Reshje të dendura të borës, ARRSH: Ja rrugët që kalohen vetëm me zinxhirë, reagon Policia…

Pas vështërsive që krijuan reshjet e dendura të dëborës që nga dita e djeshme sot Autoriteti Rrugor Shqiptar, ARRSH, raporton se disa rrugë janë të kalueshme vetëm me zinxhirë, ndërsa iu bën thirrje shoferëve që të pajisen me goma dimërore.

Ndërkohë ka reaguar edhe Policia e Shtetit Policia duke apeluar tek të gjithë drejtuesit e mjeteve që të bëjnë kujdes, të moderojnë shpejtësinë, të mos kryejnë parakalime të gabuara, të vendosin zinxhir në akset rrugore ku ka prezencë të reshjeve të dëborës.

Në Rajonin Verior, raporton ARRSH, reshjet kanë vazhduar me intensitet të lartë shoqëruar dhe me erë të fortë. Qarkullohet me zinxhirë në: Peshkopi-Ushtelencë, Peshkopi-Qafë Drajë, Urë Çerenecit-Klenjë, Trebisht-Doganë, Mjedë-Pukë-Fushë Arrëz, Fushë Arrëz-Qafë Mali-Kukës,Qafë Mali- Fierzë, Qafë Bualli-Bulqizë-Peshkopi.

Në Rajonin Qendror nuk ka probleme me qarkullimin. Rekomandohet që përdoruesit e mjeteve që kalojnë në segmentet Lunik-Steblevë dhe Krujë-Sarisallitik të pajisen me goma dimri ose zinxhirë.

Ndërkohë në Rajonin Jugor, Autoriteti Rrugor Shqiptar raporton se ka përmirësim të situatës, kontraktorët kanë bërë pastrimin e plotë të akseve dhe qarkullimi i mjeteve kryhet normalisht.

Gjithsesi, Autoriteti Rrugor Shqiptar bënë thirrje për kujdes:

“Drejtuesit e mjeteve të tregohen të kujdesshëm, sidomos gjatë natës dhe në orët e para të mëngjesit, të pajisen me goma dimërore dhe zinxhirë në akset ku është e nevojshme, të reduktojnë shpejtësinë, të respektojnë sinjalistikën dhe udhëzimet e Policisë Rrugore.”

Nisur nga moti i keq në të gjithë vendin, me reshje shiu dhe dëbore, Policia e Shtetit ka apeluar edhe njëherë për të gjithë drejtuesit e mjeteve që të bëjnë kujdes, të moderojnë shpejtësinë, të mos kryejnë parakalime të gabuara, të vendosin zinxhir në akset rrugore ku ka prezencë të reshjeve të dëborës.

“Vendosni rripin e sigurimit, mos përdorni celularin gjatë drejtimit të automjetit dhe ndiqni udhëzimet e Policisë Rrugore dhe të autoriteteve të tjera shtetërore.” thekson Policia e Shtetit duke sugjeruar të mos qarkullohet pa kontrolluar gjendjen teknike të mjetit, gjendjen dhe presionin e gomave përpara lëvizjes në rrugë me shi dhe borë.

“Ulni në maksimum shpejtësinë në rrugët ku ka prezencë të shtuar të ujit apo të borës në rrugë, rrisni ndjeshëm distancën e sigurisë midis mjeteve, nga 20% në 80%; dhe shmangni frenimin ose lëkundjen papritmas, por ngadalësoni gradualisht.”

Policia Rrugore ka rritur prezencën e shërbimeve të saj në rrugë për ti ardhur në ndihmë çdo drejtuesi mjeti në nevojë, bënë të ditur por apelon tek drejtuesit e mjeteve që të mos vijonë lëvizjen në rast se hasin vështirësi në qarkullim për shkak të reshjeve të dëborës dhe shiut, por të kontaktojnë menjëherë në numrin pa pagesë 112 e në Komisariatin Dixhital për të marrë udhëzimet e nevojshme dhe për t’ju ardhur në ndihmë shërbimet e Policisë Rrugore dhe ato të autoriteteve të tjera shtetërore.