Reshjet e shiut dhe borës nga Boga në Llogara, ARRSH: Kujdes, vazhdon rënia e orteqeve!

Moti i keq prej ditësh ka përfshirë vendin tonë duke shkaktuar dhe problematika të ndryshme ndërkohë reshjet e shiut kanë vazhduar gjatë natës dhe në orët e para të mëngjesit ku në disa zona është zëvendësuar me reshje bore nga Boga në Llogara, ende pa u tërheq sasitë e mëdha të ujit në zonat e përmbytura nga Shkodra në Gjirokastër.

Në situatën e krijuar, Autoriteti Rrugor Shqiptar i ka bërë thirrje qytetarëve që të tregohen të kujdesshëm dhe të respektojnë rregullat e qarkullimit ndërkohë që janë shfaqur edhe orteqet.

“Kanë filluar reshjet e dëborës në Dardhë, në Llogara, në Krujë-Sarisalltik, në Ura e Zapodit Shishtavec në lartësi mbi 700 m, ku është punar me mjete borëpastruese dhe qarkullimi kryhet pa probleme.

Në aksin Bogë-Theth në zonën e tuneleve vazhdon rënia e orteqeve duke sjellë vështirësi në qarkullim dhe pastrimin e rrugës,” thekson ARRSH duk ei bërë thirrje drejtuesve të mjeteve për kujdes të shtuar gjatë drejtimit të mjetit në kohë me reshje, që të pajisen me goma dimërore dhe zinxhirë kur udhëtojnë për në zonat malore, të ulin shpejtësinë, respektojnë sinjalistikën dhe udhëzimet e Policisë Rrugore.

Ndërkohë reshjet e dëborës kanë mbuluar të gjithë malet në rrethin e Krujës, ku trashësia ka shkuar deri në 15 cm. Aktualisht rruga për në Qafë-Shtamë është e kalueshme vetëm me zinxhirë.

Sa i përket lumenjve, niveli i tyre është rritur, por deri tani nuk paraqesin problem ndërsa raportohet se disa fshatra janë pa energji elektrike si pasoje e dëmtimit ë linjave furnizuese.

Në zonat malore të Qarkut Dibër, prej orëve të para të mëngjesit kanë rënë reshje dëbore dhe për pasojë Rruga e Arbrit, by-passi Qafë Murrizë, është bllokuar.

Subjekti kontraktor për mirëmbajtjen e rrugës thotë se po punojnë për pastrimin dhe hapjen e saj ndërsa Policia Rrugore apeloi për të gjithë drejtuesit e mjeteve që lëvizin në drejtim të Tiranës dhe anasjelltas nëpërmjet bypass- Qafë Murrizë, të ndjekin aksin e vjetër rrugor Klos-Burrel-Ulëz.

Reshjet e bore dhe në jug të vendit. Gazetari Enrik Mehmeti raportoi për “BalkanWeb” se prej orëve të para të mëngjesit të së shtunës, reshjet e dëborës krijuan vështirësi qarkullimi në aksin rrugor pranë Qafës së Llogarasë, ndërsa trashësia e dëborës shkoi deri në 20 centimetra.

Aktualisht në zonë nuk ka probleme në rrugë me kalimin e automjeteve, megjithatë kërkohet kujdes maksimal.

Drejtuesit e automjeteve duhet të jenë të pajisur me zinxhirë, për shkak të pranisë së ngricave në rrugë.

Problematike situata mbetet kryesisht në orët e para të mëngjesit, por edhe mbrëmjes pasi ulja e temperaturave në zonë krijon ngrica në rrugë

Apel për drejtuesit e mjeteve që i drejtohen këtij aksi me goma vere, nuk do të lejohen të ngjiten në Qafën e Llogarsë, pasi bllokojnë qarkullimin, me ndihmë nga Policia Rrugore do të bëhet ndalimi i mjeteve pa goma dimri

Në Qarkun Korçë gjatë natës ka pasur reshje shiu dhe dëbore. Reshjet kanë qenë në formë dëbore në kuotën +1200 m . Në rrugën e Dardhës nga kilometri 6 deri në kilometrin e 13-të ka pasur reshje dëbore dhe trashësia varion nga 5 cm deri 15 cm. U punua me mjet borëpastruese për pastrim dhe kriposje.
Në aksin Korçë-Voskopojë dhe Korçë-Qafa e Qarrit-Ersekë reshje dëbore të pakta. Qarkullimi i mjeteve bëhet pa probleme dimërore.

Temperaturat janë të ulëta, mesatarja 0 gradë. Aktualisht moti i alternuar i kthjellet/vranët dhe me reshje të pakta.

Në akset rrugore nacionale dhe turistike, nuk ka probleme në rrugë. Kontraktorët janë në gatishmëri për mirëmbajtje dimërore dhe emergjente nisur edhe nga parashikimet e motit për orët në vijim.

Në bashkinë Korçë do të vazhdojë heqja e pjesës tjetër të çatisë në ndërtesën që pati probleme ditën e djeshme tek pazari. Bashkitë e tjera nuk raportojnë problematika.

Ka përmirësim te furnizimit me energji elektrike dhe raportohen defekte sporadike ne bashkinë Pogradec fshati Jollë, ne bashkinë Devoll fshati Çipan, në bashkinë Korçë, fshatrat Kodra dhe Peshtan, të Njësisë Administrative Vithkuq. Rreshjet aktualisht kanë pushuar.

Në bashkinë Kolonjë gjatë natës ka pasur erëra te forta dhe shira të rrëmbyeshëm, ndërsa në mëngjes borë 2-3 cm. Si pasojë ka pasur dëmtime në dy shkolla, dhe po punohet për riparimin e tyre.

Shkolla 9-vjeçare në Selenicë dhe shkolla fillore në Shalës, të dyja në bashkinë e Kolonjës kanë pësuar dëmtime në çati si pasojë e erës së fortë.

Nga burime zyrtare bëhet e ditur se në të dyja shkollat vijon mësimi (shkolla e Selenicës është një godinë e madhe dhe po vijohet mësim te pjesa që nuk ka probleme, ndërsa në Shalës po zhvillohet në një ambient tjetër.

Ndërsa ekipet e punës ndodhen në terren për të bërë të mundur riparimin çative për rikthimin e nxënësve ditën e hënë.