Rezoluta e IDC-CDI rrëzon 11 Majin, Berisha: Të krijohet një qeveri teknike, të përgatit zgjedhjet e reja!

Duke bërë publike Rezolutën e miratuar nga Internacionalja Demokrate e Qendrës, IDC-CDI, organizata më e madhe politike globale që bashkon 108 parti të qendrës dhe qendrës së djathtë në të gjitha kontinentet, që rrëzoi zgjedhjet e 11 Majit, ndërsa thuhet që të krijohet urgjentisht një qeveri teknike për të përgatitur zgjedhjet e reja Kryetari i Partisë Demokratike, Sali Berisha, theksoj thirrje që CDI-IDC u bën autoriteteve shqiptare:

“1. Zbatojnë urgjentisht rekomandimet prioritare të OSBE/ODIHR, përfshirë ato mbi barazinë në fushatë, mediat dhe institucionet e paanshme;

2. Ndërpresin përndjekjen politike dhe të rikthejnë të drejtat e plota për liderët e opozitës;

3. Të krijojnë një qeveri teknike (kujdestare) për të mbikëqyrur reformat drejt BE-së dhe për të përgatitur zgjedhje të reja.”  

Fjala e plotë:

Farsa elektorale 11 Maj 2025 në Shqipëri mori një ndëshkim madhor ndërkombëtar nga organizata politike më e madhe në botë e partive të qendërs dhe qendrës së djathtë, Internacionalja Demokrate e Qendrës, e cila grupon së bashku 108 parti politike nga të gjithë kontinentet dhe që ka se sesion të saj në kontinentin evropian, Partinë Popullore Evropiane dhe partitë anëtare të saj.

Kjo organizatë botërore në konferencën e asamblesë të përgjithshme të saj, të mbledhur dy ditët e fundit në Abixhan, kryeqytetin e Bregut të Fildishtë, miratoi me unanimitet të plotë, pa asnjë kundërshtim, rezolutën për farsën elektorale të 11 Majit në Shqipëri.

Në këtë rezolutë, Internacionalja Demokrate e Qendrës denoncon botërisht atë që ndodhi me një 11 Maj në farsën e vendit tonë.

Në denoncimin e saj, ajo bazohet mbi të gjitha në raportin paraprak të vëzhguesve të OSBE/ODIHR, Asamblesë Parlamentare të OSBE, Parlamentit Europian dhe Asamblesë Parlamentare të Këshillit të Europës.

Natyrisht ajo është ndihmuar edhe me materialet e paraqitura nga përfaqësuesit e PD në konferencën e kësaj organizate, që janë zonja Albana Vokshi dhe zoti Belind Këlliçi.

Këtu më poshtë po lexoj tekstin për rezolutën.

Rezolutë mbi Zgjedhjet Parlamentare të vitit 2025 në Shqipëri.

‘Shqipëria: Integriteti Zgjedhor dhe të Drejtat e Opozitës’.

Propozuar nga Partia Demokratike e Shqipërisë-Shqipëri.

Unioni i Demokratëve të Qendrës dhe Internacionalja Demokrate e Qendrës (IDC-CDI),

Duke riafirmuar rëndësinë thelbësore që kanë zgjedhjet e lira dhe të ndershme për qeverisjen demokratike dhe për procesin e anëtarësimit të Shqipërisë në BE,

Duke rikujtuar rezolutat e mëparshme të PPE-së, IDU-së dhe IDC-CDI-së që kanë paralajmëruar për prapakthimin demokratik dhe keqpërdorimin e institucioneve nga Partia Socialiste (PS) në pushtet, 

Të alarmuar nga gjetjet e misioneve ndërkombëtare të vëzhgimit (OSBE/ODIHR, OSBE PA, APKE, Parlamenti Evropian) lidhur me zgjedhjet e 11 majit 2025, 

Shprehin shqetësim të thellë se këto zgjedhje ishin një farsë politike, që nuk përmbushën standardet ndërkombëtare dhe shkelën kriteret e Kopenhagenit, duke përfshirë: 

• Lirinë e votuesve për të zgjedhur (paragrafi 7.7 i Kopenhagenit): 

Votuesit iu nënshtruan presionit sistematik, survejimit, frikësimit dhe blerjes masive të votës. Qeveria shpërndau bonuse prej 100 euro për 760.000 pensionistë pak para zgjedhjeve; fali gjoba dhe borxhe mbi 200 milionë euro nga periudha 2015–2025 vetëm dy ditë para votimeve. U shpenzuan rreth gjysmë miliard euro për tendera, prokurime dhe koncesione në kundërshtim me ligjin, të gjitha me qëllim sigurimin e mbështetjes elektorale. Vota e fshehtë nuk u respektua në shumë qendra votimi, dhe klima u karakterizua nga frikë dhe presion, duke u mohuar qytetarëve të drejtën për zgjedhje të lirë. 

• Lirinë e shprehjes dhe aksesin në informacion (paragrafi 7.8 i Kopenhagenit):

 Kontrolli i partisë në pushtet mbi median, censura editoriale dhe ndalimi me motiv politik i platformës TikTok dëmtuan rëndë mundësinë e votuesve për të pasur qasje në informacion të balancuar dhe të larmishëm.

 Ndarja e partisë nga shteti (paragrafi 5.4):

 Partia Socialiste në pushtet i ka fshirë kufijtë midis shtetit dhe partisë, duke përdorur institucionet publike dhe burimet shtetërore për përfitim partiak, në kundërshtim me parimin që ‘shteti duhet të jetë i ndarë nga partia në pushtet’. 

Keqpërdorimi i burimeve publike: Qindra mijëra punonjës të administratës publike u vunë nën presion për të bërë fushatë përmes një ‘rrjeti patronazhist’ të shtrirë në të gjithë vendin, duke minuar konkurrencën demokratike.

Liria e votuesve për të zgjedhur (paragrafi 7.7): Votuesit u përballën me presion, survejim, frikësim, kërcënime, blerje vote dhe mungesë të sekretit të votës;

Pandëshkueshmëria institucionale: Rreth 200 kallëzime formale për krime zgjedhore pranë Prokurorisë së Posaçme dhe qindra denoncime në KQZ mbetën pa ndonjë reagim apo ndjekje penale.

IDC-CDI dënon manipulimin e procesit zgjedhor përmes: 

Kapjes së shtetit dhe bashkëpunimit kriminal në frikësimin e votuesve dhe manipulimin e rezultateve;

 Përndjekjes gjyqësore ndaj liderëve të opozitës, përfshirë Sali Berishën, Ilir Metën, Fatmir Mediun, Ervin Salianjin dhe Fredi Belerin;

Pandëshkueshmërinë institucionale, me mbi 30 kallëzime formale për krime zgjedhore pranë Prokurorisë së Posaçme dhe qindra denoncime në KQZ, pa ndonjë ndjekje ligjore.

 IDC-CDI u bën thirrje autoriteteve shqiptare që të:

Zbatojnë urgjentisht rekomandimet prioritare të OSBE/ODIHR, përfshirë ato mbi barazinë në fushatë, mediat dhe institucionet e paanshme; 

Ndërpresin përndjekjen politike dhe të rikthejnë të drejtat e plota për liderët e opozitës;

 Të krijojnë një qeveri teknike (kujdestare) për të mbikëqyrur reformat drejt BE-së dhe për të përgatitur zgjedhje të reja;

 Sigurojnë pluralizëm real mediatik dhe akses të barabartë në media për të gjitha forcat politike.

 CDI- IDC:

 Shpreh solidaritet të fuqishëm me Partinë Demokratike të Shqipërisë (PD-ASHM) dhe të gjithë aktorët civilë që mbrojnë demokracinë;

 U bën thirrje anëtarëve të CDI-së të dërgojnë një mision për verifikim faktesh dhe vëzhgimi në Shqipëri për të vlerësuar ecurinë e zgjedhjeve, për t’u takuar me aktorët përkatës dhe për të dhënë një vlerësim të pavarur mbi përputhjen me normat demokratike;

 I bën thirrje BE-së që të kushtëzojë përparimin e Shqipërisë në procesin e anëtarësimit me reforma konkrete zgjedhore dhe demokratike;

Paralajmëron se konsolidimi autoritar dhe ndikimi kriminal në Shqipëri përbëjnë rrezik serioz për demokracinë e brendshme dhe për stabilitetin rajonal.

 Asambleja e Përgjithshme, Abixhan, 30.05. 2025.

 Siç e shihni pra, populli opozitar në Shqipëri ka marrë dje me këtë rezolutë mbështetjen më të fuqishme ndërkombëtare për kauzën e vet të drejtë.

Kjo rezolutë e 108 forcave politike, më e madhja në botë, denoncon farsën e 11 Majit si një farsë të shëmtuar, ku u shkelën një nga një parimet themelore ndërkombëtare të zgjedhjeve të lira. 

Në këtë forum botëror kanë gjetur mbështetje të plotë kërkesat e PD-së për qeveri teknike dhe zgjedhje të reja.

Në këtë kuadër, në këtë kontekst, rezoluta është një frymëzim madhor për të gjithë shqiptarët që e konsiderojnë Edi Ramën një armik të egër, të papajtueshëm me votën e tyre. 

Që e konsiderojnë votën e lirë, themelin e një sistemi demokratik dhe kushtin e të gjitha kushteve për të ardhmen e tyre.

Një mirënjohje të pakufishme ndaj presidentit Pastrana, zëvendëspresidentëve dhe kryesisë, në të cilën është edhe presidenti i PPE, Manfred Veber dhe të gjithë atyre përfaqësuesve të 108 partive politike që dolën në krah të qytetarëve shqiptarë në mbrojtje të votës së tyre të lirë. 

Kjo është një arritje madhore, e cila regjistrohet pa u tharë boja mirë në procesverbalet e farsës më të shëmtuar elektorale të 32 viteve të fundit në Shqipëri.

Kjo rezolutë është një apel, një kushtrim për popullin opozitar për të luftuar dhe sakrifikuar, për të paguar çdo çmim për votën e lirë, duke i garantuar se në këtë betejë nuk janë vetëm, por janë së bashku me mbarë partitë e qendrës dhe qendrës së djathtë në Europë dhe në botë. 

Kjo rezolutë i jep goditje fatale narkoqeverisë shqiptare, Edi Ramës, altoparlantëve të tyre në media, të cilat si mercenarë të fjalës së lirë, përpiqen t’u shesin shqiptarëve farsën për proces zgjedhor.

Përpiqen të justifikojnë, përpiqen të mashtrojnë dhe të dezinformojnë shqiptarët me të njëjtin pasion patologjik që kanë bërë gjatë fushatës elektorale dhe para saj.

Kjo rezolutë denoncon me forcën më të madhe Skapin e partisë, këtë organ politik të narkodiktaturës, e cila me urdhër politik persekuton liderët e opozitës shqiptare dhe refuzon të hetojë krimet monstruoze elektorale, pra, ka vendosur pandëshkueshmërinë.

Kjo rezolutë denoncon policinë dhe të gjitha institucionet e këtij shteti, që në dhunim flagrant të Kushtetutës dhe ligjeve, u rreshtuan si institucionet e partisë shtet. 

Edhe njëherë, një mirënjohje të pakufishme të gjithë aleatëve, partnerëve tanë në Europë dhe botë për qëndrimin e tyre dje në mbështetje të kauzës së zgjedhësve shqiptarë për votën e tyre të lirë.

PYETJE PERGJIGJE ME GAZETARET:

Ermal Rizaj, SYRI TV: Mos të gaboj kjo është rezoluta e dytë që Internacionalja Demokratike e Qendrës miraton sa i takon situatës në Shqipëri. Sa ndryshon rezoluta e parë nga rezoluta e dytë dhe çfarë garancish ju jep juve që të keni suksesh përballë mazhorancës socialiste, ku denoncohen dhe ato që keni thënë ju për farsën elektorale.

Sali Berisha: Është e vërtetë që kjo është rezoluta e dytë, e para është në tetor.

Rezoluta e parë e paralajmëron farsën me të gjithë shëmtinë e saj.

Rezulota e dytë bazohet në raportet e institucioneve ndërkombëtare pas zhvillimit të farsës, dhe kjo rezolutë me fakte konkrete denoncon shkeljen e parimeve ndërkombëtare të zgjedhjeve të sanksionuara në dokumente ndërkombëtare.

Pra, ajo e paralajmëroi kurse kjo e denoncoi zhvillimin e kësaj farse.

Kështu ndodh dhe me rezolutën e Valencias. Ajo i ka të gjitha këto. Por rezoluta e Velancias në datën 30 prill, ishte në fund të fushatës, i kishte mbledhur elementët e fushatës.

Tani kjo është pasi u zhvillua fushata, zgjedhjet, dhe faktikisht kjo konludon siç kishte paralajmëruar se, u zhvillua në Shqipëri një farsë elektroale.

Çfarë tregon kjo? Kjo tregon se prozhektorët e komunitetit ndërkombëtar, të organizatave partiake politike janë non stop mbi Shqipërinë, narkoshtetin shqiptar.

Isa Myzyraj, OraNews: Pika e parafundit e kësaj rezolute i bën thirrje Bashkimit Europian për të kushtëzuar përparimin e Shqipërisë në procesin e anëtarësimit me reforma konkrete zgjedhore demokratike. A i druheni një aksioni të kundërshtarëve tuaj, se ju jeni duke lobuar kundër anëtarësimit të Shqipërisë në Bashkimin Europian dhe cila është përgjigja juaj.

Sali Berisha: Përkundrazi, ne po ndihmojmë, po kontribuojmë shumë në integrimin e Shqipërisë në BE. Në qoftë se BE është bashkim i vendeve të lira dhe demokratike, qeveritë e këtyre vendeve duhet të zbatojnë me rigorozitet parimet themelore të demokracisë dhe të drejtave të njeriut.

Rezoluta nuk kërkon asgjë tjetër përveçse zbatimin e këtyre parimeve. Unë mendoj se kjo rezolutë dhe qëndrimi ynë, duke evidentuar të vërtetat e hidhur dhe jo fshehur, është kontribut real në udhëtimin e Shqipërisë drejt BE.

Daniela Maloku, ReportTV: Për të qëndruar te përpjekja e PD-së dhe kandidatëve të saj, për të vërtetuar atë që e konsideron farsë elektorale. Ditën e djeshme Komisioni i Ankimimeve dhe Sanksioneve ka rrëzuar kërkesat e disa kandidatëve të PD për të bërë numërim në qarqe ku ato pretendojnë se ka trafik të votës, mes tyre kanë qenë dhe dy përfaqësuesit e PD në KAS. Si e ka lexuar Sali Berisha këtë vendim dhe a ka qenë e gatshme PD, a u ka ofruar ndihmën e saj ligjore këtyre kandidatëve që kërkesat të bëheshin në emër të subjektit politik.

Sali Berisha: Tani, ajo është zhurmë për asgjë. Pse? Ua shpjegoj unë.

Në vitin 2019, një ndryshim i kodit zgjedhor, por e vërteta i mbështetur nga Komisioni i Venecias dhe ODIHR-i, ka hequr të drejtën e kandidatëve që të paraqesin ankesa të kësaj natyre.

Nuk ekziston ajo e drejtë nga viti 2019 e këndej për kandidatin.

Komisioni i Venecias, ODIHR dhe kodi ynë, këtë të drejtë ua njohin subjekteve politike.

Subjektet politike investohen edhe për kandidatin.

Këta kandidatë të nderuar kanë ndjekur një rrugë të këshilluar, nuk mund të them pasi përfaqësuesit tanë ua kanë bërë të qartë edhe interpretimin e thirrjes time, që duhet t’i bëjnë nëpërmjet partisë, por brenda platformës së miratuar nga partia.

Në ç’kuptim?

Në qoftë se partia ka kërkuar paligjshmërinë e zgjedhjeve, e para kërkesë që shqyrtohet është paligjshmëria.

Pas kësaj, partia merr dhe paraqet një nga një kërkesat e kandidatëve.

Disa kandidatë që kanë kërkuar rinumërim i kanë depozituar pranë përfaqësuesve të partisë në KQZ dhe presin momentin e vlerësimit që partia ka për X qark dhe pastaj do paraqiten ankesat e tyre.

Edhe për kandidatët e Tiranës, ata u informuan dje përsëri se rruga që kanë ndjekur është një rrugë që nuk ka mbështetje ligjore.

Përfaqësuesit tanë në KAS kanë zbatuar ligjin.

Ata nuk mund të votonin për një akt që është hequr me ligji.

Këta të katërt kanë të drejtë të depozitojnë ankesën tanë pranë përfaqësuesve tanë në KQZ dhe ata do e paraqesin siç dëshirojnë kërkesën pranë KQZ-së.

Pra, ka qenë vetëm një keqkuptim nga ana e tyre.

Në qoftë se nga unë është thënë dy herë se çdo kandidat që mendon se i duhet transparenca, do mbështetet nga partia, duhet të respektojë këtë platformë që ka përcaktuar partia në përputhje me ligjin elektoral.

Daniela Maloku, ReportTV: Ky keqkuptim a nuk është favorizuar në një farë forme edhe nga deklarata tuaja publike ku jeni shprehur se, kandidatët le ti drejtohen KQZ-së …

Sali Berisha: Deklaratat e mia publike kanë qenë dhe janë që partia do i mbështesë.

Në qoftë se partia tjetër nuk i lejoi, siç e dini, e kundërta është qëndrimi ynë.

Ne mbështesim cilindo që kërkon transparencë dhe gjen argumente.

Kjo është.

Aty ka pasur vetëm një keqkuptim nga ana e tyre.

Ata nuk duhet të humbasin kohën, t’i paraqesin ato që kanë paraqitur në KAS, pranë përfaqësuesve tanë në KQZ, që përfaqësuesit tanë për qarqet që kanë marrë vendime për vlefshmëri apo pavlefshmëri, të procedojnë me shqetësimet e tyre.

Elda Menga, TCH: Teksa ju po luftoni që të përsëriten zgjedhjet përmes një qeverie teknike, aleati juaj në burg, Ilir Meta po mendon për zgjedhjet lokale, duke paralajmëruar se do të garojë me siglën e vet dhe jo të PD. A ka një krisje mes jush, sepse edhe kohët e fundit ka patur një verdikt sa i  takon pozicionit të tij juridik duke u shpallur i pandehur, ndërkohë që nuk ka pasur një reagim nga ana juaj.

Sali Berisha: Ilir Meta është një i burgosur politik. Për Partinë Demokratike dhe Aleancën për Shqipërinë Madhështore ai është një i burgosur politike. Ky është mendimi ynë. Pastaj për zgjedhjet e tjera, çdo forcë politike bën zgjedhjet e vet.

Kjo aleancë vetëkuptohet që ishte një aleancë për këto zgjedhje.

 Isa Myzyraj, OraNews: Kryetari i grupit parlament Gazment Bardhi, ka akuzuar presidentin e Republikës, Bajram Begaj që është duke ndërhyrë në procesin e zgjedhjeve përmes këshilltarit të tij juridik, Ilir Rusmajli. Cila është thirrja juaj për Presidentin e Republikës dhe a e ndani dhe ju të njëjtin shqetësim për institucionin e presidentit në vetëvete.

Sali Berisha: Që Presidenti i Republikës është i detyruar të zbatojë ligjin dhe që duhet të jetë njeriu i parë për të zbatojë ligjin, kjo besoj se nuk ka nevojë për koment.

Dhe që këshilltarit të Presidentit të Republikës nuk i lejohet asnjë detyrë tjetër, kjo është e sanksionuar në ligj. Dhe që Presidenti e shkel me dy këmbë ligjin, në rast se mban këshilltarin që punon dhe në KAS, vetëkuptohet.

Gazment Bardhi ka thënë një të vërtetë që është thënë dhe më përpara, po presidenti ka preferuar të mos zbatojë ligjin. Nuk e lejon ligji, lexoni ligjin. Por këta nuk kanë ligj e as Maliq. Nuk kanë këta, skanë gjë me ligjin. Ligji është një letër e vdekur për ta. 

Isa Myzyraj, OraNews: Në fillim të javës keni paralajmëruar një kallëzim në SPAK për Komisionerin Shtetëror të Zgjedhjeve Ilirjan Celibashi në lidhje me nënkontraktimin që i ka bërë DHL-ja në Greqi. A janë duke u marrë juristët tuaj me këtë kallëzim dhe a pritet që gjatë javës së ardhshme të dorëzohet një kallëzim në SPAK për këtë nonkontraktim të paligjshëm që është bërë.

Sali Berisha: Çfarë rëndësie ka kjo, u bë apo nuk u bë kallëzimi, kur SPAK i fut të gjitha turshitë. A e ke marrë vesh që është një vegël e verbër e Edi Ramës dhe partisë shtet. Urdhëro çfarë thotë rezoluta; është dënim ndërkombëtar i SPAK-ut këtu.

Isa Myzyraj, OraNews: Pra nuk do çoni më kallëzime në SPAK?

Sali Berisha: As pohoj e as mohoj, por formaliteti nuk ka asnjë vlerë. Është një akt formal. Ja çfarë thotë rezoluta për SPAK-un e Edi Ramës. Një institucion kryekëput i varur nga qeveria, që nuk praktikon persekutimin e opozitës dhe impunitetin ndaj krimeve elektoral. SPAK-u del këtu siç është.

Ato që i kemi thënë i merr këtu SPAK-u.

Isa Myzyraj, OraNews: A është duke amnistuar Ilirjan Celibashin në këtë rast?

Sali Berisha: Absolutisht jo, nuk amnistojmë asnjeri. Por amnistinë dhe impunitetin e ka vendosur Edi Rama me mercenarët e tij në Skap. A e sheh çfarë thotë, janë dërguar 200 ankesa, 30 padi, asgjë prej gjëje. Nuk ka.

Në qoftëse ka një organ që del i deskridituar në shkallë ekstreme pas Edi Ramës është Skapi. Pas qeverisë del Skapi këtu. Mësojeni.

Faleminderit dhe një fundjavë të mbarë.