Reshje të dendura shiu në Kosovë, bllokohet trafiku në Autostradën Morinë–Prishtinë
Reshjet e dendura të shiut gjatë natës dhe në orët e mëngjesit kanë shkaktuar përmbytje në disa pjesë të Kosovës. Instituti Hidrometeorologjik i Kosovës raporton se si pasojë e reshjeve të pandërprera të shiut gjatë ditëve të fundit, në pjesën perëndimore, Gjakovë, Junik, Deçan, Malishevë, Rahovec, Klinë, etj. si dhe në pjesën qendrore, janë shkaktuar përmbytje lokale. Si rezultat, disa lumenj dhe përrenj kanë dalë nga shtretërit e tyre.
Në kryeqytet disa rrugë janë mbushur me ujë duke e bërë të vështirë qarkullimin e automjeteve ndërsa në autostradën Morinë-Prishtinë, veçanërisht në afërsi të aeroportit, për shkak të ujërave të grumbulluara në rrugë, qarkullimi është vështirësuar ndjeshëm.
Uji i mbledhur në rrugë u ka shkaktuar vështirësi drejtuesve të automjeteve dhe ka krijuar kolona të gjata.
Kompania Rajonale e Ujësjellësit “Mitrovica” ka njoftuar për ndërprerje të furnizimit me ujë për shkak të rritjes së turbullueshmërisë në kanalin e Ibër-Lepencit.
Kjo ndërmarrje tha se është e detyruar ta ndërpresë ujin dhe se masa merret me qëllim të garantimit të sigurisë dhe cilësisë së ujit të pijes.
“Ekipet tona teknike janë në terren dhe po monitorojnë vazhdimisht gjendjen. Furnizimi me ujë do të rikthehet menjëherë pas normalizimit të nivelit të turbulleshmërisë dhe krijimit të kushteve të sigurta për distribuim,” thekson Kompania Rajonale e Ujësjellësit “Mitrovica” përmes një njoftimi.
Në Skenderaj, kryetari i Komunës, Sami Lushtaku, bënë të ditur se reshjet e natës së mbrëmshme të cilat po vazhdojnë edhe sot kanë sjellë përmbytje në disa zona, duke shkaktuar vështirësi për një numër familjesh.
“Ekipet emergjente të zjarrfikësve që nga mesnata janë të angazhuara në terren dhe po përcjellin situatën me kujdes të shtuar. Në bashkëpunim me të gjitha ekipet e emergjencave në kuadër të komunës, do të vazhdojmë të jemi pranë qytetarëve për tu përballur së bashku me këtë situate,” shprehet Sami Lushtaku përmes rrjetit social Facebook.
Edhe në Malishevë për shkak të reshjeve të dendura është vërshuar parkingu nëntokësor, pak ditë pas përurimit të tij.
Ndryshe, sot Instituti Hidrometeorologjik i Kosovës bënë të ditur se si pasojë e reshjeve të pandërprera të shiut gjatë ditëve të fundit, në pjesën perëndimore dhe në pjesën qendrore, janë shkaktuar përmbytje lokale. Si rezultat, disa lumenj dhe përrenj kanë dalë nga shtretërit e tyre.
Këto reshje, me intervale dhe intensitet të ndryshëm, pritet të vazhdojnë edhe gjatë ditëve në vijim, duke mundësuar paraqitjen e përmbytjeve lokale, probleme në komunikacion, në sistemet e kanalizimit, si dhe vështirësi në trafik.
Aktualisht, lumenjtë kryesorë të vendit, veçanërisht ata në pjesën qendrore, lindore dhe jugore, Ibri, Sitnica, Lepenci, Morava e Binçës, etj. paraqesin ngritje të lehta të nivelit të ujit.
