Rohan: Kosova ka bërë kompromiset e veta, nuk duhet të shkojë përtej Ahtisaarit

Përkundër pazareve që vazhdojnë të bëhen me Kosovën mbi dhe nën tryezën e dialogut Kosovë-Serbi që po zhvillohet në Bruksel, Ish-numri dy në negociatat për statusin përfundimtar të Kosovës, Albert Rohan, si njohës i jashtëzakonshëm i kësaj çështje,  i konsideron të tejkaluara dhe të rrezikshme idetë për ndarje ose shkëmbim të territoreve mes Kosovës dhe Serbisë.

Në një bisedë për “Kohën Ditore”, diplomati austriak tha se Kosova tashmë ka bërë kompromiset e saj, duke pranuar Pakon e Marti Ahtisaarit, mbi bazën e së cilës Kosova shpalli pavarësinë më 17 shkurt të vitit 2008.

“Me pranimin e të drejtave të gjera për minoritetet, në veçanti për komunitetin serb dhe Kishën Ortodokse Serbe, siç përfshihet në Planin e Ahtisaarit, si dhe decentralizimin e kompetencave administrative, Kosova tashmë ka bërë kompromiset e saj”, tha ish-zëvendësi i Ahtisaarit.

Reciprociteti, sipas tij, ka munguar nga ana e Serbisë, për të cilën thotë se vazhdon të ketë qëndrim armiqësor ndaj Kosovës.