Risi në PD, përzgjedhja e kandidatëve për zgjedhjet parlamentare dhe lokale do të bëhet…

Edhe një risi në Partinë Demokratike! Përzgjedhja e kandidatëve për zgjedhjet parlamentare dhe ato lokale do të bëhet me votim nga anëtarësia.

Për përgatitjen e këtij modeli, Partia Demokratike bënë të ditur se prej dy ditësh janë në Tiranë Kryevlerësuesi i Komitetit të Seleksionimit të Kandidatëve të Partisë Konservatore Britanik, Davis Jones dhe Ish-kandidatja konservatore për Bashkinë e Londrës, Joy Morrisey, të cilët me përvojën e konservatorëve britanike, do të ndihmojnë Partinë Demokratike në procesin e përzgjedhjes se kandidatëve demokratë për zgjedhjet parlamentare dhe lokale

Bazuar në modelin britanik të Partisë Konservatore, PD ka përgatitur mënyrën e seleksionimit të kandidatëve të saj, që do të bazohet në tre fazakyçe:

1. Ngritjen e komisionit të seleksionimit të kandidatëve

2. Përcaktimin e kritereve dhe standardeve për aplikantët që duan të kandidojnë.

3. Procesin e seleksionimit të kandidatëve përpara votimit nga anëtarësia.

Me modelin e saj të ri, Partia Demokratike thekson se është duke reflektuar ndaj kërkesës së shumicës dërrmuese të shqiptarëve për ta lidhur direkt kandidatin me zgjedhësin. Dhe jo vetëm kaq!

Modeli britanik që do të zbatohet në PD, i shërben Partisë Demokratike edhe si një veting brenda partisë, dhe i jep mundësinë e zgjedhjes së kandiatëve më të përshtatshëm që do të përfaqësojnë PD në parlament dhe në pushtetin lokal.

Ndryshe, përfshirja e anëtarësisë në përzgjedhjen e kandidatëve nuk është risi vetëm për Partinë Demokratike, por për të gjithë politikën shqiptare. Deri më sot, asnjë forcë politike në Shqipëri nuk ka zbatuar këto standarde perëndimore që e bëjnë procesin e seleksionimit të kandidatëve në Partinë Demokratike një proces transparent, demokratik dhe të bazuar në meritë.