Reshje shiu dhe dëbore, ARRSH: Goma dimërore dhe zinxhir të domosdoshme në zonat…

Gjatë ditës së sotme territori i vendit është përfshirë nga reshje shiu dhe dëbore ndërkohë Autoriteti Rrugor Shqiptar, ARRSH, raporton se aktualisht nuk ka sjellë probleme në qarkullimin e mjeteve.

“Në Rajonin Verior kanë pasur reshje dëbore në Qafë Mali-Fierzë, Hani i Hotit-Tamarë dhe Tamarë-Vermosh, Bogë-Theth, Bajram Curri-Valbonë, në Ura e Zapodit-Shishtavec.

Grupet e punës me mjetet borëpastruese janë në terren dhe po punojnë për pastrimin e rrugëve duke siguruar që qarkullimi të vijojë normalisht në të gjitha akset,” thekson Autoriteti Rrugor Shqiptar në njoftimin përmes rrjetit social Facebook duke kërkuar nga drejtuesit kujdes të shtuar ndërsa përfundon:

“Drejtuesit e mjeteve të kenë kujdes të shtuar gjatë drejtimit të mjetit për shkak të lagështisë në rrugë, të pajisen me goma dimërore dhe zinxhir kur udhëtojnë për në zonat malore me prezencë dëbore.”

Ndryshe, reshjet e dëborës, ka parashikuar Instituti i Gjeoshkencave, sot pritet të përfshijnë zonat Verilindore, Lindore dhe Juglindore të territorit. Reshjet e dëborës të pasuara nga ulja e ndjeshme e temperaturave dhe ngricat mund të krijojnë probleme të ndryshme dhe vështirësi në transportin rrugor.