“Restorantet dhe baret hapen të fundit”, Rama: Nuk kemi refuzuar asnjë për pagën e luftës!

Pasi prezantoi Paketën e Zgjeruar një ditë më parë sot Kryeministri Edi Rama u shfaq në rrjetet sociale dhe detyrimisht të gjitha mediat audiovizive për, siç tha, “Përgjigje për pyetjet tuaja mbi Paketën e Zgjeruar”, ku fillimisht e bëri të qartë se restorantet dhe baret do të jenë të fundit që do të hapen për shkak të situatës së krijuar nga epidemia e koronavirusit, pas vazhdoi me lëvizjen me automjet, në këmbë, e përfundoi te garancia se shqiptarët nuk do të vdesin për bukë.

“Restorantet dhe baret janë të fundit që do hapen. më vjen keq por është e pamundur ndryshe. Nëse ju keni punë në qytet dhe do shkoni me automjet patjetër privat, patjetër por do të merrni një autorizim dhe autorizimet do të jenë shumë më të thjeshta tani që mund të lirojnë pak. E di shumë mirë që ka qenë e shtrënguar, e di shumë mirë që shumë autorizime janë refuzuar, kjo nuk ka qenë për ndonjë epsh diktatorial por thjesht për të garantuar atë që kush do ta shikojë e shikon qartë sot, rezultatin që kemi arritur në këtë luftë,” duke shfqur sërish ambicien për ta çuar kurbën drejt zeros:

“Me durim, sigurisht dhimbjet nga pasoja të natyrës ekonomike janë të konsiderueshme, por askush mos ta harrojë se halli i halleve është jeta e njerëzve. Koronavirusi ne na luan fenë siç po ua luan fenë shumë të tjerëve por arsyeja që nuk na i ka luajtur deri sot është se jemi mbrojtur shumë më fort. Armiku nuk ka ikur dhe na bën gjëmën po t’iu hapim shteg.”

Ndonëse nuk shquhet për ndonjë solidaritet, sot për shqetësimet mbi gjendjen e qytetarëve që nuk kanë të ardhura, Edi Rama dëshmoi se ka njohuri mbi histori solidariteti ndërsa shtoi se që nga koha e Skënderbeut nuk ka vdekur kush kurrë ndonjë shqiptar për bukë.

“Sepse është bukë, kripë e zemër historia e Shqipërisë. Në këtë vend po ndihmohen sot njerëzit në nevojë siç nuk mund të imagjinohej se mund të ndihmoheshin më përpara. Kanë kaluar 200 mijëshin rastet e trokitjes derë më derë të operacionit humanitar.”

Sa iu përket masave, Rama theksoi se populli nuk merr gjoba, marrin të papërgjegjshmit. “Gjobat nuk janë për të mbushur buxhetin. Janë pak fare në raport me popullin. Por janë për të dhënë një mesazh që jetohet me rregulla dhe rregullat janë njësoj për të gjithë”, deklaroi Rama.

Përkundër ankesave të shumta, Edi Rama vazhdon të jetë i bindur se nuk është refuzuar asnjë që ka të drejtë por se Paketa e parë ka qenë për një kategori të caktuar.

“Do të merrni 400 mijë lekë me paketën e zgjeruar. Nuk kemi refuzuar asnjë që ka të drejtë të marrë pagën nga paketa e parë. Refuzimet janë për ata që nuk janë në atë kategori. Nuk është refuzim i nevojës, përjashtim nga ndihma por refuzim për shkak të dritares së gabuar. Është thënë e stërthënë cilat janë bizneset që do të marrin nga paketa e parë. Nga paketa e parë sot, para se të vija këtu, shifra e përfituesve është 30 mijë e diçka. Kemi dhe 40 mijë të tjera për të dhëna. Pse vonohen? Sepse bëhen verifikime në terren.”

Edhe pse sqaronte Paketën e Zgjeruar pyetje të shumëta nuk kishin të bënin me ata që ishin në izolim për shkak të COVID-19 por edhe për ata që ishin në izolim në dyert e botës ose edhe më keq rrugëve dhe në kufirin shqiptar:

“Shumë shpejt do të kemi një përgjigje konkrete se kur do të nisë lëvizja nga këtu jashtë. Shumë shpejt. Po punojmë dhe besoj që paketa do të jetë e arsyeshme, dhe duhet të kuptohemi. Të raitdhësohen të gjithë tani pa vënë limit, do të thotë se të bëhemi gaz i botës duke hedhur këtë sakrificë dhe të numërojnë mijëra të vdekur në ditë.”

Të gjithë emigrantët shqiptarë që janë bllokuar në Greqi dhe u ka kaluar afati i qëndrimit, ai i siguroi se nuk do të penalizohen.

“E kam rithënë disa herë, që për ata që janë bllokuar në Greqi dhe që kanë shkelur afatet, s’do të ketë gjobë. E kemi biseduar me qeverinë greke. Dhe s’kanë vënë gjoba. Deri tani ka mirëkuptim.”

Pasi u mundua ti bindë shqiptarët se nuk ishin reale vuajtjet e tyre edhe pse gjithçka ishte ndryshe jo vetëm rrugëve të botës por edhe në Shqipëri ku regjimi i lëvizjes koordinohet nga ca halabakë partiakë, Kryemnistri Edi Rama pas një pushimi nga bashkëbisedimi me veten për të dëgjuar elektorati i tij, dha një lajm të mirë përmes rrjetit social Facebook.

Pavarësisht situatës së vështirë, në të cilën ndodhet e gjithë bota, Kryeministri Edi Rama bëri të ditur se BE i qëndroi angazhimit të 17 shkurtit në Konferencën e Donatorëve në Bruksel dhe 100 milionë eurot e premtuara për rindërtimin u alokuan në buxhetin e rishikuar të BE 2020.