Koha për Rithemelimin e Mendimit Politik të PD

nga Agim Popoci

Rithemelimi i Partisë Demokratike padyshim është mrekullia politike më e madhe që ndodhi në tranzicion, por, shuarja e kësaj mrekullie me duart e atyre që e jetësuan, padyshim është dështimi më i madh i po këtij tranzicioni nga i cili po e vuan sot vetë PD, pa një shpresë në horizont! Shpresë, e cila do të vazhdoj të mungoj nëse lidershipi i sotëm i Partisë Demokratike nuk ndërmerr një veprim serioz intelektual për Rithemelimin e Mendimit Politik të PD, që është dhe rruga e vetme e shpëtimit!

Jo vetëm, pse, sot, zhvillimet e fundit mund ta kenë shtyrë anëtarin e Partisë Demokratike në një pus të thellë zhgënjimi ndërsa shikon se si forca e tij politike është asfiksuar me dorën e tij, dhe po vazhdon në rënie të lirë e drejtuar nga llumi që shkaktoi përçarjen e Partisë Demkratike, 8 Janarin, dhe, kthimin në PD të po këtij llumi jo kokë ulur dhe me turp, por në krye të piramidës të partisë, duke bërë sot dhe ligjin!

Por, sepse, sot, shoqëria, shteti, ekonomia dhe qenia shqiptare është drejt zhdukjes!

Nëse demokratët e kanë kuptuar dhe dëgjuar lidershipin e partisë se duhet sakrifikuar për të ndërtuar një shtet demokratik pas rënies së komunizmit, se integrimi i të përndjekurve duhet të bëhet gjatë një procesi por pa persekutimin e persekutorëve, se për kthimin e pronave të plaçkitura nga komunistët duhet kohë, rikthimi i komunistëve në pushtet ndryshoi shumëçka, por, jo, dhe mënyrën e veprimit të lidershipit të Partisë së Demokratike!

Lidership, i cili pati mbështetjen për protestat e organizuara deri te përballja e turpshme e 8 Janarit 2022, pa e menduar se autorët e kësaj përballje të trishtë do të emërohen për shumë pak kohë në rolet drejtuese të PD, njëri si Kryetar i Grupit Parlamentar dhe tjetri si Nënkryetar i Parlamentit, ndërsa demokratët protestues ende vuajnë pasojat nga birucat dhe uji i Lanës ku përfunduan nga gazsjellësi që ju kishte gatuar Zotni Lafsha me këta dy shërbëtorët të zellshëm në krah; Pa e menduar se protesta për dorëheqjen e kriminelit Kryetar të Bashkisë Tiranë, Erion Veliaj, do të përfundoj me dorëheqjen e tij dhe tërheqjen e lidershipit të PD sepse nuk kishte kandidat për të garën elektorale; Dhe, pa e menduar se anijes së PD-së sërish do ti futet uji dhe ajo do të fillon të fundoset ndërsa do të rikthehen skenat shkatërrimtare që detyruan Rithemelimin e PD, fillimisht duke bojkotuar parlamentin, zgjedhjet lokale në 5 bashki, dhe së fundi, që ishte shumë shumë më e rëndë, rikthimi para Kryeministrisë me mikrofon, ndonëse tashmë pa çadër sepse të përzgjedhurit e demokratëve ankohen për pamundësinë e parlamentarizmit nga Edi Rama!

Sot, askush në Partinë Demokratike nuk duhet të detyroj harresën e të kaluarës së PD, siç bënë në vitin 1991 me komunizmin, dhe në vitin 2023 me t’u kthyer në selinë e PD me bashizmin, por, sot, të gjithë demokratët duhet ta kuptojnë se koha për Rithemelimin e Mendimit Politik të PD ka ardh, ashtu si edhe koha për një veprim të duhur të opozitës së djathte!  

Sot, askush në Partinë Demokratike nuk duhet të shpërfill studimet mbi punën klasike të një opozite politike në demokracitë perëndimore nga ai i Robert Dahl, në vitin 1966, Ionescu dhe Madariaga në 1968, Schapiro në 1972, Tokes në 1979, Kolinsky në 1988 dhe Rodan në vitin 1996, por siç thotë Jean Blondel në “Political Opposition in the Contemporary World”, analiza në shumë vende shqyrtohet në çdo rast të veçantë!

Sot, askush nuk PD nuk duhet të ëndërroj që ta bëjë partinë konservatore siç e mendoi Edmund Burke duke mbrojt rendin tradicional, fenë, familjen, si dhe duke kritikuar idealet revolucionare, sepse Partia Demokratike nuk ka as Edmund as Burke!

Por, sot, askush në PD nuk duhet as ta mendoj që nëse parimet e së djathtës që krijuan Partinë Demokratike nuk mund të jenë pjesë e një Rithemelimi të Mendimit Politik të PD, e djathta do të shkërmoqet në Shqipëri!

Jo, sepse, ishte pikërisht mënyra e përqafimit të këtyre parimeve për të themeluar Partinë Demokratike, ajo që lejoi shkatërrimin e shoqërisë, shtetit, ekonomisë dhe individit në Shqipëri nga komunistët shqiptarë në sy të PD-së!

Që në momentin e parë kur u themelua PD askush nuk e kuptoi se nuk mjafton të jesh i përndjekur politik ose pronar i plaçkitur nga komunistët, që të jesh dhe pjesë e një të djathte që do të ndërtoj një shtet me parime të shëndosha të së djathtës, ndërsa u shpërfill fakti mbi brumin e emigracionit shqiptar nga ata që quheshin të përndjekur ose pronarë me shumë pak disidentë të komunizmit, për të mos thënë inekzistentë!

Dhe, që në momentin e parë, askush në PD nuk u interesua për traditën, fenë, familjen dhe kulturën kombëtare si parime të së djathtës, jo vetëm pse u luftuan nga propaganda komuniste për 50 vjet, por, u mjaftuan pse nuk kundërshtohen si në kohën e regjimit të Enver Hoxhës! Pse vazhduan të mos konsiderohen vërtetë si baza e moralit dhe identitetit të shoqërisë, ndoshta duhet gjetur edhe përgjigja në ndërtimin e këtyre institucioneve në mënyrën më të keqe të mundshme nga komunistë nën petkun demokratë, detyrimisht për shkak të Rithemelimit të Mendimit Politik të PD!

Sepse, për pasojë, shteti nuk kishte rol të kufizuar, në sigurimin e rendit, drejtësisë, mbrojtjes dhe respektimin e ligjit, por vazhdoj të kontrollojë jetën e qytetarëve, aty ku e lanë Enver krimineli me shokë! Ndërkohë në mendësinë qytetare vazhdoi të mbizotëroj ideja se qeveria duhet të zgjidhë çdo problem, duke shënuar një dështim të madh në parimin e zgjidhjes së shumë çështjeve nga tregu, komuniteti dhe familja, dhe, favorizim të një shteti sa më të madhë për shumë më pak hapësirë për lirinë individuale!

Ashtu siç filluan partitë socialiste dhe të majta të futen në vitet ’70 në kulturën dhe politikën evropiane, duke mos sulmuar kapitalizmin, SHBA dhe NATO-n ndërkohë filloi dhe procesi i ndarjes intelektuale nga markizmi, që u përshpejtua me rastet e rënda të shkeljes së të drejtave të njeriut në Bashkimin Sovjetik duke i hapur dhe rrugën ideve konservatore që filluan të pëlqehen, kështu dhe Partia Demokratike duhet të Rithemeloj Mendimin Politik pa u kompleksuar se është kaq shumë e vonuar, dhe, pa rënë në grackën e arsyetimit të liberalizmit me qytetari!  

Debatet e fundit me rastin e raportimit të Prokurorit të Përgjithshëm, kreut të SPAK, dhe së fundi, debati për Projektligjin për Barazi Gjinore, jo vetëm që shpërfaqi nevojën urgjente për Rithemelimin e Mendimit Politik të PD, por dëshmoi se në këtë parti nuk funksionojnë as strukturat që do t’ju shërbejnë deputetëve të kësaj partie që të përfaqësojnë idetë e tyre të djathta, si ndëshkimin e ashpër për krimin dhe shkeljen e rendit, ashtu dhe ruajtjen e familjes, fesë dhe vlerave tradicionale.

Departamentet në PD dhe këshilltarët e Grupit Parlamentarë të PD, siç cilësohen me të drejtë nga deputetët e Rithemelimit, “Këshilltarë të Gazit”, duhet të përfundojnë në koshin e plehërave përderisa nuk kryejnë funksionin që kanë! Në një parti të djathtë, çdo njeri duhet të jetë përgjegjës për veprimet e veta dhe të mos varet nga shteti, siç varen sot shumica e këtyre Këshilltarëve të Grupit Parlamentar nga shteti i Edi Ramës, që ende nuk e kanë kuptuar se liria nuk nënkupton dhe mungesë detyrimesh!

Dhe në fund, Rithemelimi i Mendimit Politik të PD do të mundësoj dhe kthimin e krenarisë në këtë parti, krenari të cilën sot e blen Edi Rama dhe i bënë me turp pse janë, Demokratë!