Rindërtimi, KKT miraton planin vendor për Zonën “5 maji” në Tiranë, kalon edhe…

Këshilli Kombëtar i Territorit, KKT, ka kaluar në mes të majit dy vendime që i hapin dritë të gjelbër planeve vendore të lidhura me rindërtimin. Konkretisht ka kaluar vendimi “Për miratimin e Planit të Detyruar Vendor, Zona “5 Maji”, Bashkia Tiranë dhe vendimi “Për miratimin e Planit të Detyruar Vendor, Zona 4, Spitallë, pjesë e Zonës me Rëndësi Kombëtare “Brezi Bregdetar”.

Sa i takon zonës 5 maji në Tiranë edhe pse vendimi i KKT nuk është zbardhur ende më herët Këshilli i Ministrave ka përcaktuar kordinatat që do të shërbejnë për zhvillimin e zonës së re. në 31 janar 2020 vendimi “Për shpalljen e zonës së re për zhvillim në njësitë administrative 4 dhe 8 zona “5 maji” u vendos:

“Shpallja si zonë e përshtatshme për zhvillimin e detyruar, sipas hartës dhe koordinatave bashkëlidhur këtij vendimi, të zonës “5 Maji”, Njësitë Administrative 4 dhe 8, Bashkia Tiranë, zonë e re për zhvillim. Caktimi i Bashkisë Tiranë për këtë zonë si njësi zbatuese, për: a) ndërtimin e banesave të reja ose të ndërtesave publike të dëmtuara; b) ndërtimin e rikonstruksionin e infrastrukturës publike dhe kritike; c) realizimin e ndërtimeve në këtë zonë; ç) çdo ndërhyrje tjetër në funksion të rindërtimit të kësaj zone”.

Aktualisht një pjesë e procedurave të rindërtimit janë në proces tenderimi dhe pritet që të dilet me një vendim ndërkohë që këto procedura u ritenderuan duke argumentuar se ofertat e paraqitura më herët nuk plotësonin kushtet.

Sa i takon vendimit të dytë të  zonës së Spitallës duket se është bërë një ndarje e qartë me zonën me rëndësi kombëtare “Brez Bregdetar” teksa në këtë zonë është theksuar se do të ketë edhe një lagje të re që do të ndërtohet për llogari të projektit të rindërtimit. Spitalla ka një shtrirje të konsiderueshme dhe parashikohet të jetë një miks ku një pjesë prej vitesh promovohet si destinacion i një zone  të lirë ekonomike pa ndonjë rezultat konkret./Monitor/