Reshje të dendura shiu dhe erëra të forta, pëson Shkodra! Moti i keq vazhdon…

Me shtrëngatat dhe reshje të dendura shiu sot janë zgjuar qarqet Shkodër, Kukës, Lezhë, Durrës dhe Tiranë, por nga të dhënat paraprake më së keqei e ka pësuar Shkodra!

Si pasojë e këtyre kushteve të vështira atmosferike, në unazën perëndimore të Shkodrës janë evidentuar disa pemë të rrëzuara, madje edhe mbi makina të parkuara, por fatmirësisht nuk ka persona të lënduar, ka bërë të ditur Drejtoria e Shërbimeve dhe Punëve Publike, ndërkohë Kryetari i Bashkisë Tiranë, Erion Veliaj, ka bërë të ditur se këto tre ditë parashikohen plot shi e stuhi dhe i ka bërë thirrje qytetarëve që të evitojnë levizje të panevojshme e të bashkëpunojnë me emergjencat civile dhe Bashkinë. 

Ndërkohë Shërbimi Meteorologjik Ushtarak parashikon që reshjet e shiut do të jenë prezente që në orët e para të 24-orëshit në pjesën më të madhe të vendit me intensitet të ulët deri mesatar, në veriperëndim reshjet e shiut lokalisht pritet të jenë me intensitet deri të lartë.

Gjatë ditës reshjet e shiut do të mbeten prezente të herëpashershme në pjesën më të madhe të vendit.

“Hera-herës reshje shiu në formën e shtrëngatave dhe rrebesheve afatshkurtra shoqëruar me shkarkesa elektrike dhe breshër.

Era parashikohet të jetë nga juglindja me shpejtësi mesatare deri në 8m/sek, e cila hera-herës përgjatë vijës bregdetare dhe momentin e zhvillimit të vranësirave fiton shpejtësi deri në 20m/sek. Deti i forcës 3-4 ballë,” thekson Shërbimi Meteorologjik Ushtarak.