Reshjet e dendura të shiut, përmbytet Vlora dhe Fushë-Kruja
Reshjet e shiut me intensitet të lartë gjatë natës dhe në orët e mëngjesit të së enjtes kanë shkaktuar probleme të shumta në Vlorë dhe në Fushë-Krujë.
Deri sa në disa zona të qytetit të Vlorës, si rruga e Portit, Kosova, 28 Nëntori, Kume, janë pothuajse të përmbytura dhe makinat e kanë të vështirë të qarkullojnë në Fushë-Krujë janë përmbytur tokat përreth.
Bashkia Vlorë respekton paralajmërimet e meteorologëve por për situatën e krijuar vetëm i ka bërë thirrje qytetarëve të kenë kujdes dhe të shmangin të gjitha lëvizjet me makina.
“Duke parë kushtet e motit në Vlorë, por edhe në të gjithë vendin, do ju luteshim të shmangnit të gjitha lëvizjet me makina për shkak të shirave të dendur dhe erërave të forta. Paralajmërimet e meteorologëve për përmbytje, na bëjnë të jemi të kujdesshëm. Kujdesuni për veten dhe familjarët tuaj!” thekson Bashkia Vlorë dhe për çdo nevojë sugjeron qytetarët të vendosin kontakt me Ujësjellës Kanalizimet dhe Shërbimet publike të Bashkisë.
Ndërkohë reshjet e dendura të shiut kanë bërë që të dalë nga shtrati lumi Ishëm dhe të përmbyt tokat përreth në Fushë-Krujë. Mësoohet se janë përmbytur dhjetëra hektarë por për momentin nuk ka banesa që rrezikojnë të përmbyten.
Ndryshe, ipas llogaritjeve të IGJEUM, përgjatë datave 7 -11 Janar 2021 priten reshje shumë intensive, pothuajse në të gjithë territorin. Nga llogaritjet hidrologjike të IGJEUM, këto reshje do të sjellin rritje të rrezikshme të prurjeve në lumenjtë e mëdhenj dhe të mesëm Drin-Buna, Mat, Ishëm, Erzen, Shkumbin, Seman dhe Vjosë. Përmbytje mund të shkaktohen nga lumi Drin-Buna dhe Liqeni i Shkodrës me prurjet maksimale të cilat parashikohen të arrijnë zonat e rrezikuara në datën 12 Janar.
Lumenjtë Mat, Ishëm, Erzen dhe Shkumbin do i arrijnë prurjet maksimale në fundin e datës 8 dhe 9 Janar 2021.
Lumenjtë Seman dhe Vjosa parashikohen të rrezikshëm por me probleme më të vogla lokale të përmbytjeve.
Shkalla e rrezikut nga përmbytjet lumore do varet edhe nga sasia e shkrirjes së dëborës si pasojë e rritjes së temperaturave. Përmbytje urbane dhe rrëshqitje të dherave mund të ndodhin gjithashtu në pothuajse të gjitha qarqet.
