Reshjet e borës/ Alarm, Deputeti i PD: Qarku i Gjirokastrës i paralizuar, asnjë masë…

Pas reshjeve intensive të borës dhe izolimit të një qarku të tërë, deputeti i Partisë Demokratike, Tritan Shehu ka ngritur alarmin se qarku i Gjirokastrës është drejtë paralizimit të plotë për shkak të reshjeve të dëborës ndërkohë që nuk është marrë asnjë masë.

Deputeti i këtij qarku thekson se strukturat shtetërore në këtë qark janë inekzistente dhe se policia nuk ka bërë asnjë komunikim për të paralajmëruar udhëtarët.

“Qarku i Gjirokastrës drejt i bllokimit e paralizimit të plotë. Strukturat shtetërore përgjegjëse janë inekzistente! Shtabi i emergjencës as që dëgjohet apo ndjehet!

Policia nuk bën asnjë komunikim, njoftim apo paralajmërim për qytetarët e udhëtarët,” thekson Tritan Shehu duke shtuar se rruga nacionale nga Memaliaj ne Qafë Muzinë pothuajse e pa komunikueshme, me një nivel të borës prej reth 35 cm:

“Po kështu dhe drejtimi për Përmet. 30 grupe të tëra fshatrash si Zagorisë, Lopësi, Kurveleshit, Pogonit, Frashërit etj. janë të bllokuara dhe askush nuk interesohet. Për komedi vetëm një mjet i vogël pastrues duket diku, ndërsa situata kërkon reagime e masa energjike.”

Dhe, bora po vazhdon të bjerë:

“As edhe një masë apo këshillë për blegtorinë e këtij Qarku, e cila po kalon momente shumë të vështira. Dhe bora po vazhdon të bjerë, ndërsa mungojnë krejtësisht reagimet përkatëse stabilizuese,” konstaton deputeti i këtij Qarku nga  radhët e PD, Tritan Shehu duke përfunduar:

“Po kush t’i realizojë këto, një Qeverisje në shkërmoqje si kjo…!?”