Romana Vlahutinet shqiptare!
nga Agim Popoci
Shoqëria shqiptare po kalon nëpër një fazë të re zhvillimi, pa vlera dhe me qëllime shumë madhore, pa besim publik dhe me reforma të frikshme progresive që mendohet të realizohen me shantazh dhe spiunë publik, të cilët kryeministri Edi Rama i shndërroi në vlerë, dhe u mbështetën nga ai ku kjo shoqëri synon të integrohet, BE.
Për situatën e krijuar, ku fajtore kryesore është politika, në masë të madhe, përveç mazhorancës dhe vetë Edi Ramës që e ka shkaktuar, është dhe opozita së cilës i ka munguar reagimi agresiv.
Në këtë mënyrë, shoqëria shqiptare ka pësuar një ndryshim rrënjësor nën kryesimin e një kryeministri si Edi Rama, duke i mundësuar tranzicionit të prodhoj edhe antivlera, që i dhanë një goditje të fortë si shoqërisë ashtu edhe shtetit shqiptar në tërësi, që sot po e vuan më shumë se kurrë. Por asgjë nuk është rastësi!
Shqiptarët ditën të reagojnë kur Ambasadorja e BE, Romana Vlahutin heshti ndaj kanabizimit të Shqipërisë, dhe i gjetën vilën e çuditshme që kishte blerë në Tiranë; Reaguan edhe ndaj reformës së përçudnuar në drejtësi dhe filtrit absurd të vettingut, duke e bërë lidhjen me pushtetin e Edi Ramës, por nuk u sqaruan me veten e tyre se pse Romana Vlahutin qenka e tillë.
Çdo veprim i Romana Vlahutin është i mirëmenduar, dhe ajo nuk ka ardhë në Shqipëri për të realizuar projektin e saj, por atë të BE; Romana Vlahutin si Ambasadore e BE është produkt i një politike, që në rastin e Shqipërisë rezultoi si e dëmshme por i tillë është vetë Bashkimi Evropian dhe integrimet e tij, të cilat shoqëria shqiptare edhe pas një çerek shekulli nuk i ka kuptuar.
Pa kaluar në kohë nga dita e rrëzimit të bustit të Enver Hoxhës, pa i studiuar alienët politik si Edi Rama dhe Erion Veliaj që janë produkt ekskluziv i politikës së BE, nëse marrim vetëm vitin e fundit të jetës dhe politikës shqiptare, në mesin tonë na dalin tri Romana Vlahutin, që të padobishme për shoqërinë dhe shtetin shqiptar, do të jenë po aq të dëmshme sa Vlahutini në shtetet ku shërbejnë ose do të shërbejnë.
Jozefina Topalli, Majlinda Bregu dhe së fundi Rudina Hajdari janë tri Romana Vlahutin që i prodhoi Bashkimi Evropian; Me këshillat e BE u shkatërruan politikisht, humbën besimin publik përmes të cilit u futën në politikë, dhe sot dy prej tyre i shërbejnë institucioneve evropiane, dhe Rudina është po në atë rrugë!
Të nisim nga e para, Nënkryetarja e PD, Jozefina Topalli, që sot i shërben organizatës më antishqiptare në historinë e saj, OSBE. Nëse kemi parasysh këtu marrëdhënien OSBE-PD, Jozefina Topalli kot që ankohet në Lulzim Bashën “që dëmtoi Partinë Demokratike” sepse është pikërisht Organizata për Siguri dhe Bashkëpunim Evropian ajo që i ka shkaktuar dëme të pariparueshme kësaj partie, që nga shkelja e misionit të parë në Shqipëri. Qëndrimi i PD në opozitë në kohën e Nënkryetares Topalli nuk ishte rastësi dhe OSBE heshti; Këtë e bëri edhe kur u shpik “Dushku” nga Ilir Meta, por të gjithë heshtën duke përfshirë këtu edhe Jozefina Topallin, kur po ky “mister dushku” u fut në koalicion me partinë e zonjës Topalli, e cila, kohë më pas do të rebelohet për parime dhe vlera. Parime dhe vlera për të cilat heshti edhe me rastin e konkluzionit të fundit që dha OSBE: Po, kishte shitje dhe blerje të votës por nuk ndikoi në rezultat!
Sot në rastin më të mirë Jozefina Topalli është Romana Vlahutin në Mal të Zi dhe në rastin më të keq mund të bëhet Dan Everts. Ta bësh “Dan Evertsin” në Mal të Zi nuk është e vështirë, por kur e bënë këtë viktima politike e këtij njeriu, që në masë të madhe kontribuoi në shkatërrimin e vlerës së votës në Shqipëri, kjo është kriminale. A është Jozefina Topalli rastësisht pjesë e OSBE?! Kur ta kuptojnë këtë shqiptarët, do të jenë më të qartë ndaj Ambasadorëve dhe diplomatëve të çdo niveli që sjellë BE në Shqipëri!
Majlinda Bregu u kurorëzua si Sekretare e Përgjithshme e Këshillit të Bashkëpunimit Rajonal ashtu si Jozefina Topalli me firmën e Edi Ramës. Në prag të rrugëtimit të saj evropian drejtë Sarajevës, gjithë arsenalin e akuzave politike e zbrazi kundër Lulzim Basha. A ka mëkate Basha për situatën e krijuar në PD?! Kjo nuk diskutohet, por krahasuar me Topallin dhe Bregun, janë të papërfillshme ose më mirë të themi nuk arrijnë nivelin e Romana Valhutinit ose Dan Evertsit! Ajo që i lidhë këto personazhe janë Partia Demokratike, dhe për dallim nga Topalli dhe Bregu, Lulzim Basha sot është kryetar i PD ndërkohë këto zonja nuk u përfillën nga elektorati i kësaj partie. Madje, kur u pretendua se kanë forcë elektorale, rezultoi se forca e vetme elektorale që kishin ishte tek Ditmir Bushati, Edi Rama dhe Bukseli zyrtar.
Në fund, produkti më absurd politik i BE, Rudina Hajdari! Sikur Bashkimi Evropian të ishte i interesuar për një klimë të mirë politike në Shqipëri, këtë mund ta bënte fare mirë me liderin e opozitës Lulzim Basha por zgjodhi një rrugë tjetër e cila nuk do ti shërbej as Shqipërisë, as rajonit e aq më pak Bashkimit Evropian.
Opozita dhe Lulzim Basha sot janë jashtë Parlamentit të Shqipërisë vetëm për shkak të politikës së BE dhe produktit të kësaj politike, Edi Rama. Nëse BE heshti ndaj krimit dhe drogës në Shqipëri, si krimi dhe droga dëmin më të madh e bëri dhe po e bënë në Bashkimin Evropian; Nëse BE heshti për politikën shkatërruese të Edi Ramës në Shqipëri, emigrantët që prodhoi kjo politikë përfunduan në shtetet e Bashkimit Evropian!
Ky leksion duhet ti shërbej edhe Rudina Hajdarit duke mos lejuar të bëhet Romana Vlahutin e tretë shqiptare! Sepse nëse BE heshti për largimin e opozitës nga Parlamenti i Shqipërisë, krijimi i “Opozitës së Edi Ramës” nuk do ta shkatërrojë vetëm Shqipërinë. Një Shqipëri pa vlera, pa besim publik por me spiunë publik nuk mund ta çojë këtë vend përpara qoftë edhe me një projekt të BE që për lider të mazhorancës dhe opozitës ka Edi Ramën!
