Reshjet e borës, ja cilat zona vazhdojnë të jenë të bllokuara

Pas reshjeve të borës, disa fshatëra në Dibër dhe Bulqizë vazhdojnë të jenë të bllokuara.

Rruga Kukës-Peshkopi kalohet me vështirësi, ndërsa vazhdojnë të jenë të bllokuara disa fshatëra në në Kalanë e Dodës, Grykë Nokë, Zall Dardhë. Në Dibër raportohet se janë bllokuar nëntë fshatëra ndërsa në Bulqizë është e bllokuar Ternova. Nën/prefektit i Bulqizës madje tha se 115 familje në Tërnovën e Madhe dhe në Tërnovën e vogël janë bllokuar. Për shkak të trashësisë së borës në këto zona është i pamundur qarkullimi i automjeteve.

Rruga Peshkopi-Tiranë kalohet pa probleme pasndërhyrjes së borëpastrueseve.

Në qarkun e Korçës akset nacionale janë të kalueshme.

Atoriteti Rrugor Shqiptar raporton se në Dardhë, Voskopojë, Bigell Gorricë dhe në Qafën e Qarrit, rekomandohet përdorimi i zinxhirëve, për shkak të prezencës së ngricave në rrugë, pasi temperaturat janë shumë të ulëta. 

Në Qafë Thanë – Kapshticë ka pasur reshje të dobëta. Është bërë pastrimi dhe qarkullimi kryhet pa zinxhirë. 

Në segmentin fundor prej 20 km te aksit Ura e Cerenecit – Stebleve rekomandohet përdorimi i zinxhirëve, për shkak të ngricave në rrugë.

Në segmentin Lunik-Stebleve rekomandohet përdorimi i zinxhirëve për shkak te pranisë së ngricave në rrugë. Kontraktorët po punojnë në të gjitha akset për pastrimin dhe shpërndarjen e kripës. 

Në Qafën e Llogarasë dhe në Qafën e Muzinës, nuk ka pasur reshje. Kontraktori ka bërë shpërndarjen e kripës që në orët e para të mëngjesit dhe qarkullimi kryhet pa probleme. 

Rekomandohen përdoruesit e rrugës të bëjnë kujdes gjate lëvizjes në akset ku ka prezencë ngricash dhe të respektojnë sinjalistikën rrugore. Për ditën e sotme sinoptikanët kanë parashikuar që reshjet e borës të jenë prezente dhe në lartësinë 600 m.