Roshi pranon akuzat për falsifikimin e formularit të dekriminalizimit/ Prokuroria kërkon kohë për pretencën

Ish-kryebashkiaku i Kavajës, Elvis Roshi, pranoi sot akuzën për falsifikim të të dhënave të paraqitura në formularin e dekriminalizimit. Gjatë seancës në Gjykatën e Rrethit Tiranë, Roshi tha se nuk i kishte prezantuar të gjitha të dhënat personale pasi i kishte neglizhuar.

Në formularin e dekriminalizimit, Roshi kishte shënuar se nuk kishte patur precedentë të mëparshëm penalë, por pas verifikimit qe beri Prokuroria, rezultoi se kishte patur disa masa sigurimi, ndalime dhe dëbime në Itali, Zvicër dhe Gjermani.

Roshi dha dorëheqjen nga posti i Kryebashkiakut të Kavajës pas protestave dhe insistimeve të opozitës, të cilat u mbështetën edhe nga Ambasadori amerikan në Tiranë, Donald Lu.

Opozita denoncoi rekordet kriminale në të kaluarën, dënimin në Itali për përdhunim në grup dhe ndryshimin disa herë të emrit, por këto akuza nuk u pranuan nga Roshi dhe Kryeministri Edi Rama. Madje ky i fundit mori në mbrojtje ish-kryebashkiakun e Kavajës për muaj me rradhë.

Prokuroria ka kërkuar 2 ditë kohë për të paraqitur pretencën.