Rindërtimi/ Edi Rama konstaton vjedhjen e kryebashkiakëve, kërkon ndihmë nga opozita!

Pasi u bëri të qartë kryebashkiakëve që kishte përballë, me rastin e prezantimit të Platformës Online për qytetarët që përfitojnë nga programet e rindërtimit, se është në dijeni se ka shembuj se si proceset e rindërtimit janë kthyer në histori të turpshme dhe i garantoi ata se do të ndëshkohen, Kryeministri Edi Rama, ftoi opozitën që të denoncojë këto raste, ku shtëpi marrin edhe ata që nuk janë prekur nga tërmeti tragjik i 26 nëntorit.

Por nuk do të quhej Edi Rama sikur ftesa do të ishte e natyrshme! Ai ftoi opozitën të shpifin, sepse me logjikën e tij, mes shpifjeve do ketë mundësi të gjen dhe ndonjë të vërtetë.

“Këtu e ftoj opozitën që të dalë e të vëri ulërimën për çdo rast spekulimi individual. E ftoj të na shurdhojnë me shpifje, por mes shpifjeve, siç ka ndodhur në të shkuarën, do kemi mundësi të gjejmë dhe ndonjë të vërtetë për ta adresuar. Jam i gatshëm të përballoj një furi ekstra shpifjesh, qoftë dhe për një rast të vetëm të një familjeje që është lënë jashtë apo është keqtrajtuar, duke mos u përfshirë në proces,” tha Edi Rama ky luftëtar i paepur kundër shpifjes, i cili harxhoi gjithë atë energji dhe shkaktoi gjithë ato reagime për të hartuar dhe miratuar Paketën Antishpifje, për të hequr dorë në fund nga kjo paketë ligjore duke kërkuar së fundi edhe ndihmën pikërisht nga SHPIFJA! 

Ndryshe, sot me rastin e prezantimit të Platformës Online, Edi Rama tha se ka shembuj se si proceset e rindërtimit janë kthyer në histori të turpshme dhe për të evituar këtë dukuri është ndërtuar kjo platformë transparente ndërsa përfundoi:

“Ky nuk është proces për të bërë qoka, apo për të strehuar njerëz që nuk janë strehuar nga tërmeti, ky është proces për të prekurit nga tërmeti,” tha Kryeministri Edi Rama duke konstatuar shkelje ligji por duke u lutur si klerik fetar e jo si  Kryeministër që i ka emëruar këta njerëz në krye të bashkive ku vetëm zgjedhje nuk kishte:

“Mos hyni në gjynah!”