Rezoluta Antikorrupsion, Noka: Kulmi! Tre mandate krim e korrupsion, do ti mbyllësh me një rezolutë!

Mbylljen e tre mandateve me krim dhe korrupsion me një rezolutë, Sekretari i Përgjithshëm i Partisë Demokratike, Flamur Noka, e cilësoi si kulmin e 11 viteve plot fyerje, tallje dhe poshtërim të qytetarëve nga kjo mazhorancë dhe Kryeministri Edi Rama.

“Të vijë këtu Edi Rama, përgjegjësi kryesor për korrupsionin, për lidhjet me krimin, me ligj, me kushtetutë, me moral me çdo normë e zakon, të vijë këtu tani e të thotë me këtë palo rezolutë, që më gradoni mua si kalorësin anti-korrupsion të Shqipërisë Europiane, këtë nuk ta rrok mendja. A ka parodi më të madhe se sa kjo,” tha Flamur Noka duke vlerësuar se pretendimi i Edi Ramës se ne të gjithë, të gjithë shqiptarët kaluam një amnezi, një goditje, dhe harruam 11 vite, pretendimi se me një komandë po fshijmë më shumë se 1 dekadë vuajtje e dëme që i janë bërë vendit, është poshtërues.

“Po thua sot se nuk je ti Edi Rama që ndërsen SKAP-in kundër liderit të opozitës Sali Berisha. Po e mban të burgos pa akuzë, ke urdhëruar kamikazin Dumani dhe në kundërshtim me ligjet ti ndaloj komunikimin se fjala e tij, ty të tërbon te nxjerr të palarat, ty dhe bandës tënde.

Pra vjen sot këtu, dhe thua kam munguar këto 11 vite, nuk e di se çfarë ka ndodhur me shqiptarët, nuk e di se ke përzënë 1 milionë vetë nga qeverisja jote, dhe thua më jepni një mandat tjetër më shpallni heroin e qeverisjes së mirë. Po a ka tallje më të madhe se sa kjo,” tha Sekretari i Përgjithshëm i Partisë Demokratike, Flamur Noka duke përfunduar:

“Këtë amnisti, këtë falje, këtë indulgjencë ti Edi Rama nuk ke për ta marrë kurrë. Ligji do të të gjykojë për korrupsionin dhe krimin që ke bërë. Populli do të të gjykojë shumë shpejt për të këqijat që i ke sjellë këtij vendi.

Historia do të rezervojë me siguri një vend për ty, pasi për 3 mandate pengove, vonove integrimin europian të vendit. Këtë falje, këtë amnisti, do të mund të marrësh vetëm para priftit, kur të vijë dita që të ndihesh i penduar.”

Fjala e plotë:

Kjo mazhorancë, ky kryeministër ka bërë në këto 11 vite plot gjëra fyese, tallëse, poshtëruese për publikun, për qytetarët e këtij vendi, dhe për opozitën. Por padyshim se ky moment, është nga më kulminantët. Të vish këtu pas 3 mandateve krim dhe korrupsion, e të kërkosh ta mbyllësh këtë histori me një rezolutë, kjo është e pabesueshme.

Dhe më keq akoma, të vijë këtu Edi Rama, përgjegjësi kryesor për korrupsionin, për lidhjet me krimin, me ligj, me kushtetutë, me moral me çdo normë e zakon, të vijë këtu tani e të thotë me këtë palo rezolutë, që më gradoni mua si kalorësin anti-korrupsion të Shqipërisë Europiane, këtë nuk ta rrok mendja.

A ka parodi më të madhe se sa kjo.

Nuk ta rrok dot imagjinata. Vështirë ta gjesh këtë në absurdin e letërsisë, dhe nuk besoj se mund të bëhen filma për këtë.

Ne e dimë se me këtë rezolutë autori kryesor për korrupsionin, për qeverisjen e keqe, për lidhjet me bandat e me krimin, nuk ka ndërmend të laj duart si Pons Pilati. Këtë e kemi marrë vesh.

Por të vësh në skenë këtë shfaqje të neveritshme që të kërkojë këtu nga ky parlament që ai vetë, të shpallet këtu si kryqtar i luftës ndaj korrupsionin kjo është fyese për shqiptaret, kjo nuk mund të ndodhë.

Pretendimi juaj, pretendimi i Edi Ramës se ne të gjithë, të gjithë shqiptarët kaluam një amnezi, një goditje, dhe harruam 11 vite, pretendimi se me një komandë po fshijmë më shumë se 1 dekadë vuajtje e dëme që i janë bërë vendit, është poshtërues.

Ndërkohë që në këto 11 vite, Edi Rama ka pasur pushtet dhe ka vendosur në çdo zyrë të këtij vendi ku është bërë korrupsioni që e ka renditur Shqipërinë të parën në Europë në çdo raport ndërkombëtar, në çdo vlerësim, në çdo sondazh.

Kanabizimi, kthimi i Shqipërisë në Kolumbi ka ty autor edhe sot i jep pasojat në ekonomi çdo ditë, dhe nuk i përket një epoke tjetër. E kujton ti e mohove, na akuzove për shpifje. Kolumbi dhe Meksike e shndërrove Shqipërinë. Metamorfoza është dëshmi e meksikizimit të vendit.

Të njëjtën gjë ke bërë për çdo aferë të rëndë. A nuk të thamë ne për inceneratorët dhe ato pak media që nuk i drejton ti. Dhe ti çfarë bëre. Na akuzove ne se kemi lidhje me llumin, se nuk e duam pastërtinë dhe ke thënë në sytë e gjithë shqiptarëve se inceneratorët janë krenaria jote. Ku i ke sot inceneratorët. Skandali më i madh korruptiv në histori. 430 milionë euro që u janë marrë shqiptarëve e që i keni ndarë ju një grusht njerëzish.

Për koncesionet në shëndetësi. Ne ngritëm zërin. Ti na akuzove, dhe ke thënë në sytë e gjithë shqiptarëve që do ti bëje prapë. Pra e ke pranuar se je pronari faktik. Ku janë sot koncesionet.

Ne e dimë se ti je gati të mohosh këdo që kthehet në kërcënim për karrigen tënde, për pushtetin personal. Do mohosh edhe vëllain, jam i bindur, Këtu do jemi. Po Xibraka ka ndodhur. Dhe ka ndodhur në kohën kur ti vendosje në çdo zyrë të këtij vendi. Kur ti kontrolloje çdo rrugë e territor. Ka ndodhur në kohën kur Olsi nuk prekej e nuk identifikohej nga policia e prokuroria, sepse ishte vëllai yt.

Ti do ta mohosh. Çdo njeri je gati të mohosh. Po kurrë nuk mund të mohosh se në këto 11 vite nuk ke qenë ti kryeministri. Kurrë nuk do të mund ta mohosh se nuk ke vendosur ti në çdo zyrë. Pushteti yt ka pasur problemin jo se ka qenë i kufizuar dhe nuk ke mundur dot. Pushteti yt ka pasur problemin se ka qenë i pakufi. Në çdo hapësirë ka qenë i shtrirë dhe është. Kudo ku merren vendime për fonde e për tendera. Pushteti yt zgjatet në drejtësi, në media e kudo.

Të kërkosh ti sot, që ky parlament të të emërojë me një rezolutë si kalores anti-korrupsion është tallje e papërfytyrueshme.

Ti që ke blerë e ke korruptuar këdo për interesin e pushtetin tënd personal. Dhe aty ku nuk ke mundur ke përdorur dhunën e instrumentet e pushtetit. Këtë ke bërë me mediat.

Ti që korruptove një prej drejtuesve kryesor të FBI-së, për skenarin që kishe për asgjësimin e opozitës, korruptove shefin e kundërzbulimit të FBI i cili për shkak të korrupsionit tënd është sot në burg, pikërisht ti vjen sot dhe thua ti harrojmë 11 vite vjedhje e hajdutëri, dhe kërkon të të japim një mandat për qeverisje të mirë.

Po si mund të arrish deri këtu.

Ne e dimë se këta që të kanë shpallur Skenderbe e Odise, këta janë gati të të bëjnë edhe kalorës, kryqtar të luftës ndaj korrupsionit, këta mund të të pagëzojnë edhe si Karlin e Madh kundër abuzimit, Rikard Zemërluanin e korrupsionit mund të të bëjnë, se këta ti me një shtypje butoni i bën ti mohojnë, ti fshijnë 11 vite. Po kurrë nuk ja bën dot këtë opozitës dhe qytetarëve të këtij vendi.

Ne e dimë mirë se ti tentove të korruptoje, të blije dhe Opozitën, por nuk të eci.

Ti që the se je dakord me pikë e me presje për një nga vjedhjet më skandaloze në histori, atë të firmës 5D që dole hapur në mbrojtje të kësaj afere e pronarit faktik që është Erion Veliaj, dhe këtë e ke bërë vetëm pak javë më parë, ti vjen sot këtu dhe thua se nuk je ai. Vjen këtu dhe thua nuk je ti Edi Rama, je një tjetër tani që dashke të luftosh korrupsionin.

Ti që je korruptuesi dhe i korruptuari më i madh në histori.

Kërkon ti të shpallesh prijësi i qeverisjes së mirë, ti që bëre investitor strategjik në toka të vjedhura burrin e ministres tënde. Apo që bëre investitor strategjik kreun e një grupi kriminal që kishte porositur e organizuar disa vrasje.

Do të bëhesh ti udhëheqësi i mirëqeverisjes që ke pasur e ke bandat e vendit nga veriu në jug si shtabe elektorale për të kërcënuar qytetarët në zgjedhje, për t’u marrë shqiptarëve votën me forcë.

Po thua sot se nuk je ti Edi Rama që ndërsen SKAP in kundër liderit te opozitës Sali Berisha. Po e mban të burgos pa akuzë, ke urdhëruar kamikazin Dumani dhe në kundërshtim me ligjet ti ndaloj komunikimin se fjala e tij, ty të tërbon te nxjerr të palarat, ty dhe bandës tënde.

Pra vjen sot këtu, dhe thua kam munguar këto 11 vite, nuk e di se çfarë ka ndodhur me shqiptarët, nuk e di se ke përzënë 1 milionë vetë nga qeverisja jote, dhe thua më jepni një mandat tjetër më shpallni heroin e qeverisjes së mirë.

Po a ka tallje më të madhe se sa kjo.

Këtë amnisti, këtë falje, këtë indulgjencë ti Edi Rama nuk ke për ta marrë kurrë. Ligji do të të gjykojë për korrupsionin dhe krimin që ke bërë. Populli do të të gjykojë shumë shpejt për të këqijat që i ke sjellë këtij vendi.

Historia do të rezervojë me siguri një vend për ty, pasi për 3 mandate pengove, vonove integrimin europian të vendit.

Këtë falje, këtë amnisti, do të mund të marrësh vetëm para priftit, kur të vijë dita që të ndihesh i penduar.