“Rezoluta Antiruse”, mashtrim i radhës!
nga Agim Popoci
Me lançimin e fundit të “Rezolutës Antiruse” nga Edi Rama, për siç u tha, rritjes së ndërgjegjësimit për fushatat e dezinformimit të Rusisë, pasi ky i fundit përbën burimin kryesor nga i cili buron dezinformimi në rajon, Evropë e më gjerë, Kryeministri i Shqipërisë nuk dëshmoi se sa rrezikohemi nga shtetit rus por pse BE nuk i çel negociatat me NE!
Duke pasur përpara një partner joserioz si Edi Rama, BE nuk iu fut aventurës edhe me një shtet që drejtohet nga një njeri që vetëm kokëçarje mund ti shkaktoj Bashkimit Evropian ndërsa “kërcënimi” që i bëri dje Brukselit zyrtar me ofertën ruse, tregoi se kemi të bëjmë edhe me një person të paqëndrueshëm.
BE arriti të shoh Edi Ramën kur kundërshton anëtarësimin në NATO me mitingun e frikshëm të Partisë Socialiste dhe adhuruesit e Paktit të Varshavës që na tregonin se çfarë tmerri është të jesh anëtarë i Aleancës Veriatlantike. Panë se si varshavistët propagandojnë një anëtarësi që duhet të paguajmë për NATO dhe investimet e domosdoshme për të qëndruar në këtë Aleancë; Por me të ardhur në pushtet, varshavistët mbyllën gojën ndërsa komunistët e Edi Ramës filluan të trasojnë rrugën drejtë forcimit të një ushtrie shqiptare që do të jetë krenari e NATO-s.
Brukseli zyrtar pa dhe Edi Ramën me Partinë e tij Socialiste që kundërshtonte 4 ujgurët e strehuar në Tiranë, por me të ardhur në pushtet mori 3.000 muxhahedinë, rrezik ky shumë më i madh për sigurinë kombëtare se sa “ujgurët e Berishës”.
Ata, në portën e të cilëve po trokiste Edi Rama për të çel negociatat, kishin parë dhe storien me armët kimike, kur Kryeministri i Shqipërisë organizoi popullin liridashës për të mos pranuar armët siriane për asgjësim me arsyetimin se “SHBA e kishte me të futur”. E kush, SHBA, ajo që bëri shtetin shqiptar, atë të Kosovës, mbështeti luftën dhe paqen e shqiptarëve në Maqedoni, ata në Mal të Zi i vendosi në vendin e duhur, ndërsa qindra mijëra shqiptarë i priti dhe punësoi për të zhvilluar vendin e tyre amë, këtë vend i cili ishte dhe është nën kujdesin e Shteteve të Bashkuara.
Dhe, në fund, vetëm një ditë pasi Ambasadorja e re e SHBA, Yuri Kim, para Senatit amerikan tha se “sondazhe pas sondazheve tregojnë se mbështetja e shqiptarëve për SHBA-në mbetet më e larta në botë”, mediat në shërbim të Edi Ramës dalin pas refuzimit të çeljes së negociatave me BE, me lajmin se Shqipëria ka një ofertë ruse për anëtarësim në Bashkimin Ekonom Euroazian, EAEU. Sërish u aktivizuan varshavistët, duke harruar se, ndër të tjera, EAEU është dhe bashkim ushtarak i shteteve ndërkohë që Shqipëria është anëtare e NATO-s. Por lajmi mori dhen, manipulimi ishte i suksesshëm pa diskutim dhe u deshtë paraqitja e Kryetarit të Grupit Parlamentar të Partisë Socialiste, Taulant Balla, duke depozituar në Parlament Rezoltën për ndërhyrjet e huaja në proceset elektorale dhe dezinformimin në proceset demokratike kombëtare, për ta minuar këtë istikam diplomatike ruse që sajuan mediat rilindase dhe filloi të diskutohet ndër shqiptarë.
Sot, kur Edi Rama shqetësohet për “virus me anë të të cilit rusët mund të infektojnë gjithë kompjuterët në rajonin e Ballkanit”, dhe Ambasada e Rusisë në Tiranë reagon duke e quajtur “analfabetizëm kompjuterik” të atyre që hartuan Rezolutën në fjalë, oferta ruse për EAEU nga një diplomat rus analfabet që i ofron anëtarësim në Bashkimin Euroazian Ekonomik edhe një shteti anëtar të NATO-s, nuk është asgjë më shumë se sa një mashtrim i radhës.
Ky mashtrim bëhet edhe më i rëndë pasi, si “Rezoluta Antiruse” e Edi Ramës ashtu dhe reagimi i Ambasadës së Rusisë, nuk kanë kuptim jo në Shqipëri, ku mbështetja e shqiptarëve për SHBA mbetet më e larta në botë, por as në një vend si Mali i Zi ku 30 % e popullsisë, përveç se serbë janë dhe sovjetik të thekur.
Edi Rama me “virusët e tij rus” dhe Ambasadori rus me “dijeninë e madhe kompjuterike”, duhet ta dinë se nuk bëjnë dot më skena të tilla në këtë rajon, madje as filma idiotë me nëndetëse dhe Pasha Liman. Edi Rama dhe Ambasadori rus duhe ta dinë se Vladimir Putin, përkundër dëshirës së madhe për dalje në Adriatik pasi mori JO-në e Milo Gjukanoviçit u shqetësua shumë por nuk i interesoi infektimi i ndonjë kompjuteri malazez, ai tentoi ta vras Presidentin e Malit të Zi! Nuk e vrau dot, jo pse ky shtet është më i fuqishëm se Rusia, por sepse aty tashmë është SHBA me Presidentin Donald Trump.
Sot, Rezolutë Antiruse ose JO, pak rëndësi ka si për Shtetet e Bashkuara ashtu dhe për Bashkimin Europian, të cilat për të shtyrë proceset përpara duan një lidership serioz i cili të ardhmen e projekton pa krim dhe korrupsion, por dhe pa Rezoluta primitive që do ta bindin Washingtonin dhe Brukselin se sa fortë ju duam!
