Rexh Byberi në “arrest shtëpie”, PD: Emëron kryetaren në detyrë të bashkisë Tropojë

Partia Demokratike përmes zëdhënëses për Antikorrupsion në PD, Genta Vangjeli, sot ka denoncuar Kryetarin e Bashkisë Tropojë, Rexh Byberi, i cili ndonëse nën masë sigurie “arrest shtëpie” ai vijon pa u shqetësuar me shkeljet e ligjit duke uzurpuar kompetencat e Këshillit Bashkiak dhe duke komanduar vetë Kryetari e Bashkisë Tropojë, dhe, duke e kthyer një bar-kafe në zyrë ku firmos e plotëson shkresa e dokumente.

“Pasi ju komunikua masa e sigurisë ‘arrest shtëpie’, Z. Byberi duke uzurpuar kompetencat e Këshillit Bashkiak si i vetmi organ i cili kryen komandimet në detyrë në rast vakance të kryetarit, z. Byberi komandoi në detyrën e kryetarit të Bashkisë Tropojë, Zv/Kryetaren, znj. Zyra Islamja,” tha Genta Vangjeli duke theksuar dhe denoncimin e qytetarëve se pas vendosjes së masës së sigurisë, Rexh Byberi ka kthyer një bar-kafe në zyrë ku firmos e plotëson shkresa e dokumente.

Në situatëne krijuar, Partia Demokratike apelon në mënyrë urgjente respektimin e ligjit dhe kërkon:

“Shfuqizimi i urdhërit të brendshëm të kryetarit nën arrest nr. 292, datë 09.09.2024; Emërimi me shumicë votash nga këshilltarët bashkiakë  të njërit prej nënkryetarëve që të kryejë detyrat e kryetarit; Organet ligjzbatuese të monitorojnë nga afër respektimin e masës së sigurisë ‘arrest shtëpiak’ nga ky person.”

Ndryshe, pas denoncimit të Partisë Demokratike për një seri shkeljesh me procedurat e prokurimit dhe jo vetëm, Kryetari i Bashkisë Tropojë, Rexh Byberi i cili sot ndodhet nën masën e sigurisë “arrest shtëpie”, akuzohet për ‘Shpërdorim detyre’ në bashkëpunim, për projekt idenë e ndërtimit të rrugës ‘Stacioni i Anijes Palç- Guri i Lules’, duke sjellë një dëm prej 2.7 milionë euro.

Deklaratë:

Kryetari i Bashkisë Tropojë, Rexh Byberi i denoncuar nga Partia Demokratike, dhe nga emisioni investigativ ‘Piranjat’, për një seri shkeljesh me procedurat e prokurimit dhe jo vetëm, sot ndodhet nën masën e sigurisë’arrest shtëpie’.

Byberi akuzohet për ‘Shpërdorim detyre’ në bashkëpunim, për projekt idenë e ndërtimit të rrugës ‘Stacioni i Anijes Palç- Guri i Lules’, duke sjellë një dëm prej 2.7 milionë euro.

Edhe pse nën masë sigurie, ai vijon pa u shqetësuar me shkeljet e ligjit.

Pasi ju komunikua masa e sigurisë ‘arrest shtëpie’, Z. Byberi duke uzurpuar kompetencat e Këshillit Bashkiak si i vetmi organ i cili kryen komandimet në detyrë në rast vakance të kryetarit, z. Byberi komandoi në detyrën e kryetarit të Bashkisë Tropojë, zëvendëskryetaren, znj. Zyra Islamja.

Qytetarët denoncojnë gjithashtu, se pas vendosjes së masës së sigurisë, Rexh Byberi ka kthyer një bar-kafe në zyrë ku firmos e plotëson shkresa e dokumente.

Partia Demokratike apelon në mënyrë urgjente respektimin e ligjit i cili duhet të jetë i barabartë për të gjithë, prandaj kërkohet menjëherë:

1. Shfuqizimi i urdhërit të brendshëm të kryetarit nën arrest nr. 292, datë 09.09.2024.

2. Emërimi me shumicë votash nga këshilltarët bashkiakë  të njërit prej nënkryetarëve që të kryejë detyrat e kryetarit;

3. Organet ligjzbatuese të monitorojnë nga afër respektimin e masës së sigurisë ‘arrest shtëpiak’ nga ky person.