Niveli i kanalit të hidrovorit është maksimal;
Situata vlerësohet e rënduar, me rrezik për agravim për shkak të vazhdimit të reshjeve intensive.
Strukturat përkatëse janë në terren dhe po ndjekin situatën në mënyrë të vazhdueshme.
Në pjesën tjetër të rajoneve, pavarësisht reshjeve, nuk janë evidentuar problematika në sistemet e furnizimit me ujë dhe kanalizimeve.
Situata paraqitet e qëndrueshme dhe nën kontroll, ndërsa grupet e punës janë në gatishmëri të plotë për të monitoruar nga afër çdo zhvillim dhe për të ndërhyrë menjëherë në rast nevoje.

PORTET DHE AEROPORTI

Porti Durrës

Situata në Portin e Durrësit aktualisht paraqitet normale, pa probleme në veprimtarinë portuale. Po vijon imbarkimi i pasagjerëve për tragetet që kanë lundrim në mesditë. Furnizimi me energji vijon pa problem.

Porti Vlorë

Nuk ka pasur traget në nisje dhe as anije të tjera të ankoruara. Nisja Nisja nga Brindizi e tragetit mbetet në varësi të kushteve të motit. Kapiteneria ka pezulluar daljen e anijeve të vogla në gjirin e Vlorës.

Porti Sarandë

Situata e qetë. Trageti i linjës me Korfuzin vijon operimet.

Aeroporti “Nënë Tereza”

Operimet në Aeroportin Ndërkombëtar të Tiranës vazhdojnë normalisht. Situata meteorologjike në zonën përreth Aeroportit vazhdon të jetë e ngarkuar