Reshje të dendura shiu, përmbytje dhe shkarje dheu nga Shkodra në Borsh
Reshjet intensive të shiut ashtu siç kishte parashikuar IGJEUM kanë sjellë rritje të nivelit të ujit në lumenjë, përmbytje si dhe shkarje dheu në gjithë vendin.
Reshjet intensive gjatë orëve të natës kanë shtuar prurjet në kaskadën e Drinit ku për pasojë kishte dhe shkarkimet nga HEC-i Vau i Dejës, 300 metër kub/sekond që kanë shkaktuar përmbytje në disa zona.
Nga raportimet paraprake të Shtabit të Emergjencave bëhet me dije se janë përmbytur 1469 ha tokë, ku pjesa më e madhe është në njësinë administrative Ana e Malit dhe zonën e Dajçit me 489 ha.
Problematike është Ana e Malit ku është bllokuar dhe rruga për në fshatin Obot prej nga Kryetarja e Bashkisë Shkodër, Voltana Ademi i ka kërkuar ministrisë së Mbrojtjes ndihmë.
“Hidrometri në Lumin Buna tregon rritjen e nivelit në 5.80 m. Rruga e Obotit është e pakalueshme për shkak të lartësisë së ujit në rreth 60 cm. Në fshatin Shirq, në vendin e quajtur Urrela dhe Mushan, uji ka përmbytur 489 ha tokë. Bashkia Shkodër kërkon pajisjen e mjeteve të ushtrise për lundrimin dhe krijimin e aksesit për banorët e Obotit.”
Drejtoria e Bujqësisë raporton se si rezultat i reshjeve të ditëve të fundit, situata në terren është përkeqësuar ndjeshëm. Hidrometri në Dajç në orën 07.00 shënon 5.80 m. Kjo situate paraqitet si më poshtë:
Siperfaqe totale e permbytur 1469 Ha
1. Tokë e pakultivuar 403 Ha
2. Foragjere të dyta, jonxhe 941 Ha
3. Grurë 55 Ha
4. Bimë decorative 70 Ha
Njësia Administraive Dajç
Sipërfaqja e tokës bujqësore e përmbytur vlerësohet në 489 Ha, kryesisht në zonën e quajtur “Këneta e Dajçit” (fshatrat Dajç, Mushan, Shirq, Suka-Dajç), nga të cilat : Tokë e pakultivuar 158 Ha; Foragjere të dyta, jonxhe 226 Ha; Bimë decorative 70 Ha; Grurë 35 Ha.
Njësia Administrative Guri Zi
Vazhdon gerrryerja e tokës bujqësore nga lumi Drin në vendin e quajtur Mali I Vukatanit, fshati Ganjollë.
Njësia Administraive Velipojë
Sipërfaqja e tokës bujqësore e përmbytur vlerësohet në 20 Ha, kryesisht në fshatrat Ças,Reç (këneta Reçit),Baks I Ri: Tokë e pakultivuar 5 Ha; Foragjere të dyta, jonxhë 15 Ha
Njësia Administrative Bërdicë
Sipërfaqja e tokës bujqësore e përmbytur vlerësohet në 250 Ha, kryesisht ne fshatin Trush (fusha e stomes), e Bërdicë e Madhe: Tokë e pakultivuar 90 Ha; Foragjere të dyta, jonxhe 150 Ha; Grurë 10 Ha.
Vazhdon gerrryerja e tokës bujqësore nga lumi Drin në vendin e quajtur Harku I Bërdicës, fshati Bërdicë e Sipërme.
Njësia Administrative Ana Malit
Sipërfaqja e tokës bujqësore e përmbytur vlerësohet në 700 Ha, kryesisht ne fshatrat Obot, Muriqan,Oblikë Tokë e pakultivuar 150 Ha; Foragjere të dyta, jonxhe 540 Ha; Grurë 10 Ha.
Reshjet e dendur të shiut kanë shkaktuar probleme edhe në qytetin e Lezhës. Vërshimi i ujit ka bllokuar hyrjet e pallatevenë te “11 Janari” në lagjen “Besëlidhja” ndërsa probleme kishte në lëvizjen e qytetarëve dhe automjeteve.
Në Kallmet të Lezhës, kanali i ujërave të larta ka dalë nga shtrati duke përmbytur disa hektarë tokë bujqësore.
Situatë e përkeqësuar për shkak të reshjeve të shiut paraqitet edhe në Qarkun Durrës. Si pasojë e daljes së lumit Ishëm nga shtrati janë përmbytur 100 hektarë tokë bujqësore të mbjellura me jonxhë dhe grurë, dhe bëhet me dije se deri më tani toka të përmbytura ka në fshatërat Bubq, Derven dhe Mercinë.
Në fshatin Gjorm rreth 20 familje janë rrethuara uji ndërsa banorët ndihen të rrezikuar kërkojnë ndërhyrjen e Bashkisë Kurbin, e reshjet e shiut vijojnë me intensitet të lartë.
Në fshatin Sanxhak janë të përmbytura disa hektarë tokë bujqësore me daljen e ujit nga kanalet kulluese.
Kreu i Njësisë Administrative Novoselë, Kanan Shakaj se dalja e lumit Vjosë nga shtrati kërcënon 15 familje që janë në shtratin e lumit, ndërsa shtoi se janë lajmëruar blegtorët që të heqin bagëtitë.
“Vjosa ka filluar që ditën e djeshme rritjen e nivelit. Nga dje deri sot është shtuar 4.5 metra. Vazhdon rritja. Nga sa kemi informacion në Memaliaj nivelet janë të vogla, mendojmë që nuk do të ketë prurje në nivele të larta. Zakonisht Vjosa del nga shtrati i saj, jemi këtu te pazari dhe pritet të vazhdojë deri nga ora 2 me ujërat që vijnë nga lart. Por nuk e dimë si do të vazhdojnë ditën e sotme. Mendoj që 5-6 orë do të jetë në këto nivele. Kemi 15 familje që janë në shtrat të lumit. I kemi njoftuar blegtorët që të heqin bagëtitë. Po vazhduan reshje të fuqishme me këto prurje që ka Vjosa edhe mund të dalë. Po varet nga reshjet në Përmet dhe Gjirokastër,” tha Kanan Shakaj duke shtuar se aktualisht niveli është 6.6, rrezikohet me nivelin 7.3.
Reshjet e shiut me intensitet të lartë kanë shkaktuar probleme dhe në Gjirokastër. Liqeni i Viroit ka dalë nga shtrati ku për pasojë është vështirësuar dhe qarkullimi i mjeteve.
Reshjet e dendura të shiut kanë sjellë probleme dhe në njësinë administrative Cepo në Gjirokastër.
Lumi ka gërryer dhe një pjesë të rrugës që të çon në fshatin Zhulat dhe aktualisht aksi është bllokuar.
Shkarje dheu, çarje rrugësh…
Për shkak të reshjeve të dendura të shiut në Lezhë ka pasur dhe shkarje masive të dherash në lagjen afër Spitalit Rajonal Lezhë ku dhe rrezikohen disa banesa. Banorët e zonës janë të alarmuar nga situata e krijuar dhe kërkojnë ndërhyrjen e autoriteteve.
Në qarkun Elbasan vijojnë reshjet e shiut ndërsa në aksin Gramsh-Moglicë vijon rënia e dherave ashtu si dhe në Pishkash, si dhe në aksin problematik, Elbasan-Qafë Thanë. Qarkullimi në 2 akset nuk është ndërprerë dhe vijon normalisht ndërsa furnizimi me energji elektrike nuk ka pasur ndërprerje.
Niveli i lumenjve Shkumbin e Devoll vazhdon të jetë i konsiderueshem por larg pikës së rrezikut. Niveli i përroit të Zaranikës në bashkinë Elbasan ka pësuar rënie.
Nërkohë reshjet e dendura të shiut kanë sjellë problematika të shumta edhe në akset rrugore. Segmenti rrugor Sarandë-Borsh, në hyrje të Borshit është çarë në mes. Kjo rrugë e Bashkisë Himarë, e cila u inagurua në muajin Qershor, aktualisht është e pakalueshme.
ARRSH dhe Kompanitë e mirëmbajtjes pasi vlerësuan situatën lajmërojnë të gjithë drejtuesit e automjeteve që të evitojnë kalimin në këtë aks, si dhe është ndaluar qarkullimi i mjeteve të rënda.
“Në aksin Qafa Llogarasë-Sarandë, në lagjen Vonja të Borshit, si pasojë e reshjeve me intensitet të lartë të ditëve të fundit, ka ndodhur një rrëshqitje, e cila ka dëmtuar trupin e rrugës. Kompanitë e mirëmbajtjes dhe specialistët e ARRSH-së janë në vend për të vlerësuar situatën duke bërë në të njëjtën kohë edhe menaxhimin e trafikut vetëm në një kalim.
Lajmërohen të gjithë drejtuesit e automjeteve që të evitojnë kalimin në këtë aks, si dhe është ndaluar qarkullimi i mjeteve të rënda në këtë aks,” thekson ARRSH përmes një njoftimi.
