Gjuha Shqipe nuk negociohet! Studentët në Shkup, protestë kundër diskriminimit

“Ligji për gjuhët është i qartë”, “Stop diskriminimit institucional”, “Respekto Ligjin për gjuhët, respekto Kushtetutën” dhe “Mos mohoni një të drejtë të fituar”, ishin mesazhet që mbanin në pankarta, studentët e Universitetit të Tetovës, Universitetit “Nënë Tereza” dhe Universitetit të Evropës Juglindore, sot në protestën që organizuan në Shkup pas padrejtësive të vazhdueshme ku nuk u mundësohet as dhënia e provimit të jurisprudencës në gjuhën shqipe, edhe pse kjo e drejtë është e garantuar me Kushtetutë dhe Ligj.

“Kërkesa jonë është e qartë, mundësia që provimi i Jurisprudencës të jenë në Gjuhën Shqipe dhe kjo nuk është kërkesë emocionale, por parimore. Në një shtet multietnik si Maqedonia e Veriut, duhet respektuar diversiteti në këtë vend. Ndaj ky është edhe një moment reflektimi dhe një mesazh i drejtpërdrejtë për Ministrin e Drejtësisë, Filkov.

Të marrë seriozisht këtë çështje dhe të reflektojë dhe jo të injorojë kërkesat tona. Ne dimë edhe të rebelohemi, po ashtu është edhe një thirrje për kryeministrin Micokvski, që të mos e trajtojë çështjen vetëm në kuadër të deklaratave por të angazhohet për zgjidhje reale. Nuk kërkojmë asgjë më shumë se të drejtën tonë, këtë duhet ta kuptojë çdo politika shqiptar,” tha njëri prej studentëve organizator të protestës me mesazh të qartë për respektimin e të drejtave të tyre.

Ndërkohë i çuditshëm është reagimi i koalicionit të partive shqiptare në pushtet, VLEN, i cili nuk merrë përgjegjësi por thotë se “kur studentët dalin në protestë, kjo flet më shumë për dështimin e atyre që për vite kishin pushtetin, sesa për ata që sot po punojnë për të gjetur zgjidhje”.

Madje VLEN akuzon partinë opozitare BDI se sot po e instrumentalizon pakënaqësinë e studentëve dhe po përpiqet të përfitojë politikisht nga një problem që vetë e ka lënë zvarrë.

“Kjo është skandaloze. Kishte ministra, institucione, mekanizma dhe gjithë pushtetin e nevojshëm për ta mbyllur këtë çështje njëherë e mirë. Nuk e bëri. Jo pse nuk mundi, por sepse ishte e zënë me hajni, me Soravi, me blerje pronash dhe me pazare për llogari të klikës së vet.

VLEN e konsideron protestën e studentëve si shprehje legjitime ndaj një padrejtësie që nuk duhej të zgjaste kaq shumë. Zëri i tyre duhet dëgjuar, jo të përdoret si vegël propagandistike nga ata që vetë e krijuan problemin,” thotë VLEB pa sqaruar pse gjuha u bë sërish problem vetëm kur ajo erdhi në pushtet.

Ndryshe, kjo protestë e studentëve vjen pas peticionit të 385 studentëve shqiptarë nga tre universitetet përkatëse, ku kërkohet që provimi i jurisprudencës të mbahet edhe në gjuhën shqipe, në përputhje me të drejtat e tyre ligjore.