Rinumërimi i votave për kandidatë, procesi përmbyllet në 30 komuna të Kosovës

Është përmbyllur procesi i rinumërimit të votave në 30 komuna të Kosovës.

“Në QNR rinumërohen mbi 80% apo 2.061 nga 2.557 vendvotime, 30 komuna përmbyllin procesin. Në Qendrën e Numërimit dhe Rezultateve është duke vazhduar numërimi i fletëvotimeve sipas listës së vendvotimeve për të cilat KQZ ka marrë vendim që të rinumërohen,” ka bërë të ditur Komisioni Qendror i Zgjedhjeve i Kosovës ndërsa procesi i rinumërimit të votave të kandidatëve në zgjedhjet e 28 dhjetorit 2025, vijon.

Nga fillimi i këtij procesi, 13 janar 2026, ora 18:00, dhe deri më tani 28 janar 2026, ora 10:00, janë rinumëruar mbi 80% apo 2.061 nga 2.557.

KQZ planifikon që deri në fund të këtij muaji të përfundojë procesin e rinumërimit në mënyrë që t’i hapet rrugë shpalljes së rezultateve përfundimtare të zgjedhjeve të 28 dhjetorit të vitit të shkuar.

Komisioni Qendror i Zgjedhjeve vendosi që në rinumërim të shkojnë të gjitha vendvotimet në nivel vendi pasi u evidentuan manipulime me vota të kandidatëve.