Rikthimi i votës/ Basha në Pogradec: Më 16 shkurt, fund grushtit të shtetit

Kryetari i Partisë Demokratike, Lulzim Basha në turine takimeve nëpër Shqipëri edhe në qytetin e Pogradecit konstatoi një situatë të rënduar ekonomike dhe sociale, pas takimeve që zhvilloi me biznesin dhe qytetarët.

5000 biznese janë mbyllur në një vit nga taksat, 400 familje janë hequr nga ndihma ekonomike ndërkohë Edi Rama me pesë veta vjedhin të gjithë shqiptarët.

“Kur erdhi Edi Rama na tha se do të ulë energjinë dhe nuk e uli dhe detyrohem unë dhe mbaj drita fikur. Ndriçimi e bën mallin të duket bukur. Unë s’i mbaj dot,” tha një tregtarë gjatë takimit me Lulzim Bashën por ky e sqaroi se Edi Rama nuk e ka lidhur fatin me qytetarin.

“Edi Rama nuk ka mbajtur premtimet sepse ato nuk ishin premtime, nuk ishte program ekonomik. Ai votën e ka marrë me banditët. Ai votën tënde s’ka nevojë ta mbaj. Ne e kemi lidhur fatin me ju. Kjo është garancia sepse ajo që themi nuk është premtim, por është plan. Ne nuk do të vijmë në pushtet me votën e krimit,” tha Basha duke shtuar se ai nuk ishte ulur ndonjëherë me krimin, dhe nuk bënë pushime me oligarkë.
“Duhet të bësh dallimin e një force politike që vjen me program, jo me premtime, që e lidh fatin me ty. 16 shkurti do të rikthejë votën dhe do t’i japë fund grushtit të shtetit.”

Me këtë rast kryetari i Partisë Demokratike premtoi se me te ardhur ne pushtet do te anulohet Ligji abuziv aktual të Pronës i cili ka hequr kompensimin me vlerë tregu.

“Ne kemi çuar në Strasburg kundërshtimin për Ligjin e Pronave. Nuk duhet kërkuar nga opozita atë që ka në dorë qeveria. Të garantoj e kam thënë dhe po e përsëris, Ligji që ata kanë bërë për të hequr kompensimin me vlerë tregu, është rishpronësim. Atë që e bëri Enver Hoxha para 60 vjetësh, e bën edhe ky Ligj. Në do ta rrëzojmë këtë Ligj dhe ne do t’ju dëmshpërblejmë me vlerë tregu,” tha Basha para pogradecarëve duke theksuar se këtë e ka shpallur edhe më parë:

“Shpeshherë mesazhet e opozitës bien pre e propagandës së qeverisë. Kemi pesë vjet që e themi se ky Ligj do të anulohet dhe ju do të dëmshpërbleheni me vlerë tregu. Këtë Ligj e kemi çuar në Strasburg për ta luftuar dhe do të vazhdojmë të luftojmë. Ditën kur të na besoni me votë, do ta anulojmë këtë Ligj. Ne jemi parti e pronës. Ju keni në dorë votën ne kemi në dorë ofertat politike,” tha Basha duke u bërë thirrje qytetarëve të Pogradecit që më 16 shkurt t’i bashkohesh protestës në Tiranë.

“Asgjë nuk do të zgjidhet nëse në krye të vendin ke një njeri që i trajton njerëzit si qenër. Sepse, paratë tuaja i fut në xhepat e tij. Asgjë nuk zgjidhet nëse nuk jemi bashkë. Nëse jemi bashkë do të keni një qeveri që ju shtrin dorën!”