Rikthim i arsyeshëm, Rama: Rekomandimet e OSBE/ODHIR-it do integrohen në Ligjin Zgjedhor

Pas konkluzioneve të miratuara në takimin i cili u zhvillua sot me përfaqësuesve e mazhorancës dhe opozitës së bashkuar, Kryeministri Edi Rama duke përgëzuar këtë, siç tha, rikthim të arsyeshëm në tryezën e dialogut, sqaroi se të gjitha rekomandimet e OSBE/ODHIR-it do integrohen në Ligjin Zgjedhor.

“Përtej më shumë se një viti të humbur në rrugën e konfliktit të çuar deri në ekstremin e mosarsyes, duhet përgëzuar ky rikthim i arsyeshëm në tryezën e dialogut për shkallën e parë të Reformës Zgjedhore, ku të gjitha rekomandimet e OSBE/ODHIR-it do integrohen në Ligjin Zgjedhor,” tha Edi Rama përmes rrjetit social Twitter.

Ndryshe, Reforma Zgjedhore duhet të përmbyllet deri më 15 mars 2020 ndërkohë do të formohet Këshilli politik me përfaqësues të opozitës, drejtuesve të Komisionit të Reformës dhe përfaqësues të grupeve parlamentare, janë këto dy konkluzionet e arritura në takimin për Reformën Zgjedhore i cili u zhvillua sot me përfaqësuesit e mazhorancës dhe opozitës së bashkuar.