Rindërtimi në Kavajë, Rama: Po ndërtohet kompleksi me 7 pallate; 300 apartamente dhe 100 njësi shërbimi

Kryeministri Edi Rama, ministri i Rindërtimit Arben Ahmetaj dhe kryetari i Bashkisë Kavajë, Redjan Krali inspektuan punimet në ndërtimin e një kompleksi të madh në Kavajë ku do të përfshihen 7 pallate banimi me 300 apartamente.

“Të gjithë ata që janë në pritje për të hyrë në apartament, e kanë të vështirë ta kuptojnë se është çështje projekte komplekse dhe duan kohë. Ne do përpiqemi t’i bëjmë sa më shpejt apartamentet, që familjarët të hyjnë sa më shpejt nëpër banesa,” u shprehë Edi Rama ndërkohë kryetari i Bashkisë Kavajë, Redjan Krali, tha se po bëhen përpjekje që ky projekt të bëhet sa më shpejt duke shtuar:

“Kavaja vijon me projekte të tjera. Lagjja Camëria po rregullohet. Ne po punojmë maksimalisht për të ndërtuar sa më shpejt kompleksin me pallatet, që edhe qytetarët të hyjnë sa më shpejt nëpër apartamente.”

Përveç 300 apartamenteve, sipas Edi Ramës, në këtë kompleks do të ngrihen 100 njësi shërbimi nga themelet me standardet më të larta dhe të gjithë infrastrukturën e nevojshme, nga rrjeti rrugor, rrjetet inxhinierike të furnizimit dhe çdo detaj tjetër për zonën e re zhvillimore pas tërmetit të 26 nëntorit 2019.