Rezoluta e Kosovës për Srebrenicën: Vuçiç: E pritshme!

Pas miratimit të rezolutës nga Parlamenti i Kosovës ku dënohet gjenocidi në Srebrenicë, ka reaguar Presidenti i Serbisë, Aleksandar Vuçiç, duke theksuar se ishte e pritshme por shtoi se është befasuar që një rezolutë të tillë e ka miratuar edhe Parlamenti i Malit të Zi.

“Rezoluta të tilla do të vazhdojnë. Ne mund t’i shmangim ato në disa parlamente, falë marrëdhënieve miqësore, por disa do të vazhdojnë me abuzimin politik të serbëve,” tha Vuçiç gjatë një vizite në një spital të Beogradit, kohë kur Parlamenti i Kosovës miratoi Rezolutën.

Gjykata Ndërkombëtare e Drejtësisë në Hagë ka konstatuar në vitin 2007 se masakra në Srebrenicë ka përbërë gjenocid.

Masakra është cilësuar si më e rënda në Evropë që pas Luftës së Dytë Botërore.

Nga vendet e Ballkanit, Maqedonia e Veriut ka miratuar një rezolutë për dënimin e gjenocidit në Srebrenicë në vitin 2010, ndërsa Shqipëria, deri më tani, nuk ka miratuar ndonjë dokument të ngjashëm.

Një rezolutë që ndalon mohimin e gjenocidit në Srebrenicë u miratua në Parlamentin e Malit të Zi më 17 qershor.

Në Parlamentin e Serbisë janë dy rezoluta: në njërën kërkohet që Srebrenica të dënohet si krim, kurse në tjetrën si gjenocid. Diskutimi për to nuk është futur ende në rend të ditës.

Ndryshe, Parlamenti i Kosovës e miartoi sot rezolutën për Srebrenicën, ku forcat serbe të Bosnjës vranë mbi 8,000 burra dhe djem myslimanë, gjatë luftës në Bosnje e Hercegovinë, më 1995.