Rezoluta për Srebrenicën, Vuçiç karshillëk Perëndimit: Kuvendi i Madh Serb më 8 Qershor në Beograd!

Pasi u caktua data e mbajtjes së seancës së Asamblesë së Përgjithshme të Kombeve të Bashkuara më 23 Maj, ku do të diskutohet Rezoluta për Srebrenicën ndërsa pritet të shpallet 11 korriku “Ditë Ndërkombëtare e Kujtimit dhe Shënimit të Gjenocidit të vitit 1995 në Srebrenicë”, dy kriminelët serbë, Presidenti i Serbisë, Aleksandar Vuçiç, dhe ai Republika Srpska, Milorad Dodik, kanë vendosur të mbajnë Kuvendin e Madh Serb, më 8 Qershor në Beograd.

Kuvendi i Madh Serb, si ide e kriminelit Miorad Dodik, i shpallur non grata nga Shtetet e Bashkuara, për t’iu përgjigjur Perëndimit i cili u angazhua në miratimin e Rezolutës për Srebrenicën në OKB, fillimisht ishte menduar të zhvillohet në Ditën e Pashkëve Ortodokse, por, meqë seanca e Asamblesë së Përgjithshme të OKB u shty, edhe data e Kuvendit të Madh Serb u shty deri në përcaktimin e seancës në Kombet e Bashkuara.

Ndryshe, Kuvendi i Madh Serb është vijimësi e idesë së Ish-Shefit të Shërbimit Sekret Serb dhe Zv/Kryeministrit aktual të Sebisë, kriminelit Aleksandar Vulin, i shpallur non grata nga Shtetet e Bashkuara, “Bota Serbe”, ndërsa çdo ditë në tokën kosovare po zbulohen depo armatimi të paramilitarëve serbë pas sulmit terrorist të 24 shtatorit, ku mbeti i vrarë oficeri i Policisë së Kosovës, Afrim Bunjaku.

Zv/Kryeministri aktual i Serbisë, Aleksandar Vulin, nxori kokën edhe pas mitingut kuq e zi të Kryeministrit Edi Rama në Athinë, duke u shprehur se “Shqipëria e Madhe mund të ndalet vetëm nga serbët dhe bota serbe”.

Sot Ministria për Evropën dhe Punët e Jashtme u tha në Tiranë se Ambasadori i Serbisë, Slobodan Vukçeviç ishte thirrur për sqarime në lidhje me këtë deklaratë, gjithsesi, ajo që i bashkon Vuçiçin, Dodikun, Vulinin dhe Ramën është angazhimi për “Serbinë me Rusi, në Evropë”!