Rikthehet abuzimi me Unitet Kombëtar!
nga Agim Popoci
Pasi erdhi në pushtet duke abuzuar me Unitetin Kombëtar me premtimin e rilindjes, ashtu si paraardhësit e tij në luftën kundër fashizmit që shkelmuan Mukjen dhe sollën diktaturën duke përmbytur tokën shqiptare në gjak; Ia falën tokën kosovare Serbisë dhe bënë nul Bujanin; Ulën gjakrat pas kryengritjes komuniste të vitit 1997 me piramidat dhe rikthyen komunizmin ; I ndezën sërish këto gjakra në Janarin e vitit 2011 me korrupsionin e Ilir Metës, dhe i shuan dy vjet më vonë duke ardhur në pushtet; Në Ditën e Evropës, ndonëse deri më sot asnjë nuk u përgjigj para drejtësisë për abuzimin me Unitetin Kombëtar edhe pse lanë pas shumë dëme kombëtare duke përfshirë edhe dëme në njerëz, Kryeministri sërish i rikthehet kërkesës për Unitet Kombëtar, për ti dhënë një mesazh të fortë Brukselit me qëllim të integrimit në Bashkimin Evropian.
Nuk ka asgjë të keqe kur një Kryeministër shprehë vullnetin që të ulet në një tryezë me Presidentin e Republikës, kryetarin e opozitës dhe përfaqësues të institucioneve të pavarura për të dhënë edhe një mesazh të fortë të unitetit kombëtar, tashmë kur i është dhënë drita jeshile çeljes së negociatave me Bashkimin Evropian.
Por, kur këtë e bënë Edi Rama që vjen nga partia komuniste e cila abuzoi me këtë Unitet, pa dhënë llogari për bëmat e tij kriminale me “Kombëtaren”, kjo thirrje nuk mbanë më erë, por, kutërbon.
Thirrjen për Unitet Kombëtar e bënë edhe më kriminale miratimi i menjëhershëm që i bënë Ilir Meta si President i Republikës, njëri ndër abuzuesit më të mëdhenj të këtij Uniteti pas Enver Hoxhës!
Nuk është e qartë se si mund të kërkoj Uniteti Kombëtar Edi Rama pas marrëveshjes për koalicion të vitit 2013 me Ilir Metin me ndërmjetësimin e Ish-Presidentit të Serbisë, Boris Tadiç, kur kërkoi unitet për të rrëzuar Sali Berishën dhe rilindur kombin, dhe rilindi vetëm krimin, korrupsionin dhe instalimin e Beogradit në Tiranë.
Sot Edi Rama dhe Ilir Meta kërkojnë Unitet Kombëtar ndërkohë rrugën e vetme që kishte ky komb për tu lidhur, ia shiti Qet Kastratit pa kurrfarë uniteti kombëtar!
Sot Edi Rama dhe Ilir Meta kërkojnë Unitet Kombëtar kur në emër të këtij uniteti ata i futën kazmën Sistemit të Drejtësisë, i cili sot është pa Gjykatë Kushtetuese dhe pa Gjykatë të Lartë.
Sot Edi Rama dhe Ilir Meta kërkojnë Unitet Kombëtar kur në emër të këtij uniteti filluan reformën në Polici dhe përfunduan me një polici partiake ndërsa njeriu i cili kryesoi reformat, nga kryetar i një dege partie të bëhet organizator i një grupi të struktura kriminal që për bashkëpunëtor kishte njerëzit që kanabizuan vendin.
Sot Edi Rama dhe Ilir Meta kërkojnë Unitet Kombëtar kur në emër të këtij uniteti premtuan “shëndetësinë falas” dhe filluan reformën në Shëndetësi, dhanë me PPP gjithçka që u ra ndër mend ndërsa unitetin e harruan për gjithmonë! Dhe, tani në kohë pandemie, të gjithë ata që kishin nderin të sëmuren ose kërkojnë kujdes shëndetësor ndonëse nuk ishin prekur me COVID-19, e kuptuan se asgjë nuk ishte falas, madje as ato shërbime që i gëzonin para se të vinte Uniteti i Madh Kombëtar me Marrëveshjen e Shkodrës në vitin 2013, ndonëse edhe në atë kohë ekzistonte Spitali Amerikan!
Sot Edi Rama dhe Ilir Meta kërkojnë Unitet Kombëtar për anëtarësim në Bashkimin Evropian por këtë nuk e kërkuan kur deshën t’ia falnin Serbisë një pjesë të Kosovës edhe pse ishte pronë kombëtare! Përveç akuzave ndaj disa liderëve kosovarë asgjë nuk u dëgjua nga këta ithtarë të Unitetit Kombëtar!
Sot Edi Rama dhe Ilir Meta kërkojnë Unitet Kombëtar ndërkohë për Mini Shengenin e Aleksandar Vuçiçit nuk kërkuan unitet, por ishin të gatshëm ta japin tokën, ujin dhe ajrin shqiptar në shërbim të Serbisë, pa e çarë kokën nëse duhet ose jo një unitet për një vendim të tillë qoftë edhe për të mirën e kombit, siç është sot anëtarësimi në BE.
Sot Edi Rama dhe Ilir Meta kërkojnë Unitet Kombëtar ndërkohë Teatrin e vetëm që kishte ky komb ia fali Bashkisë Tiranë, pa e vrarë mendjen për ndonjë unitet që duhet për ta marrë këtë vendim mbi artin, kulturën dhe trashëgiminë kombëtare!
Sot Edi Rama dhe Ilir Meta kërkojnë Unitet Kombëtar ndërkohë Stadiumin Kombëtar e dhanë në shërbim të një biznesi pa kërkuar ndonjë unitet nëse duhet të falet diçka nga kombëtarja jonë për hir të një kulle!
Dhe, sot Edi Rama dhe Ilir Meta bëjnë thirrje për Unitet Kombëtar me qëllim të integrimit në Bashkimin Evropian, pa kërkuar falje dhe pa u sqaruar pse mungonte kjo thirrje kur njëra ndër kërkesat kryesore të çeljes së negociatave me BE, për 2 vjet, ishte zhbllokimi i Këshillit Bashkiak të Fierit ndërsa ishte bllokuar dhe ngeli e tillë, pikërisht nga Rama dhe Meta! Apo çelja negociatave me Bashkimin Evropian nuk mund të quhej çelje përderisa në pushte nuk ishin komunistët. Siç u trajtua dhe anëtarësimi në NATO, me protesta!
Në fund, thirrja për Unitet Kombëtar siç e mendon Kryeministri Edi Rama nuk mund të thuhet me siguri se nuk do të jetësohet përderisa nëpër këmbë kemi protagonistë të tillë ndërkombëtarë dhe Evropën që nuk e ka ndryshuar gjykimin për shtetin shqiptar. Ama një gjë është e sigurt, Unitet Kombëtar nuk do të jetë, ashtu siç ishte në të kaluarën tonë kombëtare!
Dhe, integrim evropian nuk do të jetë me këtë lloj Uniteti Kombëtar edhe nëse kështu e konsideron Brukseli zyrtar. Të tilla i vlerësoi dhe reformat e fundit që u zbatuan nën syrin vigjilent të BE, por Evropa për shqiptarët rezultoi po ajo e shumë viteve më parë, siç e kishte përkufizuar patrioti i madh, At Gjergj Fishta:
Uh! Evropë, ti kurva e motit!
Që i re mohit, besës së Zotit!
Po, á ky asht sheji i qytetnisë?
Me da token e Shqypnisë,
Për me mbajt klyshtë e Rusisë?
